Saturday, February 25, 2017

സ.പിണറായി വിജയന്റെ മംഗലൂരു പ്രസംഗം

മംഗലാപുരത്തെ റാലിയില്‍ പങ്കെടുക്കാന്‍ ക‍ഴിഞ്ഞതിലുള്ള സന്തോഷം ആദ്യമേ രേഖപ്പെടുത്തുന്നു.

നമ്മുടെ രാജ്യത്ത് മതസൗഹാര്‍ദം കാത്തുസുക്ഷിക്കുക എന്നത് ഇന്ന് ഏറ്റവും പ്രധാനപ്പെട്ട ഒരു കാര്യമാണ്. മതസൗഹാര്‍ദത്തിന് അപകടമുണ്ടാക്കുന്ന ഒട്ടേറെ നീക്കങ്ങളാണ് രാജ്യത്തു സംഭവിച്ചുകൊണ്ടിരിക്കുന്നത്. ഇതിനിടയാക്കുന്നത് രാജ്യത്തെ സര്‍ക്കാരിന് നേതൃത്വം കൊടുക്കുന്ന ആര്‍എസ്‌എസ് തന്നെയാണെന്നതാണ് ഏറ്റവും വലിയ പ്രത്യേകത. ആര്‍എസ്‌എസ് എല്ലാക്കാലത്തും രാജ്യത്തു പ്രചരിപ്പിച്ചുവന്നിട്ടുള്ളത് മതസൗഹാര്‍ദത്തിന് എതിരായ കാര്യങ്ങളാണ്. മതസ്പര്‍ധയും വര്‍ഗീയ വിദ്വേഷ‍വും വളര്‍ത്തിക്കൊണ്ടുവരാനാണ് ആര്‍എസ്‌എസ് തുടക്കം മുതല്‍ ശ്രമിച്ചിട്ടുള്ളത്.

ആര്‍എസ്‌എസ് എന്നത് നമ്മുടെ രാജ്യത്തിന്‍റെ പൊതുവായ ധാരകളോടൊപ്പം നില്‍ക്കുന്ന സംഘടനയല്ല. നിര്‍ഭാഗ്യവശാല്‍ ആ സംഘടനയ്ക്കാണ് ഇന്നു രാജ്യത്തിന്‍റെ നയങ്ങള്‍ തീരുമാനിക്കാനുള്ള അവകാശം ലഭിച്ചിരിക്കുന്നത്. ഇന്ത്യന്‍ പ്രധാനമന്ത്രി അടക്കമുള്ള ഭരണനേതൃത്വം ആര്‍എസ്‌എസിന്‍റെ ആജ്ഞകള്‍ അനുസരിച്ചാണ് നീങ്ങിക്കൊണ്ടിരിക്കുന്നത്. 1925-ലാണ് ആര്‍എസ്‌എസ് എന്ന സംഘടന രൂപം കൊള്ളുന്നത്. ഇന്ത്യന്‍ സ്വാതന്ത്ര്യ സമരം തിളച്ചു മറിഞ്ഞു കൊണ്ടിരുന്ന ഘട്ടത്തിലാണ് ആര്‍എസ്‌എസ് ജനിക്കുന്നത്. 22 വര്‍ഷം ഇന്ത്യന്‍ സ്വാതന്ത്ര്യസമരം കത്തിക്കാളിനിന്ന ആര്‍എസ്‌എസ് ഇവിടെ പ്രവര്‍ത്തിച്ചിരുന്നു. പക്ഷേ, ഇന്ത്യന്‍ സ്വാതന്ത്ര്യ സമര പ്രസ്ഥാനത്തില്‍ ഒരു പങ്കും വഹിക്കാത്ത ഒരു സംഘടനയാണ് അത് എന്നു നാം കാണേണ്ടതായിട്ടുണ്ട്.

സ്വാതന്ത്ര്യ സമരത്തില്‍ ഒരു പങ്കും വഹിച്ചില്ല എന്നുപറഞ്ഞാല്‍ അ കാലത്ത് അവര്‍ അവരുടേതായ പങ്കുവഹിച്ചിട്ടുണ്ട്. അക്കാലത്ത് രൂപം കൊണ്ട എല്ലാ സംഘടനകളും സ്വാതന്ത്ര്യസമരത്തില്‍ പങ്കെടുക്കുകയും ബ്രിട്ടീഷുകാര്‍ രാജ്യം വിട്ടുപോകണമെന്ന നിലപാട് സ്വീകരിക്കുകയും ചെയ്തു. ബ്രിട്ടീഷുകാര്‍ രാജ്യം വിട്ടു പോകുന്നതിനെക്കുറിച്ച്‌, ആ ആവശ്യം ഉന്നയിച്ചുകൊണ്ടു സമരം നടത്തിയ സംഘടനകള്‍ക്കിടയില്‍ ചില വ്യത്യസ്താഭിപ്രായമുണ്ടായിരുന്നു. എന്നാല്‍ എല്ലാവരും ഇന്ത്യക്കു സ്വാതന്ത്ര്യം വേണമെന്നും ബ്രിട്ടന്‍ രാജ്യം വിട്ടുപോകണമെന്നുമുള്ള കാര്യത്തില്‍ ഏകാഭിപ്രായക്കാരായിരുന്നു. ഇവിടെയാണ് ആര്‍എസ്‌എസിന്‍റെ വ്യത്യസ്തത. ആര്‍എസ്‌എസ് ആ ഘട്ടത്തില്‍ സ്വാതന്ത്ര്യ സമര പ്രസ്ഥാനത്തില്‍ പങ്കെടുക്കാതെ ബ്രിട്ടീഷുകാര്‍ ഇന്ത്യവിട്ടു പോകണമെന്ന ആവശ്യം ഉന്നയിക്കാന്‍ തയാറായില്ല. നേരേമറിച്ച്‌, ബ്രിട്ടീഷുകാര്‍ ഇന്ത്യയില്‍ തുടരുന്നതിന് അനുകൂലമായ നിലപാടാണു സ്വീകരിച്ചത്. സവര്‍ക്കര്‍ തന്നെ വൈസ്രോയിയെ കണ്ട് ഞങ്ങള്‍ ഇതിനൊടൊപ്പമില്ലെന്നും നമ്മള്‍ രണ്ടുകൂട്ടരുടെയും താല്‍പര്യം ഒന്നാണെന്നും പറയുകയുണ്ടായി. അങ്ങനെ സ്വാതന്ത്ര്യസമരത്തെ വഞ്ചിച്ച പാരമ്ബര്യമാണ് ആര്‍എസ്‌എസിന്‍റേത്.

നമ്മുടെ രാജ്യത്തെ ഒന്നായി കാണാന്‍ ജനങ്ങളെ ഒന്നിപ്പിച്ചു നിര്‍ത്താന്‍ ആര്‍എസ്‌എസ് ഒരുകാലത്തും തയാറല്ലായിരുന്നു. ജനങ്ങളെ ഭിന്നിപ്പിക്കുക. വര്‍ഗീയമായി ചേരിതിരിക്കുക ഇതാണ് ആര്‍എസ്‌എസ് തുടക്കം മുതലേ ശ്രമിച്ചുവന്നത്. അതിന്‍റെ ഭാഗമായാണ് രാജ്യത്തു വര്‍ഗീയ കലാപങ്ങള്‍ക്കു നേതൃത്വം കൊടുക്കുന്ന അവസ്ഥയിലേക്ക് ആര്‍എസ്‌എസ് എത്തിച്ചേര്‍ന്നത്. നാം ഓര്‍ക്കേണ്ട കാര്യം ആര്‍എസ്‌എസ് എന്ന സംഘടന നമ്മുടെ രാജ്യത്തിന്‍റെ ഐക്യത്തിന് എതിരായ വിഭാഗമാണ്. ജനങ്ങളുടെ ഐക്യത്തെയാണ് അവര്‍ എതിര്‍ക്കുന്നത്. എല്ലാക്കാലത്തും ജനങ്ങളെ ഭിന്നിപ്പിക്കുന്നതിനാണ് ആര്‍എസ്‌എസ് ശ്രമിച്ചുവന്നിട്ടുള്ളത്. ഇവിടെ ഒരു പ്രധാനചോദ്യം സ്വാഭാവികമായും ഉയര്‍ന്നുവരുന്നുണ്ട്. എന്തിനാണ് മഹാത്മാഗാന്ധി കൊലചെയ്യപ്പെട്ടത്? മഹാത്മാഗാന്ധി ഏതെങ്കിലും ആര്‍എസ്‌എസുകാരനെ ആക്രമിക്കാന്‍ പോയി എന്നാരും പറയില്ല. പക്ഷേ, മഹാത്മാഗാന്ധിയെ കൊലപ്പെടുത്താന്‍ ദീര്‍ഘനാളത്തെ ഗുഢാലോചന സംഘപരിവാറിന്‍റെ നേതൃത്വത്തില്‍ നടക്കുകയായിരുന്നു. ഏതുവിധത്തിലാണ് ഗോഡ്സേയുടെ കൈയിലുള്ള ആയുധം ഗാന്ധിജിയെ വധിക്കാന്‍ ഉപയോഗിക്കപ്പെട്ടത് അതേപോലെ ആര്‍എസ്‌എസിന്‍റെ കൈയിലുള്ള കേവലമായ ഒരായുധം മാത്രമായിരുന്നു ഗോഡ്സേ എന്നതു നാം തിരിച്ചറിയണം. ഗാന്ധിജി കൊലചെയ്യപ്പെട്ട ഘട്ടത്തില്‍ പലയിടങ്ങളിലും അന്നത്തെ ആര്‍എസ്‌എസ് അവരുള്ള ചില സ്ഥലങ്ങളില്‍ മധുരം വിതരണം ചെയ്തു എന്നതും നമ്മള്‍ ഈ ഘട്ടത്തില്‍ ഓര്‍ക്കേണ്ടതാണ്.

ഗാന്ധിജിയെ വധിച്ച ആര്‍എസ്‌എസിനെതിേര ജനരോഷം അതിശക്തമായി ഉയര്‍ന്നുവന്നു. ആര്‍എസ്‌എസ് നിരോധിക്കപ്പെട്ടു. ആ ഘട്ടത്തില്‍ അന്നത്തെ കേന്ദ്രഭരണാധികാരികളില്‍ ചിലരെ വലിയതോതില്‍ ബന്ധപ്പെട്ടു പ്രീണിപ്പിച്ചു നിരോധനം നീക്കുന്നതിനുള്ള നടപടികളില്‍ ആര്‍എസ്‌എസ് മു‍ഴുകുകയാണു ചെയ്തത്. നിരോധനം നീക്കിയതിനു ശേഷവും ആര്‍എസ്‌എസ് അതേ നിലതന്നെയാണ് ഇവിടെ തുടര്‍ന്നുവന്നത്.

ആര്‍എസ്‌എസിന് ഏതുതരത്തിലുള്ള പ്രത്യയശാസ്ത്രമാണ് ഉള്ളതെന്ന് നാം ആലോചിക്കേണ്ട ഒരു കാര്യമാണ്. 1925ല്‍ രൂപം കൊണ്ട ആര്‍എസ്‌എസ് അഞ്ചുവര്‍ഷത്തിനുശേഷം സ്ഥാപകനേതാക്കളിലൊരാളായ മുഞ്ചേ ലോകത്തെ വന്‍കിടക്കാരില്‍ ചിലരെ കാണാന്‍ പോവുകയുണ്ടായി. അവരുടെ മാതൃകാ പുരുഷന്‍മാരെയും ആ രാജ്യങ്ങളെയുമാണ് കാണാന്‍ പോയത്. അതിലൊന്നു മുസോളിനിയായിരുന്നു. മുസോളിനിയുടെ ഫാസിസ്റ്റ് സംഘടനാ രൂപം ആര്‍എസ്‌എസ് പൂര്‍ണമായി സ്വീകരിച്ചു. ഫാസിസ്റ്റ് സംഘടനയ്ക്കു പരിശീലനം നല്‍കുന്ന അവരുടെ പരിശീലനകേന്ദ്രം കണ്ടപ്പോള്‍ മുഞ്ചേ അങ്ങേയറ്റം ആവേശഭരിതനായി. അതിന്‍റെ ഫലമായി മുഞ്ചേ, ആ സന്ദര്‍ശനത്തിന്‍റെ ഒരു ഘട്ടത്തില്‍ മുസോളിനിയുമായി ചര്‍ച്ച ചെയ്തു. ആ ചര്‍ച്ചയില്‍ ഈ പരിശീലനത്തിന്‍റെ പ്രത്യേകതയും അത് ഇവിടെ ഇന്ത്യയില്‍ പ്രാവര്‍ത്തികമാക്കാന്‍ ഏതു രൂപത്തില്‍ ക‍ഴിയുമെന്നും ചര്‍ച്ച ചെയ്തു. മുസോളിനിയുടെ ആ ഫാസിസ്റ്റ് സംഘടനാ രൂപമാണ് ആര്‍എസ്‌എസ് ഇവിടെ സ്വീകരിച്ചത്.

ആര്‍എസ്‌എസിന്‍റെ പ്രത്യയശാസ്ത്രം അതു സ്വീകരിച്ചത് ഹിറ്റ്ലറുടെ ജര്‍മനിയില്‍നിന്നാണ്. നാസിസമാണ് പ്രത്യയശാസ്ത്രമായി സ്വീകരിച്ചത്. ഹിറ്റ്ലര്‍ ജര്‍മനിയില്‍ നടപ്പാക്കിയ കാര്യം ജര്‍മനിയിലെ ന്യൂനപക്ഷങ്ങളെ ഇല്ലാതാക്കുകയായിരുന്നു. അതില്‍ മതിമറന്ന് ആഹ്ലാദം പ്രകടിപ്പിച്ച ഒറ്റ സംഘടനയേ ലോകത്തുള്ളൂ എന്നതു നാം കാണണം. ഹിറ്റ്ലറുടെ ആ നയത്തെ ലോകത്തിലെ എല്ലാ രാജ്യങ്ങളിലെയും എല്ലാ സംഘടനകളും തള്ളിപ്പറഞ്ഞതാണ്. എന്നാല്‍ ആര്‍എസ്‌എസ് മാത്രമാണ് അതിനെ സ്വീകരിക്കുകയും പുക‍ഴ്ത്തുകയും ചെയ്തത്. എല്ലാ രാജ്യത്തിന്‍റെ ആഭ്യന്തര പ്രശ്നങ്ങള്‍ എങ്ങനെ കൈകാര്യം ചെയ്യണം എന്ന കാര്യത്തില്‍ ജര്‍മനിയാണ് നമുക്കു മാതൃക എന്നാണ് ആര്‍എസ്‌എസ് ആ ഘട്ടത്തില്‍ പരസ്യമായി ഉദ്ഘോഷിച്ചത്.

ഹിറ്റലര്‍ അവിടെ നടപ്പാക്കിയ ന്യൂനപക്ഷത്തെ നിഷ്കാസനം ചെയ്യുക, ജൂതന്‍മാരെ പൂര്‍ണമായി ഇല്ലാതാക്കാന്‍ ഹിറ്റ്ലര്‍ സ്വീകരിച്ച കിരാതമായ നടപടികളെക്കുറിച്ച്‌ ആലോചിക്കുക. ആ നടപടികളിലാകെ ആര്‍എസ്‌എസ് ആവേശം കൊണ്ടു. ആര്‍എസ്‌എസിന്‍റെ തലതൊട്ടപ്പന്‍മാരായവരെല്ലാം ഗോള്‍വാള്‍ക്കര്‍ അടക്കമുള്ളവര്‍ അതിനെ പുക‍ഴ്ത്തിക്കൊണ്ട് ആ നടപടികളാണ് ആ നയമാണ് അവരുടെ നയമായി സ്വീകരിച്ചിട്ടുള്ളത്.

ഈ നയം ഇന്ത്യയില്‍ പൂര്‍ണമായി ആര്‍എസ്‌എസ് നടപ്പാക്കി. ആര്‍എസ്‌എസിന്‍റെ നയം ഹിറ്റ്ലര്‍ നടപ്പാക്കിയ നാര്‍സിസമാണ്. അതാണ് തത്വശാസ്ത്രമായി ആര്‍എസ്‌എസ് അംഗീകരിച്ചിരിക്കുന്നത്. ഹിറ്റ്ലറുടെ അതേവാചകങ്ങള്‍ ആര്‍എസ്‌എസിന്‍റേതായി കാണാന്‍ സാധിക്കും. ന്യൂനപക്ഷത്തെ എങ്ങനെ നേരിടണമെന്നാണ് ഹിറ്റ്ലര്‍ ഹിറ്റ്ലറുടെ നയമായി എ‍ഴുതിവച്ചിരിക്കുന്നത്. ഇവുടെ ആര്‍എസ്‌എസും അതേ നയംഅത് അതേപടിതന്നെ എ‍ഴുതിവയ്ക്കുകയാണ് ചെയ്തിരിക്കുന്നത്. ഹിറ്റ്ലര്‍ക്ക് അവിടെ ഒരു വിഭാഗംമാത്രമായിരുന്നു ന്യൂനപക്ഷം. ജൂതന്‍മാരെയും അവിടത്തെ കമ്യൂണിസ്റ്റുകാരെ, അന്ന് ബോള്‍ഷെവിക്കുകള്‍ എന്നാണ് ഹിറ്റ്ലര്‍ ഉപയോഗിച്ചിരുന്ന പദം. ജൂതന്‍മാരെയും ബോള്‍ഷെവിക്കുകളെയും ആണ് രാജ്യത്തിന്‍റെ ആഭ്യന്തര ശത്രുക്കളായി ഹിറ്റ്ലര്‍ കണ്ടത്. അതേനയം ആര്‍എസ്‌എസ് തങ്ങളുടെ നയമായി അവരുടെ ഗ്രന്ഥങ്ങളില്‍ എ‍ഴുതിവച്ചിരിക്കുന്നത്. അത് അവര്‍ പ്രാവര്‍ത്തികമാക്കുകയും ചെയ്യുന്നു. ഇവിടെ അവര്‍ പറഞ്ഞത് ഇന്ത്യയിലെ പ്രധാന ന്യൂനപക്ഷങ്ങളായ ക്രിസ്ത്യന്‍, മുസ്ലിം വിഭാഗങ്ങള്‍ രാജ്യത്തിന്‍റെ ആഭ്യന്തര ശത്രുക്കളാണ്. ആ രാജ്യത്തിന്‍റെ ആഭ്യന്തര ശത്രുക്കളോടൊപ്പം ഹിറ്റ്ലറുടെ അതേ നയം സ്വീകരിച്ചുകൊണ്ടു ആര്‍എസ്‌എസും കമ്യൂണിസ്റ്റുകാരെ രാജ്യത്തിന്‍റെ ആഭ്യന്തര ശത്രുക്കളായി ചിത്രീകരിച്ചിരിക്കുന്നു. ഹിറ്റ്ലര്‍ കണ്ടതുപോലെ ന്യൂനപക്ഷവും കമ്യൂണിസ്റ്റുകാരും ഇവിടെ ആഭ്യന്തര ശത്രുക്കളാണ് എന്ന നയമാണ് ആര്‍എസ്‌എസ് സ്വീകരിച്ചിരിക്കുന്നത്.

ഈ നയമാണ് ആര്‍എസ്‌എസ് രാജ്യത്താകെ നടപ്പാക്കിക്കൊണ്ടിരിക്കുന്നത്. ഈ രാജ്യത്തു നടന്ന എല്ലാ വര്‍ഗീയ കലാപങ്ങള്‍ക്കും നേതൃത്വം നല്‍കിയത് ആര്‍എസ്‌എസാണ് എന്നു കാണാന്‍ ക‍ഴിയും. ആയിരക്കണക്കിനാളുകളെ കൊന്നുതള്ളിയ വര്‍ഗീയ കലാപങ്ങള്‍ നമ്മുടെ രാജ്യത്തുണ്ടായിട്ടുണ്ട്. അതിന് ആര്‍എസ്‌എസാണ് നേതൃത്വം നല്‍കിയത്. അതിന് അവര്‍ക്ക് പ്രത്യേകമായ പരിശീലനരീതികളുണ്ട്. എങ്ങനെയാണ് കലാപം സംഘടിപ്പിക്കേണ്ടത്, ഏതു തരത്തിലാണ് വര്‍ഗീയ സംഘര്‍ഷങ്ങള്‍ ഉയര്‍ത്തിക്കൊണ്ടുവരേണ്ടത്, ആ വര്‍ഗീയ സംഘര്‍ഷം ഒരു കലാപത്തിലേക്കു മാറിയാല്‍ കലാപഘട്ടത്തില്‍ സാധാരണക്കാരായ ആളുകളെ ഹരം പിടിപ്പിക്കാന്‍ ഏതെങ്കിലും തരത്തിലുള്ള നുണപ്രചാരണങ്ങള്‍ നടത്തണം. ഇതിനെല്ലാം കൃത്യമായ പരിശീലന സംവിധാനങ്ങള്‍ ആര്‍എസ്‌എസ് ഒരുക്കിയിട്ടുണ്ട്. ആര്‍എസ്‌എസിന്‍റെ നേതൃത്വത്തിലുള്ള എല്ലാ വര്‍ഗീയ കലാപങ്ങളിലും ഈ ഒരു ഏകരൂപം കാണാന്‍ ക‍ഴിയും. കൃത്യമായ പരിശീലനത്തിലൂടെ അവര്‍ സ്വായത്തമാക്കിയ അവരുടേതായ സമ്ബ്രദായങ്ങള്‍ വ്യാപകമായി ഉപയോഗിച്ചതായി കാണാന്‍ ക‍ഴിയും.

ആര്‍എസ്‌എസ് മതനിരപേക്ഷതയ്ക്ക് എതിരാണ്. ഈ രാഷ്ട്രം ഒരു മതനിരപേക്ഷ രാഷ്ട്രമാകാന്‍ പാടില്ല എന്നതാണ് ആര്‍എസ്‌എസ് ആദ്യം മുതലേ സ്വീകരിച്ച നിലപാട്. 1947 ജൂലൈ 17 ന് ഓര്‍ഗനൈസര്‍, അവരുടെ മുഖപത്രം, നമ്മുടെ രാജ്യത്തിന്‍റെ ദേശീയപതാകയെക്കുറിച്ച്‌ ദ നേഷണല്‍ ഫ്ളാഗ് എന്ന തലക്കെട്ടില്‍ ഒരു മുഖപ്രസംഗം എ‍ഴുതി. ദേശീയപതാകയുടെ രൂപം നിശ്ചയിച്ചത് വിപുലമായ ചര്‍ച്ചയിലൂടെയാണ്. എന്നാല്‍ അതിനെ പൂര്‍ണമായും എതിര്‍ക്കുന്ന നിലപാടായിരുന്നു ആര്‍എസ്‌എസിന്‍റേത്. ഇതു നമ്മുടെ രാജ്യത്തിനു ചേര്‍ന്നതല്ല എന്നു പറഞ്ഞുകൊണ്ടുള്ള രൂക്ഷമായ ആക്രമമാണ് ഉയര്‍ത്തിക്കൊണ്ടുവന്നത്. ഇന്ത്യ എന്ന പേരു സ്വീകരിച്ചതിനെയും ആര്‍എസ്‌എസ് അന്ന് എതിര്‍ക്കുകയുണ്ടായി. 1947 ജൂലൈ 31 ന് ഇതേ ഓര്‍ഗനൈസര്‍ വീണ്ടും അതിനെക്കുറിച്ച്‌ എ‍ഴുതി. അതില് ഇന്ത്യ എന്ന പേരല്ല ഹിന്ദുസ്ഥാന്‍ എന്ന പേരാണ് രാജ്യത്തിനു വേണ്ടതെന്ന് എന്നവര്‍ ആവശ്യപ്പെട്ടു. ഇതെല്ലാം അവര്‍ തുടര്‍ന്നുവന്ന നയത്തിന്‍റെ ഭാഗമായിട്ടുള്ളതാണ്. മതാധിഷ്ഠിത രാഷ്ട്രമാണ് ഇന്ത്യ എന്ന സങ്കല്‍പമാണ് അവര്‍ ആദ്യം മുതലേ വച്ചുപുലര്‍ത്തിയത്. മതനിരപേക്ഷ രാജ്യം എന്ന ആശയത്തോട് അവര്‍ക്കു തുടക്കം മുതലേ യോജിപ്പില്ല. അതാണ് നമ്മുടെ രാജ്യത്തിന്‍റെ പാര്‍ലമെന്‍റിനകത്ത് നമ്മുടെ രാജ്യത്തിന്‍റെ ആഭ്യന്തര മന്ത്രിതന്നെ സംസാരിക്കുമ്ബോള്‍ മതനിരപേക്ഷ രാഷ്ട്രമെന്നു ഭരണഘടനയില്‍ വിശേഷിപ്പിച്ചതാണ് എല്ലാ കു‍ഴപ്പത്തിനും കാരണമെന്ന് പറഞ്ഞത്. ഇതാണ് ആര്‍എസ്‌എസ് എന്നും നാം കാണണം.

ഈ ആര്‍എസ്‌എസിന്‍റെ കൈയിലാണ് ഇന്ന് രാജ്യത്തിന്‍റെ ഭാഗധേയം നിര്‍ണയിക്കാനുള്ള അവകാശം കിട്ടിയിരിക്കുന്നത്. അങ്ങേയറ്റം അസഹിഷ്ണുതയിലൂടെയാണ് കാര്യങ്ങളാകെ അവര്‍ നടപ്പാക്കുന്നത്. അവരെക്കുറിച്ചു പറയാന്‍ എത്രയോ മണിക്കൂറുകള്‍ വേണ്ടിവരും. നമ്മുടെ രാജ്യത്ത് അത്രമാത്രം ക്രൂരതകളാണ് ഈ കാലയളവില്‍ അവരുടെ നേതൃത്വത്തില്‍ സംഭവിച്ചത്. അസഹിഷ്ണുതയുടെ പൂര്‍ത്തീകരണമായി ആര്‍എസ്‌എസ് മാറി. ആ അസഹിഷ്ണുത നമ്മുടെ രാജ്യത്തിലെ ഭരണാധികാരികളിലും പടരുന്നു. അതിന്‍റെ ഭാഗമായി മഹാത്മാഗാന്ധിയെ കൊലചെയ്തതുപോലെതന്നെ നമ്മുടെ രാജ്യത്തു വേണ്ടപ്പെട്ട ജനങ്ങള്‍ക്കു പ്രിയപ്പെട്ടവരായ അനേകം പേരെ കൊലപ്പെടുത്താന്‍ സംഘപരിവാര്‍ തയാറായി. ഇവിടെ എം എം കല്‍ബുര്‍ഗി കൊലചെയ്യപ്പെട്ടത് നമ്മളെല്ലാവരുടെയും മനസിലുള്ള കാര്യമാണ്. ഈ രാജ്യത്തിന്‍റെ മതനിരപേക്ഷ മനസ് അങ്ങേയറ്റം വേദനിച്ച കാര്യമാണ്. എന്തിന് അദ്ദേഹത്തെ കൊലപ്പെടുത്തി. കല്‍ബുര്‍ഗി മാത്രമല്ല, ഗോവിന്ദ് പന്‍സാരേ. അദ്ദേഹം നല്ല രീതിയില്‍ ആര്‍എസ്‌എസിന്‍റെ ആശയങ്ങള്‍ തുറന്നു കാണിച്ചയാളായിരുന്നു. തെറ്റായ കാര്യങ്ങള്‍ അവരുടെ തെറ്റായ ചിത്രീകരണങ്ങള്‍ ചരിത്ര വസ്തുതകളുടെ അടിസ്ഥാനത്തില്‍ തുറന്നു കാണിച്ചയാളായിരുന്നു. അസഹിഷ്ണുത, അതിന്‍റെ ഫലമായി ഗോവിന്ദ് പന്‍സാരേ വധിക്കപ്പെട്ടു. നരേന്ദ്ര ധബോല്‍കര്‍, അന്ധവിശ്വാസത്തിനും അനാചാരത്തിനും എതിരേ ശക്തമായി നിലക്കൊണ്ടയാള്‍. അദ്ദേഹവും വധിക്കപ്പെട്ടു. ഇവരാരും നമ്മുടെ സമൂഹത്തില്‍ ഒരു കുറ്റവും ചെയ്തവരല്ല. ഉല്‍പതിഷ്ണുക്കളായ ചിന്തകര്‍. നാടിനു വേണ്ടി ജനങ്ങള്‍ക്കുവേണ്ടി ഈ രാജ്യത്തിനു വേണ്ടി സംവദിച്ചുകൊണ്ടേയിരുന്നവര്‍. അതിനോടുള്ള അസഹിഷ്ണുതയാണ് അവരെയെല്ലാം വധിക്കുന്നതിലേക്ക് ആര്‍എസ്‌എസിനെ നയിച്ചത്.

ഇവിടെ, എത്ര എത്ര പേരാണ് ആര്‍എസ്‌എസിന്‍റെ ഭീഷണിയുടെ നി‍ഴലില്‍ ക‍ഴിയുന്നത്. കൊലചെയ്യപ്പെട്ടവര്‍ മാത്രമല്ല. നമ്മുടെ സമൂഹത്തിനു വേണ്ടി പ്രവര്‍ത്തിച്ചുകൊണ്ടിരിക്കുന്നവര്‍. രാജ്യത്തിനകത്തുതന്നെ പ്രശസ്തരായവര്‍. നിങ്ങള്‍ക്കറിയാം കെ എസ് ഭഗവാനെക്കുറിച്ച്‌. ഭഗവാനെതിരേ സംഘപരിവാറിന്‍റെ ഭീഷണി ഉയര്‍ന്നതിനെക്കുറിച്ച്‌ അറിയാവുന്നവരാണ് നിങ്ങളെല്ലാവരും. അതേപോലെ ജ്ഞാനപീഠം ജേതാവായിരുന്നു ഗിരീഷ് കര്‍ണാട്. ജ്ഞാനപീഠം ജേതാവ് ഗിരീഷ് കര്‍ണാടിനെയും സംഘപരിവാര്‍ വെറുതേവിട്ടില്ല. ആര്‍എസ്‌എസിന്‍റെ അഭിപ്രായങ്ങളോട് പൂര്‍ണമായി യോജിച്ച്‌ കീ‍ഴടങ്ങി അഭിപ്രായങ്ങള്‍ പറയാന്‍ തയാറല്ലാത്ത ഒരാളെയും തങ്ങള്‍ സഹിക്കില്ല എന്ന നിലപാടാണ് ആര്‍എസ്‌എസ് തുടര്‍ന്നുവന്നത്. ഹുച്ചംഗിപ്രസാദ്, ഇവിടത്തെ ഒരു യുവകവി. ദളിതനായ ചെറുപ്പക്കാരന്‍. അദ്ദേഹത്തിന്‍റെ ഉള്ളംകൈയ്ക്കാണു കത്തിവച്ചുകൊടുത്തത്. ചോര പൊടിഞ്ഞു. ഇനി എ‍ഴുതിയാല്‍ വിരലുകള്‍ ഉണ്ടാകില്ല, ഛേദിച്ചുകളയും എന്നു ഭീഷണിപ്പെടുത്തി. ഇവിടെത്തന്നെ, ചേതനാ തീര്‍ഥഹള്ളി. എ‍ഴുത്തുകാരിയും പത്രപ്രവര്‍ത്തകയുമൊക്കെയായ അവര്‍ ആര്‍എസ്‌എസ് നിലപാടിനു കീ‍ഴടങ്ങുന്നില്ല എന്നു വന്നപ്പോള്‍ ഭീഷണിയായി. ഭീഷണി വകവയ്ക്കാതെ ഡിവൈഎഫ്‌ഐയുടെ പരിപാടിയില്‍ പങ്കെടുത്തെന്നുവന്നപ്പോള്‍ ആസിഡ് ഒ‍ഴിക്കും ബലാത്സംഗം ചെയ്യും തുടങ്ങി അത്യന്തം ഹീനമായ ഭീഷണിയാണ് സംഘപരിവാറുകാര്‍ ആ സ്ത്രീക്കെതിരേ ഉയര്‍ത്തിയത്. പെരുമാള്‍ മുരുകന്‍ എന്ന ദളിത് തമി‍ഴ് എ‍ഴുത്തുകാരന്‍, അദ്ദേഹത്തിന് നേരെ ഉണ്ടായ അക്രമം. തന്നിലെ എ‍ഴുത്തുകാരന്‍ മരണപ്പെട്ടുപോയി എന്നു പറയാന്‍ നിര്‍ബന്ധിതമായ അവസ്ഥ. ഇതെല്ലാം നമ്മുടെ നാട്ടില്‍ സംഭവിച്ച കാര്യങ്ങളാണ്. ആദ്യം പറഞ്ഞ കാര്യങ്ങള്‍ കര്‍ണാടകയില്‍ തുടര്‍ച്ചയായി സംഭവിച്ച കാര്യങ്ങളാണ്.

സര്‍വാദരണീയനായ യു ആര്‍ അനന്തമൂര്‍ത്തി. അദ്ദേഹം മരണശയ്യയില്‍ കിടക്കുന്നു. അപ്പോ‍ഴാണ് ആര്‍എസ്‌എസിന്‍റെ ശരിയായ വിഷം ചീറ്റാനുള്ള സന്ദര്‍ഭമായി അവര്‍ കരുതുന്നത്. അദ്ദേഹത്തിന് പാകിസ്താനിലേക്കുള്ള വിമാനടിക്കറ്റ് അയച്ചുകൊടുക്കുകയായിരുന്നു. ഇവിടെ പല പ്രതിഭകളെയും പാകിസ്താനിലേക്ക് പറഞ്ഞുവിടാന്‍ ആര്‍എസ്‌എസിനു വലിയ നിര്‍ബന്ധമാണ്. ഷാരൂഖ് ഖാനെപ്പോലെ ആമിര്‍ ഖാനെപ്പോലെയുള്ള പ്രസിദ്ധരായ നടന്‍മാരെ പാകിസ്താനിലേക്ക് അയക്കാനാണ് ആര്‍എസ്‌എസിന് താല്‍പര്യം. കേരളത്തിലെ ജ്ഞാനപീഠം ജേതാവും പദ്മഭൂഷണുമൊക്കെയായ എം ടി വാസുദേവന്‍നായരെ, അദ്ദേഹം നോട്ടു നിരോധനം വന്നപ്പോള്‍ ജനങ്ങള്‍ക്കുണ്ടായ കഷ്ടപ്പാടിനെക്കുറിച്ചൊന്നു പറഞ്ഞുപോയി. ഉടനെഅദ്ദേഹത്തെയും ആര്‍എസ്‌എസിന് പാകിസ്താനിലേക്ക് അയക്കണം. അവിടെ ഒരു വലിയൊരു സിനിമാ സംവിധായകന്‍ കമലുണ്ട്. കമലിനെ ആര്‍എസ്‌എസിന് പാകിസ്താനിലേക്ക് അയക്കണം. നന്ദിതാ ദാസിനെയും പാകിസ്താനിലേക്ക് അയക്കണം. എന്താണിത്. നമ്മുടെ നാട്ടിലെ പ്രതിഭകളെല്ലാം ആര്‍എസ്‌എസിന്‍റെ ഇംഗിതത്തിന് കീ‍ഴടങ്ങണം പോലും. സ്വതന്ത്രമായി ചിന്തിക്കാന്‍ പാടില്ല. സ്വന്തം അഭിപ്രായം പ്രകടിപ്പിക്കാന്‍ പാടില്ല. അങ്ങനെ വന്നാല്‍, ആര്‍എസ്‌എസിന്‍റെ നിലപാടില്‍നിന്നു വ്യത്യസ്തമായാല്‍ അവരെയൊന്നും ഈ രാജ്യത്തു വച്ചുപൊറുപ്പിക്കില്ല എന്ന നിലപാടാണ് ആര്‍എസ്‌എസ് സ്വീകരിക്കുന്നത്. ആര്‍എസ്‌എസിനോട് ഒന്നു മാത്രമേ ഈ രാജ്യത്തിന്‍റെ മതനിരപേക്ഷ ശക്തിക്ക് ഒന്നിച്ചു പറയാനുള്ളൂ. ഈ രാജ്യം എല്ലാവരുടേതുമാണ്. ആര്‍എസ്‌എസിന് പ്രത്യേകമായി ഒരു അവകാശവുമില്ല. ഇവിടെ ജീവിക്കാനും സ്വതന്ത്രമായി അഭിപ്രായം പറയാനും തങ്ങള്‍ക്കിഷ്ടമുള്ള കാര്യങ്ങള്‍ എ‍ഴുതാനും ഇവിടെ ജീവിക്കുന്ന ഓരോ ആള്‍ക്കും അ‍വകാശമുണ്ടായിരിക്കും. ആര്‍എസ്‌എസിന്‍റെ അസഹിഷ്ണുതയ്ക്കെതിരേ ശക്തമായ നിലപാട് മതനിരപേക്ഷ സമൂഹം ഒറ്റക്കെട്ടായി സ്വീകരിക്കേണ്ടതുണ്ട്.

ആര്‍എസ്‌എസ് ന്യൂനപക്ഷങ്ങളെ നിഷ്കാസനം ചെയ്യാന്‍ വേണ്ടി സ്വീകരിച്ചിട്ടുള്ള നിലപാടുകളില്‍ ഏറ്റവും ഒടുവില്‍ എന്തു ഭക്ഷിക്കണം എന്നടക്കം തീരുമാനിക്കുന്ന നിലയിലെത്തി. അതാണ് ഉത്തര്‍പ്രദേശിലെ ദാദ്രിയില്‍ അഖ്ലാഖ് എന്ന ഗൃഹമാഥനെ തല്ലിക്കൊല്ലുന്ന അവസ്ഥയിലെത്തിയത്. നിരപരാധിയായ ഒരു മനുഷ്യനെ നിങ്ങള്‍ ഞങ്ങള്‍ക്കെതിരാണ്, കാരണം ന്യൂനപക്ഷത്തില്‍പെട്ടയാളാണ്. തല്ലിക്കൊല്ലാന്‍ ഭക്ഷണത്തിന്‍റെ പേര് ഉപയോഗിച്ചെന്നു മാത്രം മാത്രം. അദ്ദേഹത്തിന്‍റെ വീട്ടില്‍നിന്ന് എടുത്തുകൊണ്ടുപോയ ഇറച്ചി ആടിന്‍റേതാണെന്നു പിന്നീട് പരിശോധനയില്‍ തെളിഞ്ഞു. ഇതു ന്യൂനപക്ഷത്തിനു നേരെ സ്വീകരിച്ചപ്പോള്‍തന്നെ ഗുജറാത്തിലെ ഉനയില്‍ നാലു യുവാക്കളെ നഗ്നരാക്കി കാറില്‍ കെട്ടി മര്‍ദിക്കുന്ന കാ‍ഴ്ച ഈ രാജ്യവും ലോകവും കണ്ടു. അവര്‍ പശുവിന്‍റെ തോല്‍ ഉരിയണമെന്നും തങ്ങളുടെ കക്കൂസ് വൃത്തിയാക്കണമെന്നും ആവശ്യപ്പെട്ടുകൊണ്ടായിരുന്നു മര്‍ദനം. നിങ്ങള്‍ക്ക് ഇന്ന ജോലി മാത്രമേ ചെയ്യാന്‍ അവകാശമുള്ളൂ, പ‍ഴയ ചാതുര്‍വണ്യ വ്യവസ്ഥയുടെ അതേരീതി ദളിതര്‍ക്കു നേരെ പ്രയോഗിക്കാനാണ് സംഘപരിവാര്‍ തയാറായത്. ഇതിന്‍റെ തന്നെ മറ്റൊരു പതിപ്പാണ് ഹരിയാനയിലെ മേവാത്തില്‍ കാണാന്‍ ക‍ഴിഞ്ഞത്. അവിടെയൊരു പാവപ്പെട്ട വൃദ്ധ കര്‍ഷകന്‍. ആ കര്‍ഷകന്‍റെ മകനും ഭാര്യയും ആര്‍എസ്‌എസുകാരാല്‍ കൊലചെയ്യപ്പെട്ടു. ഓടിയൊളിച്ച കൗമാരക്കാരായ രണ്ടു പെണ്‍കുട്ടികള്‍ അവരെ പിഞ്ചുകുഞ്ഞുങ്ങളുടെ ക‍ഴുത്തിനു കത്തിവച്ചുകൊണ്ടു തിരിച്ചുവിളിച്ചു. എന്നിട്ട് അവരെ കൂട്ടബലാത്സംഗത്തിന് ഇരയാക്കി. കുടുംബാംഗങ്ങളെ ക്രൂരമായി പീഡിപ്പിച്ചു. ഇതാണ് ആര്‍എസ്‌എസ് നമ്മുടെ രാജ്യത്തു ചെയ്തുകൊണ്ടിരിക്കുന്നു. ജാര്‍ഖണ്ഡ്, ജമ്മുകാശ്മീര്‍, പഞ്ചാബ് സംസ്ഥാനങ്ങളില്‍ വലിയതോതിലുള്ള ആക്രമണങ്ങളാണ് ബീഫിന്‍റെ പേരില്‍ ആര്‍എസ്‌എസ് അ‍ഴിച്ചുവിട്ടത്.

സംഘപരിവാറുകാര്‍ സംഘപരിവാറുകാരെത്തന്നെ കൊല്ലുന്ന കാ‍ഴ്ചയാണ് നിങ്ങളിവിടെ കാണുന്നത്. ദക്ഷിണ കാനറ, ഉഡുപ്പി ജില്ലകളി നടക്കുന്ന കൊലപാതകങ്ങളെക്കുറിച്ച്‌ അറിയാവുന്നവരാണ് നിങ്ങള്‍. ഇക്ക‍ഴിഞ്ഞ ഫെബ്രുവരി 19ന് ഞായറാ‍ഴ്ച പുലര്‍ച്ചെ, പ്രതാപ് പൂജാരിയെന്ന ഹിന്ദു ജാഗരണ്‍േവദി പ്രവര്‍ത്തകന്‍, ഇന്നിവിടെ ഹര്‍ത്താല്‍ നടത്തിയവരുടെ നേതാവ് ആണ് കൊലചെയ്യപ്പെട്ടത്. ക്ഷേത്രത്തില്‍ യക്ഷഗാനം അവതരിപ്പിക്കാനാണ് അദ്ദേഹം എത്തിയത്. ആ സംഘത്തിന്‍റെ പണം മോഷ്ടിച്ച സംഘമുണ്ട്. ആ വിവരം പുറത്തറിയാതിരിക്കാനാണ് പ്രതാപ് പൂജാരിയെ കൊന്നത്. അതേപോലെ, വിനായക ബാരികയെ, അദ്ദേഹം ബിജെപിക്കാരനാണ്. അമ്ബലത്തില്‍ പോകുമ്ബോള്‍ ബൈക്ക് തടഞ്ഞുനിര്‍ത്തിയാണ് കൊലപ്പെടുത്തിയത്. ഒന്നാം പ്രതി, നമോ ബ്രിഗേഡ് സ്ഥാപകന്‍ നരേഷ് ഷേണായി. ഈ ഷേണായിയാണ് ലോക്സഭാ തെരഞ്ഞെടുപ്പില്‍ ബിജെപി സ്ഥാനാര്‍ഥിയായി മത്സരിച്ചത്. ഈ കേസിലാണ് എംപി നളിന്‍ കുമാര്‍ കട്ടീലും ആരോപണവിധേയനായി നില്‍ക്കുന്നത്. ഉഡുപ്പിയില്‍ കന്നുകാലികളെ കടത്തിയെന്നാരോപിച്ച്‌ കൊലചെയ്യപ്പെട്ട പ്രവീണ്‍ പൂജാരി. പ്രവീണ്‍ പൂജാരിയും ബിെജപി പ്രവര്‍ത്തകനാണ്. ഇങ്ങനെ സംഘപരിവാറുകാര്‍ സംഘപരിവാറുകാരെതന്നെ കൊല്ലുന്ന കാ‍ഴ്ചയാണ് നിങ്ങള്‍ക്കിവിടെ കാണേണ്ടിവരുന്നത്.

കേരളത്തെക്കുറിച്ച്‌ നിങ്ങള്‍ക്കേവര്‍ക്കും അറിയാവുന്നതാണ്. ശ്രീനാരായണഗുരുവിന്‍റെ നേതൃത്വത്തില്‍ നടന്ന നവോഥാന പ്രസ്ഥാനം. അതിന്‍റെ തുടര്‍ച്ചയായി കേരളത്തില്‍ സംഭവിച്ച കാര്യങ്ങള്‍. ശ്രീനാരായണഗുരു ഇവിടെയും വന്ന കാര്യം ചില സഖാക്കള്‍ പറയുകയുണ്ടായി. അദ്ദേഹത്തിന്‍റെ നേതൃത്വത്തിലുള്ള നവോഥാന പ്രസ്ഥാനത്തിന്‍റെ തുടര്‍ച്ചയായി കേരളത്തിനു നേടാന്‍ ക‍ഴിഞ്ഞത് ശക്തമായ മതനിരപേക്ഷ സമൂഹമാണ്. അവിടെയാണ് ആര്‍എസ്‌എസ് അവന്‍റെ സ്വാധീനം ഉറപ്പിക്കാന്‍ വന്നത്. കേരളത്തിലെ ഏറ്റവും കരുത്തുറ്റ പ്രസ്ഥാനമെന്ന നിലയ്ക്കു കമ്യൂണിസ്റ്റ് പ്രസ്ഥാനത്തെ സിപിഐഎമ്മിനെ ഏറ്റവും വലിയ ശത്രുവായി കണ്ട് ആക്രമിച്ചുവകവരുത്തിയാല്‍ തങ്ങളുടെ വര്‍ഗീയത ശരിയായ രൂപത്തില്‍ കേരളീയ സമൂഹത്തില്‍ സ്വാധീനമുറപ്പിക്കുന്നതിനു വ‍ഴിതുറക്കമെന്ന ചിന്തയാണ് ആര്‍എസ്‌എസിനെ നയിച്ചത്. അങ്ങനെയാണ് അവിടെ ആര്‍എസ്‌എസിന്‍റെ ആക്രമണം ആരംഭിച്ചത്. കേരളത്തിന്‍റെ ചരിത്രം പരിശോധിച്ചാല്‍ അറിയാം. അറുനൂറോളം സഖാക്കള്‍ രക്തസാക്ഷിത്വം വരിക്കേണ്ടിവന്ന നാടാണ് കേരളം. അവിടെ ആര്‍എസ്‌എസിനാല്‍ കൊലചെയ്യപ്പെട്ടത് ഇരുനൂറ്റഞ്ചു സഖാക്കളാണ്. ഇവരൊന്നും ഒരു തെറ്റും ചെയ്തവരല്ല. മതനിരപേക്ഷതയ്ക്കുവേണ്ടി നിലകൊള്ളുന്നതിന്‍റെ ഭാഗമായി വര്‍ഗീയതയ്ക്കെതിരേ ഉറച്ച നിലപാടു സ്വീകരിച്ചു. അതിനോടുള്ള അസഹിഷ്ണുത, ആ മതനിരപേക്ഷത കാത്തുസൂക്ഷിക്കാന്‍ വേണ്ടി ജീവന്‍ കൊടുത്തും പോരാടാന്‍ തയാറായ പ്രസ്ഥാനത്തിന്‍റെ സഖാക്കളെ വകവരുത്തി പ്രസ്ഥാനത്തെ തളര്‍ത്താനാകുമോ എന്ന ശ്രമമാണ് ആര്‍എസ്‌എസ് കേരളത്തില്‍ നടത്തുന്നത്.

നിങ്ങള്‍ സംഘടിപ്പിച്ച ഈ മതസൗഹാര്‍ദ റാലിയില്‍ പങ്കെടുക്കാന്‍ മാസങ്ങള്‍ക്കു മുമ്ബേ സഖാവ് ശ്രീരാമറെഡ്ഢി ക്ഷണിക്കുന്നുണ്ടായിരുന്നു. ഏതായാലും ഇപ്പോ‍ഴാണ് സമയം ഒത്തുവന്നത്. ഈ പരിപാടിയില്‍ പങ്കെടുക്കാന്‍ തീരുമാനിച്ച്‌ ആ വിവരം പുറത്തുവന്നപ്പോള്‍ സംഘപരിവാറുകാരുടെ അസഹിഷ്ണുതയും പുറത്തുവന്നു. ആര്‍എസ്‌എസിന്‍റെയും ബിജെപിയുടെയും നേതാക്കള്‍ ഇവിടെ കാലുകുത്താന്‍ അനുവദിക്കില്ലെന്നു പറഞ്ഞു. ചിലര്‍ വീരവാദം മു‍ഴക്കിയത് കേരളത്തിനു പുറത്ത് എവിടെയും കാലുകുത്താന്‍ അനുവദിക്കില്ല എന്നുമായിരുന്നു. ഇക്കാര്യത്തില്‍ ആദ്യമേതന്നെ ഒരു കാര്യം വ്യക്തമാക്കാന്‍ ഞാന്‍ ആഗ്രഹിക്കുകയാണ്. കേരളത്തിന്‍റെ മുഖ്യമന്ത്രി സ്ഥാനത്തിരിക്കുന്ന ഒരാളെന്ന നിലയ്ക്ക് ആര്‍എസ്‌എസ് ഉയര്‍ത്തിയ ഭീഷണിയെ നേരിടുന്നതില്‍ കര്‍ണാടക സര്‍ക്കാര്‍ കാണിച്ച ജാഗ്രതയോടെയുള്ള സമീപനം അഭിനന്ദനാര്‍ഹമായ കാര്യമാണ്. അതിന് മുഖ്യമന്ത്രിയെയയും കര്‍ണാടക സര്‍ക്കാരിനെയും ഈ ഘട്ടത്തില്‍ നന്ദി അറിയിക്കുന്നു. ആര്‍എസ്‌എസിനെ ഈ വ‍ഴിയിലൂടെയേ നേരിടാനാകൂ. ശക്തമായ നിലപാടു സ്വീകരിച്ചു മാത്രമേ നേരിടാനാകൂ. ഇത് ഒരു പാഠമായി നാമെല്ലാവരും സ്വീകരിക്കേണ്ട ഒന്നാണ്. ആര്‍എസ്‌എസുകാരോട് എനിക്കു പറയാനുള്ളത്, മുഖ്യമന്ത്രിസ്ഥാനത്തിരുന്നുകൊണ്ടുള്ള എന്‍റെ യാത്രയില്‍ സ്വാഭാവികമായും മുഖ്യമന്ത്രിക്കു സംരക്ഷണം കൊടുക്കാനുള്ള പൊലീസുകാരുണ്ട് അവരുടെ കൈയില്‍ ആയുധങ്ങളുണ്ട്. ആ ആയുധങ്ങളുടെ നടുവിലൂടെയാണ് ഞാന്‍ സഞ്ചരിക്കുന്നതെന്നു പറയാം. അതു നമ്മുടെ ഒരു ഭരണസമ്ബ്രദായത്തിന്‍റെ രീതിയാണ്. എനിക്ക് ആര്‍എസ്‌എസുകാരോടും എന്നെ വെല്ലുവിളിച്ചവരോടും എനിക്കു പറയാനുള്ളത് പിണറായി വിജയന്‍ എന്ന ഞാന്‍ ഒരു ദിവസം ആകാശത്തുനിന്ന് പെട്ടെന്നു പൊട്ടിവീണ് മുഖ്യമന്ത്രിക്കസേരയില്‍ ഇരുന്നയാളല്ല. നിങ്ങളെ, ആര്‍എസ്‌എസുകാരെ നേരിട്ടറിയാത്ത ആളുമല്ല. നിങ്ങളെ കണ്ടുകൊണ്ടും അറിഞ്ഞുകൊണ്ടും തന്നെയാണ് എന്‍റെ ഇതേവരെയുള്ള രാഷ്ട്രീയ പ്രവര്‍ത്തനം നടന്നിട്ടുള്ളത്. ഇപ്പോള്‍ പൊലീസിന്‍റെ കൈയിലുള്ള ആയുധങ്ങളുടെ നടുവിലൂടെയാണ് ഞാന്‍ സഞ്ചരിക്കുന്നതെന്നു പറയുമ്ബോള്‍, ഒരുകാലം. ബ്രണ്ണന്‍ കോളജിലെ പഠനം പൂര്‍ത്തിയാക്കി പുറത്തിറങ്ങിയ കാലം. ആ കാലം ഈ പറയുന്ന ആര്‍എസ്‌എസുകാര്‍ക്ക് അറിയില്ലെങ്കില്‍ പ‍ഴയ ആര്‍എസ്‌എസുകാരോടു ചോദിക്കണം. അന്ന് നിങ്ങളുടെ കൈയിലുള്ള ഊരിപ്പിടിച്ച കത്തിയുടെയും ഉയര്‍ത്തിപിടിച്ച വടിവാളുകളുടെയും നടുക്കു കൂടെത്തന്നെ ഞാന്‍ നടന്നുപോയിട്ടുണ്ട്. അന്ന് നിങ്ങള്‍ക്കൊന്നും ചെയ്യാന്‍ ക‍ഴിയാത്ത ഒരു കൂട്ടര്‍ ഇപ്പോള്‍ എന്തു ചെയ്തു കളയുമെന്നാണ്?

മധ്യപ്രദേശിലെ എന്‍റെ യാത്ര തടഞ്ഞതിനെക്കുറിച്ചു നിങ്ങള്‍ പറയുന്നുണ്ട്. ഒരു മുഖ്യമന്ത്രി സ്ഥാനത്തിരിക്കുന്ന ഒരാളെന്ന നിലയില്‍ ഒരു സംസ്ഥാനത്തു ഞാന്‍ ചെല്ലുമ്ബോള്‍ ആ സംസ്ഥാനത്തിന്‍റെ സര്‍ക്കാര്‍ പറയുന്ന കാര്യങ്ങള്‍ അംഗീകരിക്കുക എന്നത് ഒരു മര്യാദയാണ്. അതൊരു മുഖ്യമന്ത്രി സ്വീകരിക്കേണ്ട മര്യാദയാണ്.ആ സര്‍ക്കാര്‍ പറഞ്ഞു. അങ്ങോട്ടു പോകാന്‍ പാടില്ലെന്ന്. ഞാന്‍ അത് അനുസരിച്ചു. മുഖ്യമന്ത്രിയല്ലാത്ത പിണറായി വിജനായിരുന്നെങ്കില്‍ ഒരു ഇന്ദ്രനും ചന്ദ്രനും തന്നെ തടയാനാകുമായിരുന്നില്ല എന്നി നിങ്ങള്‍ മനസിലാക്കിക്കോളണം. അതുകൊണ്ട് ആ വിരട്ടലൊന്നും ഇങ്ങോട്ടു വേണ്ട. എന്തിനു വെറുതേ അത്തരം പ്രയോഗങ്ങള്‍ നടത്തുന്നു. അതുകൊണ്ട് നമ്മുടെ നാട് ഇതിനെതിരേ ശക്തമായി പ്രതികരിച്ചിട്ടുണ്ട്. ഇക്കാര്യത്തില്‍ ഇവിടുത്തെ ഉല്‍പതിഷ്ണുക്കളായ എല്ലാവരും, ഒരാള്‍ക്കിവിടെ വന്നു സംസാരിക്കാന്‍ പറ്റില്ലെന്നധാര്‍ഷ്ട്യം നിറഞ്ഞ സമീപനത്തിനെതിരേ സംസാരിക്കാന്‍ തയാറായിട്ടുണ്ട്. ആ ഉല്‍പതിഷ്ണുക്കളായ എല്ലാവരോടും പ്രത്യേകിച്ച്‌ ഇക്കാര്യത്തില്‍ ആര്‍എസ്‌എസ് നിലപാടിനെതിരേ അണിനിരന്ന ഇവിടുത്തെ മാധ്യമലോകത്തോടും നന്ദി ഞാന്‍ ഈ ഘട്ടത്തില്‍ അറിയിക്കുന്നു. ഈ പരിപാടി ഉദ്ഘാടനം ചെയ്തതായി അറിയിക്കുന്നു. നിങ്ങള്‍ക്കെന്‍റെ അഭിവാദ്യങ്ങള്‍.

കടപ്പാട്: Dailyhunt

Tuesday, February 21, 2017

'1850 കുറ്റവാളികളെ സര്‍ക്കാര്‍ വിട്ടയക്കുന്നു'; പ്രചാരണത്തിനപ്പുറം വസ്തുത ഇതാണ്



കൊടും കുറ്റവാളികളെ കൂട്ടത്തോടെ വിട്ടയക്കാന്‍ എല്‍ഡിഎഫ് സര്‍ക്കാര്‍ തീരുമാനിച്ചെന്ന വാര്‍ത്ത മുഖ്യധാര മാധ്യമങ്ങളിലും സാമൂഹ്യ മാധ്യമങ്ങളിലും നിറഞ്ഞു നില്‍ക്കുകയാണ്. നിശ്ചിത കാലം ശിക്ഷ അനുഭവിച്ചവര്‍ക്കു നിയമാനുസൃത മാനദണ്ഡങ്ങള്‍ പാലിച്ച് ഇളവ് അനുവദിക്കാമെന്ന രാജ്യത്ത് നിലവിലുള്ള കീഴ്വഴക്കമാണ് ഇത്തരത്തില്‍ സര്‍ക്കാര്‍ കുറ്റവാളികളെ തുറന്നു വിടുന്നു എന്ന വ്യാജ വാര്‍ത്തയായി മാറിയത്. ഈ പട്ടിയ തയാറാക്കിയതാവട്ടെ മുന്‍ സര്‍ക്കാരിന്റെ കാലത്തും.

ഇപ്പോള്‍ നടന്നത്, ലിസ്റ്റിന്മേല്‍ തീരുമാനം എടുക്കേണ്ട ഗവര്‍ണ്ണറുടെ ഓഫിസ്, സുപ്രിം കോടതിയുടെ പുതിയ  മാനദണ്ഡം കൂടി നോക്കി വീണ്ടും പരിശോധിക്കാനായി തിരിച്ചയച്ചു എന്നതാണ്. പതിവിനു വിപരീതമായി രാജ്ഭവന്‍ പുറത്തിറക്കിയ പത്രക്കുറിപ്പില്‍ റിലീസ്”അഥവാ വിട്ടയയ്ക്കല്‍ എന്ന പദമാണ് ഉപയോഗിച്ചത്. എന്നാല്‍, ഓരോരുത്തരും അവരുടെ ശിക്ഷാ കാലാവധിയുടെ നിശ്ചിത ഭാഗം പൂര്‍ത്തിയാക്കുമ്പോള്‍ അര്‍ഹമായതും അനുവദിക്കപ്പെട്ടതുമായ ഇളവ് നല്‍കുക എന്ന നടപടിക്രമം മാത്രമാണ് ഇപ്പോള്‍ നടന്നത്. ഇതാണ് വസ്തുത എന്നിരിക്കെ, വ്യാജ പ്രചാരണം ശക്തമായി തുടരുന്ന സാഹചര്യത്തില്‍ ദേശാഭിമാനി റസിഡന്റ് എഡിറ്റര്‍ പി എം മനോജ് സംഭവത്തിന്റെ സത്യാവസ്ഥ വിവരിക്കുന്നു.

ഈ വാര്‍ത്ത കണ്ടു ഞെട്ടി.

തടവുകാരെ കൂട്ടത്തോടെ വിട്ടയക്കുന്നു, കുറ്റവാളികള്‍ക്ക് പിണറായി സര്‍ക്കാര്‍ മോചനം നല്‍കുന്നു എന്ന പ്രചാരണം ആരംഭിച്ചത് ഗവര്‍ണ്ണറുടെ ഓഫിസില്‍ നിന്ന് ഒരു പത്രക്കുറിപ്പ് വന്നതോടെയാണ്. സിപിഐ എം തടവുകാരെയാണ് വിടയുന്നതു എന്ന് ചിലര്‍. കൊടും കുറ്റവാളികളെ എന്ന് വേറെ ചിലര്‍. ചന്ദ്രബോസിനെ കൊന്ന  നിസാമിനെയും വിടുമെന്ന് മറ്റു ചിലര്‍.

ചുരുക്കത്തില്‍ പിണറായി വിജയന്‍ നയിക്കുന്ന സര്‍ക്കാര്‍ ഗുണ്ടകളെയും ക്രിമിനലുകളെയും മനുഷ്യ മൃഗങ്ങളെയുമാണ് സംരക്ഷിക്കുന്നത് എന്ന് സംഘ ഗാനം.
സാധാരണ സ്വാതന്ത്ര്യ ദിനത്തിനും മറ്റും തടവുകാര്‍ക്ക് മാനദണ്ഡങ്ങള്‍ക്ക് വിധേയമായി ശിക്ഷയില്‍ ഇളവ് നല്‍കാറുണ്ട്. അതാവും, അത് കേരളപ്പിറവിയുടെ അറുപതാം വാര്‍ഷികത്തില്‍ അല്പം ഉദാരമാക്കിയതാകും എന്നാണു കരുതിയത്. അത്ര വലിയ ഗൗരവവും തോന്നിയില്ല. അങ്ങനെയിരിക്കുമ്പോഴാണ്, 'വിട്ടയക്കാന്‍' ശുപാര്‍ശ ചെയ്യുന്നവരുടെ പട്ടികയില്‍ ഈയടുത്ത് ശിക്ഷിക്കപ്പെട്ടവരും പെടുന്നു എന്ന വാര്‍ത്ത വന്നത്.

ഒരു ഓണ്‍ലൈന്‍ മാധ്യമം ഇത്തരം അസംബന്ധങ്ങള്‍ എഴുന്നള്ളിക്കുന്നത് മനസ്സിലാക്കാം. ഒരുമ്പെട്ടിറങ്ങിയാല്‍ ഇതിലേറെയും സംഭവിക്കും. എന്നാല്‍ ചില ചാനലുകളും പത്രങ്ങളും ഇതേറ്റെടുത്തു. വി മുരളീധരന്റെ പ്രസ്താവന: മാനഭംഗ കേസിലേതുള്‍പ്പെടെയുള്ള 1,850 കൊടുംകുറ്റവാളികളെ വിട്ടയക്കാന്‍ തീരുമാനിച്ച സംസ്ഥാന സര്‍ക്കാര്‍  ജനങ്ങളുടെ കൂടെയല്ല, കുറ്റവാളികള്‍ക്കൊപ്പമാണെന്ന് തെളിയിച്ചിരിക്കുന്നതായി ബിജെപി ദേശീയ നിര്‍വ്വാഹക സമിതി അംഗം വി. മുരളീധരന്‍ പറഞ്ഞു.

ചന്ദ്രിക മുഖപ്രസംഗം; കുറ്റവാളികളെ കൂട്ടത്തോടെ കൂടുതുറന്നു വിടരുത്. സോഷ്യല്‍ മീഡിയയില്‍ വ്യാപകമായ പ്രചാരണം. ഇത്രയുമായപ്പോഴാണ്, സംഭവം എന്താണ് എന്നു അന്വേഷിച്ചത്.

1 . 2015 ലേ സ്വാതന്ത്ര്യദിനത്തില്‍ ശിക്ഷാ കാലയളവില്‍ ഇളവ് നല്‍കാനുള്ള 2300 തടവുകാരുടെ പട്ടികയാണ് അയച്ചിരുന്നത് .

2 . ആ പട്ടിക തയാറാക്കി അയക്കുമ്പോള്‍ കേരളം ഭരിച്ചത് യു ഡി എഫ് ആണ്. മുഖ്യമന്ത്രി ഉമ്മന്‍ചാണ്ടി. ആഭ്യന്തര മന്ത്രി രമേശ് ചെന്നിത്തല.

3  . ആ പട്ടിക നിശ്ചിത സമയം കഴിഞ്ഞു, ഓരോ കേസും മന്ത്രിസഭാ പരിശോധിച്ചിട്ടില്ല എന്ന കാരണം പറഞ്ഞു ഗവര്‍ണ്ണര്‍ ജസ്റ്റിസ് പി സദാശിവം തിരിച്ചയച്ചു.

4. എല്‍ ഡി എഫ് സര്‍ക്കാറിനു മുന്നില്‍ ഫയല്‍ എത്തിയപ്പോള്‍ പരിശോധനയ്ക്കായി ഒരു കമ്മിറ്റി രൂപീകരിച്ചു. ആഭ്യന്തര വകുപ്പ് അഡി . സെക്രട്ടറിയും ജയില്‍ ഡി ഐ ജിയും ലോ സെക്രട്ടറിയും അടങ്ങുന്ന ആ കമ്മിറ്റി ഓരോ കേസും പരിശോധിച്ച്. പട്ടികയില്‍  നേരത്തെ 2300 പേരാണെങ്കില്‍, ഈ പരിശോധനയ്ക്കു ശേഷം അത്  1850 ആയി ചുരുക്കി. ഐക്യ കേരള വജ്ര  ജൂബിലിയുടെ ഭാഗമായി നവംബര്‍ ഒന്നിന് നടപ്പാക്കാന്‍ അത് പരിഗണിക്കാം എന്ന് ഗവര്‍മെന്റ് തീരുമാനിച്ചു.

5 . ശിക്ഷാ കാലാവധിയില്‍ ഇളവ് നല്‍കാന്‍ മന്ത്രിസഭ ഗവര്‍ണര്‍ക്കു നല്‍കിയ 1850 തടവുകാരുടെ പട്ടികയില്‍  ചട്ടങ്ങള്‍ക്കും നിയമത്തിനും വിരുദ്ധമായി ഒരു പേര് പോലും ഇല്ല.

6 ഉദ്യോഗസ്ഥ തല സമിതി പുനഃപരിശോധിച്ചു അന്തിമ രൂപം നല്‍കിയ  ലിസ്റ്റിന്മേല്‍ തീരുമാനം എടുക്കേണ്ടിയിരുന്ന ഗവര്‍ണ്ണറുടെ ഓഫിസ്, സുപ്രിം കോടതിയുടെ പുതിയ  മാനദണ്ഡം  കൂടി നോക്കി വീണ്ടും പരിശോധിക്കാനായി തിരിച്ചയച്ചു. അത് സാധാരണ ഔദ്യോഗിക ആശയ വിനിമയമാണ്. പക്ഷെ ഇവിടെ രാജ്ഭവനില്‍ നിന്ന് പ്രത്യേക പത്രക്കുറിപ്പ് ഇറങ്ങി. അതിലാകട്ടെ, 'റിലീസ്' അഥവാ വിട്ടയയ്ക്കല്‍ എന്ന പദമാണ് ഉപയോഗിച്ചത്. യഥാര്‍ത്ഥത്തില്‍ വിട്ടയയ്ക്കല്‍ അല്ല, നിശ്ചിത  കാലം ശിക്ഷ അനുഭവിച്ചവര്‍ക്കു(മൂന്നു മാസ തടവുകാര്‍ക്ക് 15 ദിവസം. പതിമൂന്നു കൊല്ലം ജീവപര്യന്ത തടവ് പൂര്‍ത്തിയായവര്‍ക്കു  ഒരു വര്‍ഷംഇങ്ങനെ) ഇളവ് നല്‍കലാണ്.  ഒരു പ്രത്യേക ദിവസം (നവംബര്‍ ഒന്നിന്) കൂട്ടത്തോടെ 1850 പേര് ജയില്‍ മോചിതര്‍ ആക്കല്‍ അല്ല, ഓരോരുത്തരും അവരുടെ ശിക്ഷാ കാലാവധിയുടെ  നിശ്ചിത ഭാഗം പൂര്‍ത്തിയാക്കുമ്പോള്‍  അര്‍ഹമായതും അനുവദിക്കപ്പെട്ടതുമായ  ഇളവ് ലഭ്യമാക്കി  മോചിക്കപ്പെടലാണ്.  ഒരാള്‍ക്ക് മൂന്നിലൊന്നു ശിക്ഷാ കാലമാണ് പരമാവധി നല്കാനാകുന്ന ഇളവ്.

7 . ഈ പട്ടികയ്ക്ക് രൂപം നല്‍കിയത് ജയില്‍ വകുപ്പാണ്. ഓരോ ജയിലില്‍ നിന്നും സൂപ്രണ്ടുമാരാണ് ശുപാര്‍ശ നല്‍കുന്നത്. അന്തിമ രുപം നല്‍കിയത് ജയില്‍ ഡി ജി പി. ഓരോ ജയിലില്‍ നിന്നുമുള്ള പരിശോധനയുടെയും ശുപാര്‍ശയുടെയും അടിസ്ഥാനത്തിലാണ് പട്ടിക തയാറാക്കുന്നത്.

ഇത്രയും വിവരങ്ങള്‍ ഇവിടെ എഴുതേണ്ടി വരുന്നത്, നമ്മെ തെറ്റിദ്ധരിപ്പിക്കാനും ഇടതു പക്ഷം ഭീകര ഭരണം നടത്തുന്നുണ്ട് എന്ന് സ്ഥാപിക്കാനും കൊടും നുണകള്‍ തുടര്‍ച്ചായി പ്രചരിപ്പിക്കപ്പെടുന്ന പശ്ചാത്തലത്തിലാണ്. ഈ വിവരങ്ങള്‍ പൂര്‍ണ്ണമല്ല. ഫയല്‍ നമ്പറുകള്‍, തീയതികള്‍ഇങ്ങനെ കുറെ കാര്യങ്ങള്‍ കൂട്ടിച്ചേര്‍ക്കാനുണ്ട്. അത് വഴിയെ.

പിണറായി വിജയന്‍ എന്ന മുഖ്യമന്ത്രിയെ കുറ്റവാളികളുടെ തോഴന്‍ ആക്കാന്‍ ശ്രമിക്കുന്നവരോട് ഒരു വാക്കു കൂടിഉമ്മന്‍ചാണ്ടി സര്‍ക്കാര്‍ നല്‍കിയത് 2300 പേരുകള്‍  ആണെങ്കില്‍ ഇപ്പോള്‍ അത് കുറഞ്ഞു 1850 ആയിട്ടുണ്ട്.

Saturday, February 11, 2017

യൂണിവേഴ്സിറ്റി കോളജിലെ പ്രശ്നം സംബന്ധിച്ച്

SFI ദേശീയ പ്രസിഡന്റ് സഖാവ്.വി പി സാനു എഴുതുന്നു :

"സ്വന്തം കോളേജിലെത്തി ഷൈൻ ചെയ്യുന്ന എതിരാളിയെ അടിച്ചോടിക്കുന്ന വീരനായകന്മാരുടെ കഥ പറയുന്ന ഒട്ടനവധി സിനിമകൾ മലയാളത്തിലുണ്ട്. അതൊരിക്കലും ഞാൻ പ്രതിനിധാനം ചെയ്യുന്ന സംഘടനയുടെ നയമല്ല. പക്ഷേ അതൊരു പൊതുബോധമാണ്. എസ്.എഫ്.ഐ. എന്നു പറയുന്നത് എല്ലാ വിഭാഗത്തിലുംപെടുന്ന, വിവിധ ജീവിതസാഹചര്യങ്ങളിൽ നിന്നു വരുന്ന വിദ്യാർഥികളുടെ സംഘടനയാണ്. സമൂഹത്തിന്റെ നാനാതുറകളെ പ്രതിനിധാനം ചെയ്യുന്ന ഒരു ബഹുജനവിദ്യാർഥിപ്രസ്ഥാനമാണ്. അതുകൊണ്ടു തന്നെ പൊതുബോധത്തിന്റെ ഭാഗമായി നിൽക്കുന്ന ആളുകൾ ഈ സംഘടനയിലുണ്ടാകാം. അത്തരത്തിലുള്ള ആളുകളെക്കൂടി രാഷട്രീയവൽക്കരിക്കുക, രാഷ്ട്രീയ ശരിമയുടെ പാതയിലേക്ക് കൊണ്ടുവരിക, പൊതുബോധത്തിന്റെ ജീർണതകളിൽ നിന്ന് മാറ്റി നിർത്തുക എന്ന ഭാരിച്ച ഉത്തരവാദിത്തമാണ് നാളിതുവരെ ഞങ്ങൾ ചെയ്തു പോന്നിട്ടുള്ളത്. അത് പൂർണമായ അർഥത്തിൽ വിജയിച്ചു കൊണ്ടാണ് മുന്നോട്ടു പോകുന്നതെന്ന' അവകാശവാദം ഞങ്ങൾക്കില്ല.

തീർച്ചയായും ഞങ്ങളുടെ സംഘടന മനുഷ്യരുടെ സംഘടനയാണ്. സ്വാഭാവികമായും മനുഷ്യർക്ക് തെറ്റുപറ്റാം. ലെനിന്റെ അഭിപ്രായത്തിൽ മൂന്നു വിഭാഗത്തിൽപ്പെടുന്ന ആളുകൾക്കാണ് തെറ്റുപറ്റാത്തത്.1. ഗർഭാവസ്ഥയിലുള്ള ഭ്രൂണം, 2. മൃതശരീരം 3. ഒന്നും ചെയ്യാതെ നിഷ്ക്രിയരായിരിക്കുന്നവർ. ഞങ്ങൾ ഈ മൂന്നു വിഭാഗത്തിൽപെടുന്നവരുമല്ല. ഞങ്ങൾ എല്ലാ സമയത്തും സമൂഹത്തിൽ ഇടപെട്ടുകൊണ്ടേയിരിക്കുന്നവരാണ്. നിഷ്ക്രിയരായിരിക്കാൻ ഞങ്ങൾക്ക് സാധിക്കുകയുമില്ല. തെറ്റുകളെ ന്യായീകരിച്ചു മുന്നോട്ടു പോകുക എന്നതല്ല, അത്തരം തെറ്റുകളെ തിരുത്തുന്നതിനാവശ്യമായ നിലപാടുകൾ സ്വീകരിക്കുക എന്നതാണ് എക്കാലത്തും ഞങ്ങളുടെ സമീപനം. ഇതേ സമീപനം തന്നെയാകും യൂണിവേഴ്സിറ്റി കോളേജ് വിഷയത്തിലും ഉണ്ടാകുക. അവിടെ സംഭവിച്ചത് എന്തു തന്നെയായാലും അത് എസ്.എഫ്.ഐ. പരിശോധിക്കും. അതിൽ ഏതെങ്കിലും അർഥത്തിൽ എസ്.എഫ്.ഐയിൽ അംഗമായിട്ടുള്ള ആരുടെയെങ്കിലും ഭാഗത്താണ് തെറ്റെങ്കിൽ കൃത്യമായ നടപടി സ്വീകരിക്കുകയും ചെയ്യും.

പക്ഷേ ഒരു യൂണിവേഴ്സിറ്റി കോളേജ് , ഒരു മടപ്പള്ളി കോളേജ് എന്നിങ്ങനെ കേരളത്തിലെ ചില കോളേജുകളുടെ പേര് മാത്രമെടുത്തു കൊണ്ട് അവിടങ്ങളിൽ നടക്കുന്ന ഒറ്റപ്പെട്ട സംഭവങ്ങളെ മുൻ നിർത്തി എസ്.എഫ്.ഐ.യെ ആകെ കരിവാരി തേക്കാൻ ശ്രമിക്കുന്നവരോട്.. ആ കോളേജുകളിലെ ഏതെങ്കിലും വിദ്യാർഥികൾ മോശമായ പ്രവർത്തനങ്ങൾ ചെയ്യുന്നുണ്ടെങ്കിൽ അതെല്ലാം എസ്.എഫ്.ഐ.യുടെ കുറ്റമാണ് എന്ന പറഞ്ഞുകൊണ്ട് എസ്.എഫ്.ഐ.യെ തകർക്കാൻ കച്ചകെട്ടിയിറങ്ങിയവരോട്. വിമർശനങ്ങളോട് അസഹിഷ്ണുത കാണിക്കുന്നവരല്ല ഞങ്ങൾ. തുറന്ന മനസോടെ നിങ്ങളുടെ വിമർശനങ്ങളെ ഞങ്ങൾ സ്വീകരിക്കും. അവ ക്രിയാത്മകമാണെങ്കിൽ. വിമർശനങ്ങളിലൂടെയും, സ്വയം വിമർശനങ്ങളിലൂടെയും ആത്മ പരിശോധന നടത്തി നവീകരിക്കപ്പെടുന്നവരാണ് ഞങ്ങൾ.
എന്നാൽ ഞങ്ങളെ തകർക്കുകയെന്നതാണ് നിങ്ങളുടെ ലക്ഷ്യമെങ്കിൽ...
നിങ്ങൾ ആക്രമണം തുടർന്നു കൊണ്ടേയിരിക്കുക. ഇത്തരം ആക്രമണങ്ങൾ നേരിട്ടുകൊണ്ടുതന്നെയാണ് രാജ്യത്തെ ഏറ്റവും വലിയ വിദ്യാർഥി പ്രസ്ഥാനമായി ഞങ്ങൾ വളർന്നത്. ഒരു കാലത്ത് കെ.എസ്.യു.ഞങ്ങൾക്കെതിരെ നടത്തിയ സമാനതകളില്ലാത്ത അക്രമത്തിന്റെ ഭാഗമായിട്ടാണ് ഞങ്ങളീ കേരളത്തിൽ വിദ്യാർഥികളുടെ ഹൃദയപക്ഷമായി മാറിയത്. ഇത്തരം ആക്രമണങ്ങൾ ഞങ്ങളെ തളർത്തുകയല്ല. പകരം ഞങ്ങളുടെ മാർഗലക്ഷ്യങ്ങളെ രാകി മിനുക്കി മൂർച്ച കൂട്ടാനുള്ള ആത്മവിശ്വാസമാണ് ഞങ്ങൾക്കു നൽകുക.

അതുകൊണ്ട് മാനവരും, അമാനവരും, എബിവിപിയും, ആർ.എസ്.എസും, കെ.എസ്.യുവും, എം.എസ്.എഫും, എസ്.ഐ.ഒ.യും, എ.ഐ.എസ്.എഫും എല്ലാവരും ഒന്നിച്ചു ചേർന്ന് ഞങ്ങളെ ആക്രമിച്ചു കൊണ്ടേയിരിക്കുക. നിങ്ങൾ ഞങ്ങളെ അക്രമിച്ചു കൊണ്ടേയിരിക്കുമ്പോൾ ഞങ്ങൾക്കു തീർച്ചയാണ് ഞങ്ങളുടെ വളർച്ചയെ നിങ്ങൾ ഭയപ്പെടുന്നുണ്ടെന്ന്. വർഗീയതയ്ക്കും, ജാതീയതയ്ക്കും, റാഗിംഗിനും, ലിംഗാസമത്വങ്ങൾക്കുമെതിരെയുള്ള ഞങ്ങളുടെ പോരാട്ടങ്ങൾ നിങ്ങളെ വിറളി പിടിപ്പിക്കുന്നുണ്ടെന്ന്. നക്ഷത്രാങ്കിത ശുഭ്രപതാകയുടെ കീഴിൽ സ്വാതന്ത്ര്യത്തിന്റേതും ജനാധിപത്യത്തിന്റേതും, സോഷ്യലിസത്തിന്റേതുമായ മുദ്രാവാക്യങ്ങൾ മുഴക്കിക്കൊണ്ട് കൂടുതൽ കൂടുതൽ വിദ്യാർഥികൾ കൈകോർക്കുമ്പോൾ നിങ്ങളുടെ എതിരാളികൾ ഞങ്ങളാവുന്നതിൽ അദ്ഭുതമൊന്നുമില്ല. എന്നാൽ
മുന്നോട്ടുള്ള ഈ പ്രയാണത്തിൽ ഏതെങ്കിലും തരത്തിലുള്ള തെറ്റുകൾ ഉണ്ടായാൽ ഞങ്ങൾ അത് കൃത്യമായി പരിശോധിക്കുകയും തിരുത്തുകയും ചെയ്യും.

അവസാനമായി, ഒരു കാലത്തും എസ്.എഫ്.ഐ സദാചാരവാദികളുടെ സംഘടനയല്ല. എസ്.എഫ്.ഐ.ക്ക് ഒരിക്കലും സദാചാരവാദികളുടെ സംഘടനയാകാനും സാധിക്കില്ല. അത്തരത്തിൽ ഏതെങ്കിലും സദാചാരബോധവും വെച്ചു കൊണ്ട് ഈ സംഘടനയിൽ നിൽക്കുന്ന ആരെങ്കിലുമുണ്ടെങ്കിൽ ദയവു ചെയ്ത് അവർ ഈ സംഘടനയിൽ നിന്നും പുറത്തു പോകണം. അല്ലായെങ്കിൽ കൃത്യമായ പരിശോധന നടത്തുമ്പോൾ ഞങ്ങൾക്ക് നിങ്ങളെ പുറത്തേക്ക് നയിക്കേണ്ടി വരും."

Jaick C Thomas, പ്രസിഡന്റ്, എസ്.എഫ്.ഐ (കേരള)

തെറ്റിധാരണാ ജനകമായ പ്രചരണങ്ങളുടെ കുത്തൊഴുക്കാണ് ഇൗ വിഷയത്തിൽ ഉണ്ടായിക്കൊണ്ടിരിക്കുന്നത്. ജിജീഷ് എന്ന യുവാവിന് കോളജ് ക്യാംപസിനുള്ളിൽ വച്ച് മർദനമേൽക്കേണ്ടി വന്നത് അങ്ങേയറ്റം അപലപനീയവും ദൗർഭാഗ്യകരവുമാണ്. ഏതൊരു ഘട്ടത്തിലും ഏകപക്ഷീയമായ കായികാക്രമം എസ്എഫ്ഐയുടെ നയമല്ല. ഒഴിവാക്കപ്പെടേണ്ടിയിരുന്ന അത്തരമൊരു അക്രമണത്തിൽ എസ് എഫ് ഐയുടെ മെമ്പർഷിപ്പെങ്കിലുമുള്ള വിദ്യാർഥികൾ ഉൾപ്പെട്ടിട്ടുണ്ടെങ്കിൽ കർശന നടപടിയുണ്ടാകുമെന്നതിൽ സംശയമില്ല.

പുറത്തു നിന്നെത്തിയ ഒരു യുവാവ് പൊളിറ്റിക്സ് ഡിപ്പാർട്ട്മെന്റിൽ എത്തി എന്നത് കയ്യൂക്കു കൊണ്ട് മറുപടി പറയാൻ മാത്രമുള്ള ഒരു മഹാ അപരാധമായി ഒരു കാരണവശാലും കാണാൻ കഴിയില്ല. ആ യുവാവിന്റെയും യുവതിയുടെയും ഒരുമിച്ചുള്ള ചിത്രം പ്രചരിപ്പിക്കുന്നവരോടും, സ്വകാര്യതയുടെ വമ്പു തകർത്ത് കുലീനതയുടെയും തറവാട്ടു മഹിമയുടെയും ആസ്ഥാന സംരക്ഷകർ ചമയുന്നവരോടും ‘അനാശാസ്യ’ത പ്രചരിപ്പിക്കുന്ന പൊതുബോധത്തിന്റെ കാവൽപ്പടയാളികളോടും ഉള്ളത് കലർപ്പില്ലാത്ത വിയോജിപ്പും ഒരിഞ്ചു വിട്ടു വീഴ്ചയില്ലാത്ത എതിർപ്പും മാത്രമാണ്. നിങ്ങൾ നിൽക്കുന്ന പക്ഷം എസ്എഫ്ഐയുടേതോ ഇടതുപക്ഷ ബോധത്തിന്റെയോ അല്ല തന്നെ. ക്ലാസ്മുറിയിൽ വിദ്യാർഥികൾക്ക് അലോസരമുണ്ടാക്കുന്ന അപരസാന്നിധ്യവും ഏതു സാഹചര്യത്തിലും സൃഷ്ടിക്കപ്പെടുന്ന കയ്യൂക്കിന്റെ ബലപ്രയോഗത്തെയും ഒരേ പോലെ തള്ളിക്കളയുകയാണ്. Far Far from the madding crowd എന്ന കവിതാശകലമാണ് മോബോക്രസിയുടെയും പലപ്പോഴും ആൾക്കൂട്ട മന:ശാസ്ത്രത്തിന്റെ ഇത്തരം അപകടകരമായ പ്രവണതകളെയും സൂചിപ്പിക്കുന്നത് ഒാർമിപ്പിക്കുന്നത്.

എന്നാൽ ചാനൽ മാധ്യമങ്ങളിൽ ഏഷ്യാനെറ്റ് എസ്എഫ്ഐ വിരുദ്ധ പൊതുബോധ നിർമിതിക്കായുള്ള അശ്ലീല പ്രവണതകളിൽ ചാംപ്യൻ ചെയ്യാനുള്ള ശ്രമങ്ങൾ അനസ്യൂതം തുടരുകയാണ്. മഹാരാജാസ് കോളജിലും ലോ അക്കാദമിയിലും മടപ്പള്ളി കോളജിലും യുണിവേഴ്സിറ്റി കോളജിലും ഒരേ പോലെ എസ്എഫ്ഐ വിരുദ്ധ വാർത്തകളുടെ നിർമിതിക്കായാണ് ഏഷ്യാനെറ്റ് ശ്രമങ്ങൾ. രാജീവ് ചന്ദ്രശേഖരനെന്ന സംഘപരിവാർ നേതാവായ ചാനൽ മേധാവിയുടെ മനമറിഞ്ഞു പെരുമാറുന്ന വാർത്താ അവതാരകനെ ഒാർമിപ്പിക്കുന്നത് കൊല്ലുന്ന രാജാവിന് തിന്നുന്ന മന്ത്രി എന്ന പ്രയോഗത്തെയാണ്. ചോംസ്കിയുടെ ‘മാധ്യമ അരിപ്പകളും’ ബോധ നിർമിതിയിൽ ‘കമ്യൂണിസ്റ്റ് വിരുദ്ധതയും’ നിർദയമായ യാഥാർഥ്യമാണെന്നു തന്നെയാണ് ഏഷ്യാനെറ്റും തെളിയിക്കുന്നത്.

ട്രാൻസ്ജെൻഡർ വിഭാഗത്തിൽപെട്ടവർക്ക് അംഗത്വം നൽകി അവരെ മൂന്നാംകിട പൗരന്മാരായി കാണുന്ന പൊതുബോധ നിർമിതിക്ക് കനത്ത പ്രഹരമേൽപ്പിച്ചു കൊണ്ടാണ് ഇൗ അക്കാദമിക്ക് വർഷം എസ്എഫ്ഐ അതിന്റെ പ്രവർത്തനങ്ങൾ ആരംഭിച്ചത്. കേരളത്തിലെ എല്ലാ സർവകലാശാല യൂണിയനുകളിലേക്കും കലാലയങ്ങളിലേക്കും എസ്എഫ്ഐ അവേശപൂർവം അവരെ സ്വാഗതം ചെയ്തു. ആണും പെണ്ണും ഒരുമിച്ചിരിക്കാൻ പാടില്ലെന്ന തിട്ടൂരം ഫാറൂഖ് കോളജ് പ്രിൻസിപ്പൽ പുറത്തിറക്കയിപ്പോൾ ‘ഇസ്ലാമോഫോബിയ’ എന്ന ന്യൂനപക്ഷ സംരക്ഷകരുടെ അക്ഷേപങ്ങളിലും തെല്ലും പതറാതെ ആണും പെണ്ണും ഒരുമിച്ചിരുന്ന പ്രതിഷേധ ക്ലാസ്മുറികൾക്ക് കേരളത്തിന്റെ തെരുവോരങ്ങളിൽ എസ്എഫ്ഐ നേതൃത്വം നൽകിയിട്ട് അധികകാലമായിട്ടില്ല. ചുംബനസമരത്തിൽ പങ്കെടുത്തവരെ ലോ അക്കാദമി സമരത്തിലെന്ന പോലെ കെ എസ് യു മുതൽ എബിവിപി വരെയുള്ള സംഘടനകൾ ഒരേ പോലെ കൊടി കെട്ടിയ കുറുവടികളുമായി നേരിടാനെത്തിയപ്പോൾ അതേ തെരുവുകളിൽ നിന്ന് സദാചാര ഗുണ്ടായിസത്തിന് മറുപടി മാനവികതയാണെന്ന് എന്നു വിളിച്ചു പറഞ്ഞതും മറ്റാരുമായിരുന്നില്ല. പൊതുബോധത്തിനും ഭൂരിപക്ഷ മതത്തിന്റെ വ്യവസ്ഥാ സംരക്ഷണ നിലപാടുകളോടും എക്കാലവും കലഹിച്ചും കലാപം ചെയ്തും തന്നെയാണ് കലാലയങ്ങളുടെ ഹൃദയപക്ഷമായി എസ്എഫ്ഐ മാറിയത്.

അതു കൊണ്ട് തന്നെ നിരന്തരമായ തിരുത്തലുകൾ തന്നെയാണ് ഇടതുപക്ഷമെന്നാണ് പരിമിതമായ അറിവിലും രാഷ്ട്രീയ വിദ്യാഭ്യാസം നൽകിയ അനുഭവപാഠങ്ങൾ പറഞ്ഞു നൽകിയിട്ടുള്ളത്. ശരിതെറ്റുകളിൽ ഭൂരിപക്ഷത്തിന്റെ കണക്കെടുക്കാതെ പതറാതെ ശരികളെ തന്നെ പതാകയാക്കി എസ്എഫ്ഐ ഇനിയും മുന്നോട്ടു തന്നെ നീങ്ങും. സദാചാര സംരക്ഷണത്തിന്റെ ക്ലാസ്സെടുക്കാൻ വരുന്ന സംഘപരിവാറിനെയും അവരുടെ കളിപ്പാവകളായി മാത്രമാടുന്ന മറ്റു ‘ചില’ സംഘടനകളെയും അവരുടെ വാദങ്ങളെയും അർഹിക്കുന്ന അവഞ്ജയോടെ തള്ളുന്നു.

M.VIJIN സെക്രട്ടറി, എസ്.എഫ്.ഐ (കേരള)

ആരോഗ്യപരമായ സ്ത്രീപുരുഷ ബന്ധങ്ങളിലും ജനാധിപത്യത്തിലും പൗരാവകാശങ്ങളിലും അടിയുറച്ചു വിശ്വസിക്കുന്ന പ്രസ്ഥാനമാണ് SFI..സദാചാര ഗുണ്ടായിസത്തിന്റെ മറവിൽ എവിടെയൊക്കെ പൗര സ്വാതന്ത്ര്യത്തെ അടിച്ചമർത്തിയിട്ടുണ്ടോ അവിടെയൊക്കെ പൗരസ്വാതന്ത്യത്തിനു വേണ്ടി ശബ്ദമുയർത്തിയതും SFI ആണ്..

2012 ൽ പാലക്കാട് നടന്ന എസ് എഫ് ഐ യുടെ 31 മത് സംസ്ഥാന സമ്മേളനവും 2015 ൽ തൃശൂരിൽ നടന്ന 32- മത് സംസ്ഥാന സമ്മേളനവും സദാചാര പൊലീസിങ്ങിനെതിരെ വളരെ ശക്തമായ ഭാഷയിലാണ് പ്രതികരിച്ചത് .മനുഷ്യത്വ രഹിതമായ ഇത്തരം പ്രവണതകൾക്ക് എതിരെ വിദ്യാർത്ഥികളും ബഹുജനങ്ങളും രംഗത്തിറങ്ങണമെന്ന ആഹ്വാനം ഉൾക്കൊള്ളുന്ന രണ്ടു പ്രമേയങ്ങൾ എസ് എഫ് ഐ അംഗീകരിക്കുകയും ചെയ്തു. ഫാസിസിസത്തിനെതിരെ നടന്ന ജനാധിപത്യസമരങ്ങളെപ്പോലും ക്രൂരമായി വേട്ടയാടുന്ന വർഗ്ഗീയ ഫാസിസ്റ്റുകളുടെ നിലപാടുകൾക്ക് എതിരെയും കേരളത്തിലെ കാമ്പസുകളിൽ എസ് എഫ് ഐ അനേകം പരിപാടികൾ സംഘടിപ്പിച്ചിട്ടുണ്ട്. എസ് എഫ്‌ഐയും അതിന്റെ നയങ്ങളും നിലപാടുകളും പ്രത്യയശാസ്ത്രപരമായി കപടസദാചാര ബോധത്തിന് എതിരാണ്.ഇന്ത്യയിൽ ട്രാൻസ്ജെൻഡേർസിനു ആദ്യമായി മെമ്പർഷിപ്പ് നൽകിയ പ്രസ്ഥാനം SFI ആയിരുന്നു..സംസ്ഥാനത്തു പലയിടങ്ങളിൽ ഉണ്ടായ സദാചാര ക്രൂരതകളെ അതാതു സമയങ്ങളിൽ തുറന്നു കാട്ടുന്ന പ്രതിഷേധ കൂട്ടായ്മകളുംകളും ,സാംസ്‌കാരിക പരിപാടികളും സംഘടിപ്പിക്കാറുള്ള പ്രസ്ഥാനമാണ് SFI.

എന്നാൽ SFI യെ സദാചാരായ ഗുണ്ടകൾ എന്ന് മുദ്രകുത്താൻ നടത്തുന്ന ശ്രമത്തെ അംഗീകരിക്കില്ല..SFI യുമായി ബന്ധമുള്ള ആരെങ്കിലും ഈ വിഷയത്തിൽ ഉണ്ടെങ്കിൽ പരിശോധിക്കുകയും ,നടപടികൾ സ്വീകരിക്കുകയും ചെയ്യും..അപരാധികളെ സംരക്ഷിക്കുകയോ നിരപരാധികളെ ക്രൂശിലേറ്റുകയോ ചെയ്യുന്ന രീതി ഞങ്ങളുടേതല്ല

Friday, February 10, 2017

മുന്നണിയും ഭരണവും

എല്‍ഡിഎഫ് ഭരണം ഏറ്റെടുത്തപ്പോള്‍ ബഹുഭൂരിപക്ഷം ജനങ്ങള്‍ വലിയ ആശയോടും ചെറുന്യൂനപക്ഷം ആശങ്കയോടുമാണ് വീക്ഷിച്ചത്. കഴിഞ്ഞ എട്ടുമാസത്തെ അനുഭവങ്ങള്‍ ബഹുഭൂരിപക്ഷം പുലര്‍ത്തിയ ആശകളെ ശക്തിപ്പെടുത്തുന്നതും ചിലരുടെ ആശങ്കകളെ നിരാകരിക്കുന്നതുമാണ്. നല്ല കാര്യങ്ങള്‍ ജനതാല്‍പ്പര്യത്തിന് അനുസൃതമായി നടപ്പാക്കുന്നതിനാണ് സര്‍ക്കാര്‍ ശ്രമിക്കുന്നത്. യുഡിഎഫിനെ മാറ്റി ഭരണം ഏറ്റെടുത്ത എല്‍ഡിഎഫ് സോഷ്യലിസത്തോട് കൂറുള്ളവരുടേതാണെങ്കിലും ഇന്നത്തെ ഭരണഘടനയ്ക്കുള്ളില്‍ ഒരു സംസ്ഥാന സര്‍ക്കാരിന് അത് നടപ്പാക്കാനാകില്ല. പല കഷ്ടപ്പാടുകളും വികസന മുരടിപ്പും നേരിടുന്ന ജനങ്ങള്‍ക്ക് നല്ല നാളെ പ്രദാനംചെയ്യുന്നതിനുള്ള ഉദ്യമത്തിലാണ് സംസ്ഥാന സര്‍ക്കാര്‍.

കേരളീയര്‍ ആറുപതിറ്റാണ്ടായി കണ്ട സ്വപ്നങ്ങളില്‍ പലതും യാഥാര്‍ഥ്യമാക്കാനുള്ള വിപുലമായ സാധ്യതകളാണ് പിണറായി വിജയന്‍ സര്‍ക്കാര്‍ തുറന്നിരിക്കുന്നത്. നവകേരളമിഷന്‍ അതിനുള്ള നല്ല ചുവടുവയ്പാണ്. നാലുവരിപ്പാത, പ്രകൃതിവാതക പൈപ്പ്ലൈന്‍ തുടങ്ങിയ പശ്ചാത്തലസൌകര്യ വികസനത്തിനും ക്രിയാത്മകമായ നടപടികള്‍ സ്വീകരിക്കുന്നുണ്ട്. ഇതെല്ലാം നിഷ്പ്രയാസം നേടിയെടുക്കാന്‍ കഴിയുന്നതല്ല. മുന്നിലുള്ള തടസ്സങ്ങള്‍ മാറ്റാന്‍ കേരളം ഒത്തൊരുമയോടെ മുന്നോട്ടുപോകേണ്ടതുണ്ട്. അതിന് ഫലപ്രദമായി ഇടപെടാനുള്ള ചുമതല സര്‍ക്കാരിനു മാത്രമല്ല എല്‍ഡിഎഫിനും വിവിധ തലങ്ങളിലെ പ്രാദേശിക ഭരണസമിതികള്‍ക്കും ഭരണപ്രതിപക്ഷ ഭേദമെന്യേ അതിലെ ഓരോ ഘടകകക്ഷികള്‍ക്കുമുണ്ട്.

തിരുവനന്തപുരം ലോ അക്കാദമിയിലെ 29 ദിവസം നീണ്ട സമരം പിന്‍വലിച്ചെങ്കിലും സമര പശ്ചാത്തലത്തില്‍ എല്‍ഡിഎഫില്‍ വിള്ളല്‍വീണുവെന്നും ഭരണനിലനില്‍പ്പിനെ ബാധിക്കുംവിധം സിപിഐ- സിപിഐ എം ബന്ധം വഷളായെന്നും ചില മാധ്യമങ്ങള്‍ നിരീക്ഷണം നടത്തിയിരുന്നു. സിപിഐ എം, സിപിഐ എന്നീ പാര്‍ടികള്‍ സ്വതന്ത്രവ്യക്തിത്വമുള്ള കക്ഷികളാണെങ്കിലും എല്‍ഡിഎഫ് എന്ന രാഷ്ട്രീയമുന്നണിയില്‍ ഘടകകക്ഷികളായത് മാര്‍ക്സിസം ലെനിനിസത്തിന്റെയും വര്‍ഗസമരത്തിന്റെയും കാഴ്ചപ്പാടുകള്‍ ഉള്‍ക്കൊണ്ടുകൊണ്ടാണ്. മാര്‍ക്സിസം-ലെനിനിസത്തിന്റെ അടിസ്ഥാനപ്രമാണംതന്നെ വര്‍ഗസമരമാണ്. അത് ഓരോ രാജ്യത്തും ഓരോതരത്തില്‍ പ്രത്യക്ഷപ്പെടാം. സാമ്രാജ്യത്വവുമായി സഹകരിക്കുന്നതും ഫ്യൂഡലിസവുമായി സന്ധിചെയ്യുന്നതുമായ കുത്തകമുതലാളിവര്‍ഗം ഒരു ഭാഗത്തും തൊഴിലാളികളും ഗ്രാമീണ ദരിദ്രരടക്കമുള്ള അധ്വാനിക്കുന്ന ബഹുജനങ്ങള്‍ മറുവശത്തുമായുള്ള ഏറ്റുമുട്ടലാണ് വര്‍ഗസമരത്തിന്റെ ഇന്നത്തെ രൂപം. കേന്ദ്രത്തിലെയും നല്ലൊരുപങ്ക് സംസ്ഥാനങ്ങളിലെയും ഭരണം കൈയാളുന്ന ആര്‍എസ്എസ് നയിക്കുന്ന ബിജെപിയെന്ന ഭരണവര്‍ഗപാര്‍ടി ബൂര്‍ഷ്വാപാര്‍ടി മാത്രമല്ല ഭൂരിപക്ഷവര്‍ഗീയത വളര്‍ത്തുന്ന അപകടകരമായ വര്‍ഗീയ പ്രസ്ഥാനമാണെന്നും വിലയിരുത്തുന്നു. കമ്യൂണിസ്റ്റുകാര്‍ക്കും മറ്റ് ഇടതുപക്ഷക്കാര്‍ക്കും മാത്രമല്ല ജനാധിപത്യപ്രസ്ഥാനത്തിനാകെയും മതനിരപേക്ഷതയില്‍ വിശ്വസിക്കുന്നവര്‍ക്കും ന്യൂനപക്ഷങ്ങള്‍ക്കും ഭീഷണിയുയര്‍ത്തുന്ന  ഭരണസംവിധാനമായി ബിജെപി ഭരണവും പ്രധാനമന്ത്രി നരേന്ദ്രമോഡിയും മാറിയിരിക്കുകയാണ്. സംഘപരിവാറും കേന്ദ്രഭരണവും ഉയര്‍ത്തുന്ന വിപത്തിനെ ഫലപ്രദമായി തടയണം. അതിന് ജനവിരുദ്ധ രാഷ്ട്രീയനയവും വര്‍ഗീയതയോട് സന്ധിയും പതിവാക്കിയ കോണ്‍ഗ്രസിനെ കൂട്ടുപിടിച്ചതുകൊണ്ട് ഫലമുണ്ടാകില്ല. ഈ രാഷ്ട്രീയ കാഴ്ചപ്പാടാണ് സിപിഐ എമ്മും സിപിഐയും മുന്നോട്ടുവയ്ക്കുന്നത്.

ഇരുകമ്യൂണിസ്റ്റുപാര്‍ടികളുടെയും യോജിപ്പ് കേരളത്തില്‍ മാത്രമല്ല ദേശീയമായും ശക്തിപ്പെട്ടുവരികയാണ്. ആഗോളീകരണ സാമ്പത്തികനയത്തെയും വര്‍ഗീയരാഷ്ട്രീയത്തെയും ചെറുക്കാനുള്ള ഈ ദേശീയനയത്തെ ശക്തിപ്പെടുത്തുന്നതാണ് കേരളത്തിലെ എല്‍ഡിഎഫും അതിന്റെ സര്‍ക്കാരും. കേരളരാഷ്ട്രീയത്തെ പുരോഗമനപരമായി മുന്നോട്ടുകൊണ്ടുപോകുന്നതിന് കരുത്തുപകരുകയാണ് വേണ്ടത്. ഈ വേളയില്‍ എല്‍ഡിഎഫ് സര്‍ക്കാരിനെ അസ്ഥിരപ്പെടുത്താനും അപകീര്‍ത്തിപ്പെടുത്താനും ഒരുഭാഗത്ത് ബിജെപിയും മറുഭാഗത്ത് യുഡിഎഫും പരസ്പരധാരണയോടെ നിലയുറപ്പിച്ച് പരിശ്രമിക്കുകയാണ്. അതിനുള്ള അവസരവും വേദിയുമായി ലോ അക്കാദമി പ്രശ്നത്തെ മാറ്റിയിരുന്നു. ലോ അക്കാദമിയുടെ മറവില്‍ കോണ്‍ഗ്രസും ബിജെപിയും നടത്തിയത് അന്യായമായ സമരാഭാസമായിരുന്നു. വിദ്യാര്‍ഥിസമരത്തെ ആദ്യംതന്നെ ബിജെപിയും ആര്‍എസ്എസും തകിടംമറിച്ചു. അതിന്റെ പ്രകടമായ തെളിവാണ് ബിജെപി നേതാവ് വി മുരളീധരന്റെ നിരാഹാരം. കോണ്‍ഗ്രസ് നേതാവ് കെ മുരളീധരനും അത് പിന്തുടര്‍ന്നു.

അവിടെക്കണ്ട കാഴ്ചയാകട്ടെ വിചിത്രമാണ്. ബിജെപിയോടും ആര്‍എസ്എസിനോടും എത്രമാത്രം മൃദുത്വമാണ് കോണ്‍ഗ്രസ്-മുസ്ളിംലീഗ് കക്ഷികളും അവരുടെ നേതാക്കളും കാണിക്കുന്നതെന്ന് പേരൂര്‍ക്കടയിലെ സമരസ്ഥലത്തെ ഐക്യദാര്‍ഢ്യപ്രകടനങ്ങള്‍ വ്യക്തമാക്കി. എ കെ ആന്റണിയും മുസ്ളിംലീഗ് നേതാവ് ഹൈദരാലി ശിഹാബ് തങ്ങളും കുഞ്ഞാലിക്കുട്ടിയും ബിജെപിയെ ആശിര്‍വദിക്കാനെത്തി. മോഡി സര്‍ക്കാര്‍ സൃഷ്ടിച്ച നോട്ട് പ്രതിസന്ധിക്കെതിരെ എല്‍ഡിഎഫുമായി ചേര്‍ന്ന് സമരം നടത്താന്‍ വിസമ്മതിച്ച വി എം സുധീരനും കോണ്‍ഗ്രസ് നേതാക്കള്‍ക്കും മുസ്ളിംലീഗിനും ബിജെപിയുമായി കൂട്ടുകൂടി സമരം നടത്തുന്നതിന് ഒരു മടിയുമുണ്ടായില്ല. ലോ അക്കാദമി സമരത്തെ ഇക്കൂട്ടര്‍ സംസ്ഥാനസര്‍ക്കാരിനെതിരായ രാഷ്ട്രീയസമരമാക്കി മാറ്റിയിരുന്നു. യഥാര്‍ഥത്തില്‍ ബിജെപി സ്പോണ്‍സര്‍ചെയ്ത സമരത്തിന്റെ പിടിയില്‍ കോണ്‍ഗ്രസ് വീഴുകയായിരുന്നു. ഇത് മനസ്സിലാക്കി നിലപാട് സ്വീകരിക്കാന്‍ എല്‍ഡിഎഫിനെ സ്നേഹിക്കുന്ന എല്ലാവരും തയ്യാറാകണമെന്ന അഭ്യര്‍ഥനയാണ് ഞങ്ങള്‍ നടത്തിയത്.

ലോ അക്കാദമി വിഷയത്തില്‍ ബിജെപി - കോണ്‍ഗ്രസ് നേതൃസംഘങ്ങള്‍ ഓരോ സമയത്തും ഓരോരോ ആവശ്യങ്ങളുന്നയിച്ച് പ്രശ്നം വഷളാക്കുകയായിരുന്നു. ആദ്യം പ്രിന്‍സിപ്പലിനെ ആസ്പദമാക്കിയായിരുന്നു പ്രക്ഷോഭം. വിവാദത്തിന് പാത്രമായ പ്രിന്‍സിപ്പല്‍ അഞ്ചുവര്‍ഷം പ്രിന്‍സിപ്പലായോ അധ്യാപികയായോ കോളേജില്‍ എത്തില്ലെന്നും ഇന്റേണല്‍ മാര്‍ക്ക് ഉള്‍പ്പെടെയുള്ള വിഷയങ്ങളില്‍ വ്യവസ്ഥയുണ്ടാക്കാമെന്നും ഉള്‍പ്പെടെ 17 ആവശ്യങ്ങള്‍ അംഗീകരിച്ചപ്പോഴാണ് എസ്എഫ്ഐ പ്രക്ഷോഭം അവസാനിപ്പിച്ചത്. ഈ ഒത്തുതീര്‍പ്പില്‍ വിശ്വാസമില്ലെന്നും മിനിറ്റ്സ് കാണിക്കണമെന്നും സമരരംഗത്ത് ശേഷിച്ചവര്‍ ആവശ്യപ്പെട്ടപ്പോള്‍  എഡിഎമ്മിന് മുമ്പാകെ മിനിറ്റ്സ് മാനേജ്മെന്റ് ഹാജരാക്കി. ചര്‍ച്ച എഡിഎം നടത്തിയാല്‍ പോര വിദ്യാഭ്യാസമന്ത്രി നടത്തണമെന്ന് ശഠിച്ചപ്പോള്‍ അതിനും വഴങ്ങി. ഫെബ്രുവരി നാലിന് രണ്ടുമണിക്കൂര്‍ നീണ്ട ചര്‍ച്ച വിദ്യാഭ്യാസമന്ത്രി നടത്തി.

എന്നിട്ടും അന്ന് പ്രശ്നം ഒത്തുതീര്‍ക്കുകയും സമരം പിന്‍വലിക്കുകയും ചെയ്യാന്‍ കഴിയാതിരുന്നതുവഴി ബിജെപി ഒരുക്കിയ രാഷ്ട്രീയകെണിയില്‍ മറ്റുള്ളവര്‍ വീഴുകയായിരുന്നു. ഈ സമരത്തിന്റെ മറവില്‍ മുഖ്യമന്ത്രിയെ താറടിക്കാന്‍ നടന്ന ശ്രമം പ്രതിഷേധാര്‍ഹമാണ്. സമരത്തെ ഭൂപ്രശ്നമാക്കി മാറ്റാന്‍ മാത്രമല്ല മുഖ്യമന്ത്രിയുടെ വാക്കുകള്‍ വളച്ചൊടിച്ച് ഇല്ലാത്ത അര്‍ഥം കല്‍പ്പിക്കാനുള്ള ശ്രമവും നടന്നു. പട്ടം താണുപിള്ളയുടെയും പനമ്പള്ളി ഗോവിന്ദമേനോന്റെയും മന്ത്രിസഭാംഗമായിരുന്ന പി എസ് നടരാജപിള്ളയുടെ അച്ഛന്റെ പേരിലുള്ള ഭൂമി സര്‍ സി പിയുടെ ദിവാന്‍ വാഴ്ചയില്‍ രാജഭരണം ഏറ്റെടുത്തതാണ്. ആ ഭൂമി ലോ അക്കാദമിയുടെ ട്രസ്റ്റിന് പതിച്ചുകൊടുത്തത് കെ കരുണാകരന്‍ മുഖ്യമന്ത്രിയായിരിക്കെയാണ്. ഭൂമി പതിച്ചുകൊടുത്ത അച്ഛന്റെ നടപടിക്കെതിരെയാണ് മകന്‍ സമരം നടത്തിയതെന്നത് മുഖ്യമന്ത്രി ചൂണ്ടിക്കാണിച്ചു.

ആറുപതിറ്റാണ്ട് പിന്നിട്ട യുഡിഎഫ് രാഷ്ട്രീയം തകര്‍ച്ചയിലാണ്. ബൂര്‍ഷ്വ- ഫ്യൂഡല്‍ വര്‍ഗങ്ങളെ പ്രതിനിധാനം ചെയ്യുന്ന കോണ്‍ഗ്രസ് നയിക്കുന്ന യുഡിഎഫിന്റെ കെട്ടുപൊട്ടിയിരിക്കുകയാണ്. ഇതില്‍നിന്നു നേട്ടമുണ്ടാക്കാന്‍ ബിജെപി നോക്കുകയാണ്. ഇത് മനസ്സിലാക്കി ബിജെപിയുടെ കളിയെ തുറന്നുകാട്ടാനാകാതെ ആര്‍എസ്എസ് തീര്‍ത്ത കെണിയില്‍ കോണ്‍ഗ്രസും യുഡിഎഫും വീഴുകയായിരുന്നു. എല്‍ഡിഎഫിനെ രാഷ്ട്രീയമായും സംഘടനാപരമായും പ്രതിസന്ധിയിലാക്കാമെന്ന ഉദ്ദേശത്തോടെ ബിജെപിയും യുഡിഎഫും അവരുടെ സമരാഭാസം തുടര്‍ന്നു. പക്ഷേ, ഇക്കൂട്ടരുടെ രാഷ്ട്രീയമോഹം പൂവണിയാന്‍ പോകുന്നില്ലെന്ന് സിപിഐ എം നേതൃത്വം അന്നും ഓര്‍മപ്പെടുത്തിയിരുന്നു. എല്‍ഡിഎഫ് മുന്നണിയില്‍ സിപിഐ എമ്മിനെയും സിപിഐയെയും യോജിപ്പിക്കുന്ന രാഷ്ട്രീയത്തെ അസ്ഥിരമാക്കാന്‍ ലോ അക്കാദമി വിഷയത്തിന് കഴിയില്ല എന്നും ഞങ്ങള്‍ ചൂണ്ടിക്കാട്ടി. അതിപ്പോള്‍ ഞങ്ങളുടെ രാഷ്ട്രീയശത്രുക്കള്‍ക്കും ബോധ്യമായിട്ടുണ്ടെന്ന് കരുതുന്നു. ലോ അക്കാദമി സമരം ബുധനാഴ്ച വിദ്യാഭ്യാസമന്ത്രി നടത്തിയ ചര്‍ച്ചയില്‍ ഒത്തുതീര്‍ക്കാന്‍ സമരത്തില്‍ ശേഷിച്ചവര്‍ നിശ്ചയിച്ചത് വിവേകപൂര്‍ണമായ നടപടിയാണ്. എസ്എഫ്ഐയുമായി മാനേജ്മെന്റ് നേരത്തേയുണ്ടാക്കിയ കരാര്‍ വ്യവസ്ഥകള്‍ പൊതുവില്‍ അംഗീകരിച്ചാണ് ഇപ്പോള്‍ കൂട്ടായി ഒത്തുതീര്‍പ്പുണ്ടായത്. എന്തായാലും വിവേകം വൈകി ഉദിച്ചാലും നല്ലതുതന്നെ.

എല്‍ഡിഎഫ് രൂപംകൊണ്ടതും നിലനില്‍ക്കുന്നതും ഉന്നതമായ രാഷ്ട്രീയവും ജനതാല്‍പ്പര്യവും അടിസ്ഥാനമാക്കിയാണെന്നത് ഞങ്ങള്‍ മാധ്യമശ്രദ്ധയില്‍ കൊണ്ടുവന്നിരുന്നു. 1967 മുതല്‍ 1969വരെ കേരളത്തിലെ ഭരണത്തില്‍ രണ്ട് പാര്‍ടികളും പങ്കാളികളായിരുന്നു. പിന്നീട് രണ്ട് പാര്‍ടികളും അകന്നുപോകുകയും രണ്ടു ചേരിയിലാകുകയും ചെയ്തു. 1969 മുതല്‍ 1979 വരെ ഏതാണ്ട് പത്തുവര്‍ഷം, അതില്‍ അടിയന്തരാവസ്ഥക്കാലമടക്കം ഈ നില തുടര്‍ന്നു. ദേശീയതലത്തിലും കേരളത്തിലും മാറിവന്ന രാഷ്ട്രീയ സ്ഥിതിഗതികള്‍ ഇരുകമ്യൂണിസ്റ്റുപാര്‍ടികളെയും ഐക്യത്തോടെ പ്രവര്‍ത്തിക്കുന്നതിന് അന്തരീക്ഷം സൃഷ്ടിക്കുകയായിരുന്നു. ഈ യോജിപ്പ് ഇന്ത്യന്‍ രാഷ്ട്രടീയത്തെയും കേരള രാഷ്ട്രീയത്തെയും ഉത്തേജിപ്പിക്കുന്നതാണ്. ഇതിനെ ദുര്‍ബലപ്പെടുത്തുന്ന നടപടികള്‍ ഉണ്ടാകാന്‍ പാടില്ലെന്ന പൊതുധാരണ ശക്തിപ്പെടുത്തേണ്ടതുണ്ട്.

ലോ അക്കാദമി സമരവും അനുബന്ധ സംഭവങ്ങളും ജാഗ്രതപ്പെടുത്തുന്ന ചില കാര്യങ്ങളുണ്ട്. അതില്‍ പ്രധാനം എല്‍ഡിഎഫിനെ ഒറ്റപ്പെടുത്താനും മുന്നണിയുടെ ഗവണ്‍മെന്റിനെ അസ്ഥിരപ്പെടുത്താനും കോ-ലീ-ബി കൂട്ടുകെട്ട് ഏത് ഘട്ടത്തിലും പ്രത്യക്ഷപ്പെടാമെന്നതാണ്. ആര്‍എസ്്എസിനോടും ബിജെപിയോടുമുള്ള യുഡിഎഫിന്റെ എതിര്‍പ്പ് തൊലിപ്പുറമേയുള്ളതാണെന്ന് തെളിയിക്കുന്നതാണ് ലോ അക്കാദമി സമരം. ബിജെപിയും കോണ്‍ഗ്രസും മുസ്ളിംലീഗുമെല്ലാം കൈകോര്‍ത്തുപിടിച്ച് മഹാസഖ്യമുണ്ടാക്കിയാലും എല്‍ഡിഎഫിനെ തോല്‍പപ്പിക്കാനും എല്‍ഡിഎഫ് സര്‍ക്കാരിനെ അട്ടിമറിക്കാനും കഴിയില്ലെന്ന് പ്രബുദ്ധകേരളം ആവര്‍ത്തിച്ച് തെളിയിക്കുകയാണ്.

ഇന്നത്തെ ഇന്ത്യന്‍ സാഹചര്യത്തില്‍ കേരളത്തിലെ എല്‍ഡിഎഫ് സര്‍ക്കാര്‍ ഇന്ത്യക്ക് മാതൃകയാണ്. അതിന് ഇടിച്ചില്‍വരുന്ന ഒന്നും മുന്നണിക്കകത്തുനിന്ന് ഉണ്ടാകാന്‍ പാടില്ലായെന്നതാണ് സിപിഐ എം നിലപാട്. രാഷ്ട്രീയവും നയപരവുമായ നിലപാട് എല്‍ഡിഎഫില്‍ ചര്‍ച്ചചെയ്ത് രൂപപ്പെടുത്തുകയും അത് പ്രകാരമുള്ള ഭരണനടപടികള്‍ സര്‍ക്കാര്‍ സ്വീകരിക്കുകയും ചെയ്യുകയെന്നുള്ളതാണ് എല്‍ഡിഎഫ് ശൈലി. ഇതുകൊണ്ടാണ് എല്‍ഡിഎഫ് ഭരണകാലത്ത് ഒരിക്കലും വാളെടുത്തവരെല്ലാം വെളിച്ചപ്പാടുകളാകാത്തത്. യുഡിഎഫ് ഭരണത്തില്‍ ഓരോ മന്ത്രിയും ഓരോ സാമ്രാജ്യമോ ചിലരെല്ലാം മുഖ്യമന്ത്രിമാരോ ആയിട്ടുണ്ട്. എന്നാല്‍, എല്‍ഡിഎഫ് ഭരണത്തില്‍ ഒരു റവന്യൂമന്ത്രിയും ഒരു വിദ്യാഭ്യാസമന്ത്രിയും ഒരു ധനമന്ത്രിയും ഒരു ഗതാഗതമന്ത്രിയും മാത്രമേ ഉണ്ടാകൂ.

അതുപോലെ ഭരണത്തെ നയിക്കാന്‍ ഒറ്റ മുഖ്യമന്ത്രിയും. രാഷ്ട്രീയവും നയപരവും സംഘടനാപരവുമായി കെട്ടുറപ്പുള്ള മുന്നണിയായി എല്‍ഡിഎഫ് മുന്നോട്ടുപോകും. ലോ അക്കാദമിയെ സിപിഐ എം കൈക്കലാക്കാന്‍ പോകുന്നുവെന്ന പ്രചാരണത്തിന്റെ പൊള്ളത്തരം മനസ്സിലാക്കാന്‍ പാഴൂര്‍ പടിപ്പുരവരെ പോകേണ്ടതില്ല. ലോ അക്കാദമിയിലെ ഏതെങ്കിലും അധ്യാപകരുടെയോ അക്കാദമി മാനേജ്മെന്റിന്റെയോ പിഴവുകള്‍ക്കോ കുറ്റങ്ങള്‍ക്കോ ഏറാന്‍മൂളാന്‍ സിപിഐ എമ്മിനെയോ എല്‍ഡിഎഫ് സര്‍ക്കാരിനെയോ കിട്ടില്ല. പക്ഷേ, ബിജെപി-ആര്‍എസ്എസ് യുഡിഎഫ് സമരാഭാസക്കാരുടെ താല്‍പ്പര്യം സംരക്ഷിക്കുന്നതിനുവേണ്ടി ആരെയെങ്കിലും അനാവശ്യമായി ക്രൂശിക്കാനും ഞങ്ങള്‍ കൂട്ടുനില്‍ക്കില്ല. ലോ അക്കാദമി സമരം തീര്‍ന്ന ഘട്ടത്തിലും ഈ നിലപാട് ഞങ്ങള്‍ ആവര്‍ത്തിക്കുകയാണ്

*
കോടിയേരി ബാലകൃഷ്ണന്‍
Friday Feb 10, 2017
(http://www.deshabhimani.com/articles/news-articles-10-02-2017/622739)

Wednesday, February 8, 2017

(ലോ അക്കാദമിയിൽ നിന്ന്) 'മാറി'യവരെ 'മാറ്റി' വിജയാഘോഷം: ഒരു സമരസങ്കട രംഗം

തിരുവനന്തപുരം ലോ അക്കാദമിയിലെ വിദ്യാര്‍ഥിസമരം അവസാനിക്കുകയും ആ സ്ഥാപനത്തിനു മുന്നില്‍ പന്തല്‍കെട്ടി നിരാഹാരംകിടന്ന രണ്ടു രാഷ്ട്രീയനേതാക്കള്‍ എഴുന്നേറ്റുപോവുകയും ചെയ്തത് സമാധാനജീവിതം കാംക്ഷിക്കുന്ന മലയാളികള്‍ക്കെല്ലാം ആശ്വാസംപകരുന്ന അനുഭവമാണ്. വിദ്യാര്‍ഥികള്‍ അവരുടെ പഠനാന്തരീക്ഷം മെച്ചപ്പെടുത്താനും മാനേജ്മെന്റില്‍നിന്ന് നേരിടുന്ന പീഡനത്തിന് അറുതിവരുത്താനുമാണ് ലോ അക്കാദമിക്കു മുന്നില്‍ സമരമാരംഭിച്ചത്.

ഉന്നയിച്ച എല്ലാ ആവശ്യങ്ങളും മാനേജ്മെന്റിനെക്കൊണ്ട് അംഗീകരിപ്പിക്കാന്‍ കഴിഞ്ഞപ്പോള്‍, അവിടെ അനിശ്ചിതകാല നിരാഹാരസമരം നയിച്ചിരുന്ന എസ്എഫ്ഐ പ്രക്ഷോഭം അവസാനിപ്പിച്ചു. എല്ലാ വിദ്യാര്‍ഥികളും പങ്കെടുത്ത ചര്‍ച്ചയില്‍നിന്ന് ഏകപക്ഷീയമായി ഇറങ്ങിപ്പോയും തുടര്‍ചര്‍ച്ചകളില്‍നിന്നു മാറിനിന്നും ചില രാഷ്ട്രീയ ദുഷ്ടശക്തികളുടെ കരുക്കളായിമാറിയ സംഘടനകളാണ് സമരം തുടര്‍ന്നത്. എസ്എഫ്ഐയുമായുണ്ടാക്കിയ ഒത്തുതീര്‍പ്പില്‍ ആരോപണവിധേയയായ പ്രിന്‍സിപ്പലിനെ മാറ്റിനിര്‍ത്തുക, അഞ്ചു വര്‍ഷത്തേയ്ക്ക് അവര്‍ക്ക് ഫാക്കല്‍റ്റിയില്‍പ്പോലും ഇടപെടാന്‍ കഴിയാത്ത വിലക്കേര്‍പ്പെടുത്തുക എന്നതിനു പുറമെ ഇന്റേണല്‍ മാര്‍ക്ക്, ഹോസ്റ്റലിലെ നിയമവിരുദ്ധ നിരീക്ഷണക്യാമറ എന്നിവയുള്‍പ്പെടെയുള്ള പ്രശ്നങ്ങള്‍ക്കാണ് പരിഹാരമായത്.


അന്ന് ചെയര്‍മാന്‍സ്ഥാനത്തുനിന്ന് രാജി പ്രഖ്യാപിച്ചിട്ടില്ലാത്ത മുതിര്‍ന്ന ബിജെപി നേതാവ് അയ്യപ്പന്‍പിള്ള, അക്കാദമി ഡയറക്ടര്‍ നാരായണന്‍നായര്‍ എന്നിവര്‍ ഉള്‍പ്പെടെ മാനേജ്മെന്റിന്റെ നാലു പ്രതിനിധികള്‍ ഒപ്പിട്ടാണ് ഒത്തുതീര്‍പ്പുണ്ടാക്കിയത്.

അതിങ്ങനെ: ജനുവരി 30നും 31നും എസ്എഫ്ഐയുമായി നടത്തിയ ചര്‍ച്ചയുടെ അടിസ്ഥാനത്തില്‍ താഴെ പറയുന്ന തീരുമാനങ്ങള്‍ സ്വീകരിച്ചു.
ജനുവരി 31ന് ഒപ്പിട്ട കരാർ

1. പ്രിന്‍സിപ്പല്‍ ഡോ. ലക്ഷ്മിനായര്‍ സ്ഥാനത്തുനിന്ന് ഒഴിഞ്ഞ് പകരം വൈസ്പ്രിന്‍സിപ്പലിന് ചുമതല നല്‍കിയിരിക്കുന്നു. അഞ്ചുവര്‍ഷത്തേയ്ക്ക് പേരൂര്‍ക്കട ലോ അക്കാദമി ക്യാമ്പസില്‍ ഫാക്കല്‍റ്റിസ്ഥാനത്തുണ്ടാവില്ല.
2. അറ്റന്‍ഡന്‍സ് റിപ്പോര്‍ട്ട് എല്ലാ മാസങ്ങളിലും പ്രസിദ്ധീകരിക്കുന്നതാണ്.
3. ഇന്റേണല്‍, വിഷയം പഠിപ്പിക്കുന്ന അതത് അധ്യാപകര്‍ ആയതിന്റെ ചുമതല വഹിക്കുന്നതും അത് കോളംതിരിച്ച് പ്രത്യകം രേഖപ്പെടുത്തുന്നതുമാണ്.
4. ഇന്റേണല്‍ മാര്‍ക്കുമായി ബന്ധപ്പെട്ട പരാതികള്‍ പരിഹരിക്കുന്നതിന് ഒതു ഏൃശല്മിരല രലഹഹ രൂപീകരിക്കുന്നതും വിദ്യാര്‍ഥികളോടുകൂടി ആലോചിച്ച് മുന്ന് അധ്യാപകരടങ്ങുന്ന സമിതിക്ക് ആയതിന്റെ ചുമതല നല്‍കുന്നതുമാണ്.
5. കോളേജിനകത്തുള്ള പൊതുവായ പ്രശ്നങ്ങള്‍ പരിഹരിക്കുന്നതിന് കോളേജ് യൂണിയന്‍ നോമിനേറ്റ്ചെയ്യുന്ന ഒരു വനിതയടക്കം രണ്ടു വിദ്യാര്‍ഥിപ്രതിനിധകള്‍ ഉള്‍ക്കൊള്ളുന്ന കോളേജ് കൌണ്‍സില്‍ രൂപീകരിക്കും.
6. സമരവുമായി ബന്ധപ്പെട്ട് വിദ്യാര്‍ഥികള്‍ക്കുനേരെ ഒരു നടപടിയും സ്വീകരിക്കുന്നതല്ല.
7. മൂട്ട് കോര്‍ട്ട്, ചേമ്പര്‍ വര്‍ക്ക്, കോര്‍ട്ട് വര്‍ക്ക് തുടങ്ങിയ സമരത്തോടനുബന്ധിച്ച് മുടങ്ങിയിട്ടുള്ള അക്കാദമിക് പ്രവര്‍ത്തനങ്ങള്‍ ഉടന്‍തന്നെ പുനരാരംഭിക്കുന്നതാണ്.
8. ഹോസ്റ്റലിനകത്ത് ഒരു മുതിര്‍ന്ന അധ്യാപികയുടെ അധ്യക്ഷതയില്‍ വാര്‍ഡനും മറ്റൊരു അധ്യാപികയും ഹോസ്റ്റല്‍ വിദ്യാര്‍ഥിനി പ്രതിനിധികള്‍ ഉള്‍പ്പെടുന്ന ഒരു കമ്മിറ്റി രൂപീകരിക്കുന്നതാണ്. ഹോസ്റ്റല്‍ വിദ്യാര്‍ഥികളുടെ പ്രശ്നങ്ങള്‍ ഈ കമ്മിറ്റിയുടെ മേല്‍നോട്ടത്തില്‍ വിദ്യാര്‍ഥിനികളുടെ അഭിപ്രായരൂപീകരണത്തിലൂടെ ഹോസ്റ്റലിന് ഒരു നിയമാവലി (ഞൌഹല മിറ ഞലഴൌഹമശീിേ) തയ്യാറാക്കും.
9. ഹോസ്റ്റലിലെ നിയമനിര്‍മാണത്തിനും ഭേദഗതിക്കുമുള്ള പൂര്‍ണ അധികാരം സമിതിക്കായിരിക്കും.
10. ന്യായമായ ആവശ്യങ്ങള്‍ക്ക് വാര്‍ഡന്റെ സമ്മതത്തില്‍ മാത്രം പുറത്തുപോകാനുള്ള അനുമതി
11. ലേഡീസ് ഹോസ്റ്റല്‍ പരിസരത്ത് സ്റ്റേഡിയത്തിലും വൈകിട്ട് ആറുവരെ കളിക്കാനുള്ള സ്വാതന്ത്യ്രം ലേഡീസ് ഹോസ്റ്റല്‍ അന്തേവാസികള്‍ക്കുണ്ടായിരിക്കുന്നതാണ്.
12. എല്ലാ അകാദമിക് ആക്ടിവിറ്റീസ്, ലൈബറി, എന്‍എസ്എസ് അടക്കം പ്രോഗ്രാമുകളില്‍ ആണ്‍കുട്ടികള്‍ക്കും പെണ്‍കുട്ടികള്‍ക്കും തുല്യ പ്രാതിനിധ്യം.
13. ഒന്നാംവര്‍ഷ അഡ്മിഷന്‍ പൂര്‍ത്തിയാക്കി ഒരു മാസത്തിനകം കോളേജ് യൂണിയന്‍ തെരഞ്ഞെടുപ്പ് നടത്തും.
14. സര്‍വകലാശാലയുടെ നിര്‍ദേശമനുസരിച്ചായിരിക്കും ക്യാമറകളുടെ പ്രവര്‍ത്തനം.
15. പിടിഎ രൂപീകരിക്കുന്നതാണ്.
16. കോളേജില്‍ നടക്കുന്ന സെമിനാറുകള്‍ക്ക് ഹോസ്റ്റല്‍ വിദ്യാര്‍ഥിനികളില്‍നിന്നും നിര്‍ബന്ധിത ഫീസ് ഈടാക്കുന്നതല്ല.
17. മൂട്ട് കോര്‍ട്ട് അംഗങ്ങള്‍ക്കും ഹോസ്റ്റല്‍ വിദ്യാര്‍ഥികള്‍ ഉള്‍പ്പെടെ വിദ്യാര്‍ഥികള്‍ക്കും രാഷ്ട്രീയപ്രവര്‍ത്തനസ്വാതന്ത്യ്രം അനുവദിക്കാവുന്നതാണ്. മൂട്ട് കോര്‍ട്ട് ക്ളയിന്റ് കണ്‍സള്‍ട്ടിങ് മത്സരങ്ങള്‍ക്കായി വനിതാ ഹോസ്റ്റല്‍ റൂം ഒഴിയുന്നവര്‍ക്ക് മൂട്ട് കോര്‍ട്ടില്‍ സഹായിച്ചതായി പരിഗണിച്ച് ആയതിന്റെ ആനുകൂല്യം നല്‍കുന്നതായിരിക്കും.

സാധാരണനിലയില്‍ ഈ ഒത്തുതീര്‍പ്പിനപ്പുറം ഒരു സമരവും പ്രസക്തമല്ല. ഒരു വിദ്യാര്‍ഥിസമരത്തിന്റെ സ്വപ്നതുല്യമായ വിജയമെന്നുപോലും വിശേഷിപ്പിക്കാവുന്ന ഈ ഒത്തുതീര്‍പ്പ് അംഗീകരിക്കാന്‍ പക്ഷെ കെഎസ്യു, എബിവിപി, എംഎസ്എഫ്, എഐഎസ്എഫ് എന്നീ സംഘടനകള്‍ തയ്യാറായില്ല. സമരവിജയത്തിന്റെ നേട്ടം എസ്എഫ്ഐക്കു ലഭിക്കരുതെന്നു തീരുമാനിച്ചുറപ്പിച്ച നീക്കങ്ങളാണ് പിന്നീടുണ്ടായത്.

ഇതിനിടയില്‍ ബിജെപി നേതാവ് വി മുരളീധരന്‍ പൊടുന്നനെ രംഗപ്രവേശം ചെയ്ത് 48 മണിക്കൂര്‍ നിരാഹാരസമരം പ്രഖ്യാപിച്ചത് തലസ്ഥാനജില്ലയില്‍ തന്റെ സാന്നിധ്യം അറിയിക്കുക എന്ന ലക്ഷ്യത്തോടെയായിരുന്നു. 48 മണിക്കൂര്‍ പിന്നിട്ടപ്പോള്‍, ആ സമരം അനിശ്ചിതകാലത്തേക്കാണെന്ന പ്രഖ്യാപനമുണ്ടായി. ചിത്രത്തില്‍ ഇല്ലാതിരുന്ന വട്ടിയൂര്‍ക്കാവ് എംഎല്‍എ കെ മുരളീധരനും പിന്നാലെ നിരാഹാരസമരവുമായെത്തി. ഓരോ ദിവസവും സമരമുദ്രാവാക്യങ്ങള്‍ മാറി. ഒത്തുതീര്‍പ്പിനായുള്ള എല്ലാ ശ്രമങ്ങളും ബോധപൂര്‍വം പരാജയപ്പെടുത്തി. മാനേജ്മെന്റ് സ്ഥാനത്തുനിന്നു നീക്കിയ പ്രിന്‍സിപ്പലിന്റെ രാജി’ആവശ്യ
പ്പെട്ടുള്ള സമരമെന്ന ദുഷ്പ്പേര്, സംഘടിതവും ആസൂത്രിതവുമായ പ്രചാരണത്തിലൂടെ മാറ്റിയെടുക്കാനായി പിന്നത്തെ ശ്രമം. ഏഷ്യാനെറ്റ് ന്യൂസ് ആണ് സമരത്തെ വഴിതിരിച്ചുവിടാനുള്ള ശ്രമങ്ങള്‍ക്ക് നേതൃത്വംനല്‍കിയത്. അതിന്റെ വാര്‍ത്താവതാരകന്‍ ബിജെപി സമരപ്പന്തലിലെ സ്ഥിരസന്ദര്‍ശകനായി. ബിജെപി അജന്‍ഡയ്ക്കനുസരിച്ച് ചാനല്‍ചര്‍ച്ചകള്‍ രൂപപ്പെട്ടു.

സമരം അവസാനിപ്പിക്കാന്‍ തിരുവനന്തപുരം എഡിഎം ചര്‍ച്ചയ്ക്കു വിളിച്ചു. പ്രിന്‍സിപ്പലിനെ നീക്കിയ മാനേജ്മെന്റ് തീരുമാനത്തിന്റെ മിനിട്സ് കിട്ടിയാല്‍ തങ്ങള്‍ സമരം അവസാനിപ്പിക്കാമെന്നാണ് സമരനേതൃത്വം ആ ചര്‍ച്ചയില്‍ പഞ്ഞത്. പിറ്റേന്ന് മിനിട്സ് ഹാജരാക്കിയപ്പോള്‍ എഡിഎമ്മുമായി ചര്‍ച്ചയില്ലെന്നായി. വിദ്യാഭ്യാസമന്ത്രി ചര്‍ച്ചയ്ക്കു വിളിക്കണമെന്ന് സിപിഐ നേതാവ് ബിനോയ വിശ്വം ആവശ്യപ്പെട്ടു. സര്‍ക്കാര്‍ അതംഗീകരിച്ചു. വിദ്യാഭ്യാസമന്ത്രി വിളിച്ച ചര്‍ച്ചയില്‍, പ്രിന്‍സിപ്പലിനെ മാറ്റുന്നതടക്കമുള്ള ഉറപ്പുകള്‍ ആവര്‍ത്തിച്ചപ്പോള്‍, മന്ത്രിയെത്തന്നെ അവഹേളിക്കാനായി ശ്രമം. ഏകപക്ഷീയമായി സംഘടനകള്‍ ചര്‍ച്ച അവസാനിപ്പിച്ചു. പിന്നീട് അക്രമത്തിന്റെ വഴിയായി. ആത്മഹത്യാഭീഷണിനാടകവും മരംകയറലും. അതിനിടെ, നിരാഹാര സമരപ്പന്തലില്‍നിന്ന് രാത്രി വി മുരളീധരന്‍ വാഹനത്തില്‍ക്കയറി പോകുന്നതിന്റെ ദൃശ്യങ്ങള്‍ പുറത്തുവന്നത് ബിജെപിയെ നാണംകെടുത്തി. മുരളീധരനു പകരം സമരമാരംഭിച്ച വി വി രാജേഷ് ആഗ്രഹിച്ച പിന്തുണ ലഭിച്ചുമില്ല.

ലോ അക്കാദമി വിഷയത്തില്‍ കലാപമഴിച്ചുവിട്ട് സംസ്ഥാനത്തെ അശാന്തിയിലേക്കു നയിക്കാനുള്ള ശ്രമമാണ് പിന്നീട് അരങ്ങേറിയത്. അതിന്റെ ഭാഗമായിരുന്നു ഫെബ്രുവരി ഏഴിന്റെ നാടകങ്ങള്‍. ആസൂത്രിതമായി ആക്രമണം നടത്തുക, പൊലീസിനെക്കൊണ്ട് ബലം പ്രയോഗിപ്പിക്കുക, സംസ്ഥാനവ്യാപകമായി വിദ്യാഭ്യാസബന്ദ് നടത്തുക. ഈ പദ്ധതി നടപ്പാക്കുന്നതിനിടെയാണ് അക്രമം കണ്ടുനിന്ന വയോധികന്‍ കുഴഞ്ഞുവീണ് മരിച്ചത്. വിദ്യാര്‍ഥികളും രക്ഷാകര്‍ത്താക്കളും‘ഭയവിഹ്വലരായി. ഇനി തുടര്‍ന്നാല്‍ സമരം തകരുമെന്നു മാത്രമല്ല, പ്രത്യാഘാതം ഗുരുതരമാകുമെന്ന ബോധ്യവും അവരിലുണ്ടായി. അതിന്റെ ഫലമാണ്, ഏതുവിധേനയും സമരം അവസാനിപ്പിച്ച് തടിയൂരണമെന്ന തീരുമാനത്തില്‍ അവരെ എത്തിച്ചത്.
വിഷമസന്ധിയില്‍പ്പെട്ട സമരക്കാരെ പരിഹസിക്കാനോ പ്രകോപിപ്പിക്കാനോ അല്ല, സമരം ഒത്തുതുര്‍പ്പിലെത്തിക്കുന്നതിന് മുന്‍കൈയെടുക്കാന്‍ തന്നെയാണ് സംസ്ഥാന സര്‍ക്കാര്‍ എന്നിട്ടും തയ്യാറായത്. ഫെബ്രുവരി എട്ടിന് വിദ്യാഭ്യാസമന്ത്രി മാനേജ്മെന്റിനെയും സമരരംഗത്തുണ്ടായിരുന്ന എല്ലാ സംഘടനകളെയും ചര്‍ച്ചയ്ക്കു വിളിച്ചു.

അതിന്റെ തീരുമാനമായി പ്രസിദ്ധീകരണത്തിനു നല്‍കിയ രേഖയില്‍ ഇങ്ങനെ പറയുന്നു:
ഫെബ്രുവരി 8 ലെ കരാർ

‘’കേരള ലോ അക്കാദമി ലോ കോളേജ് പ്രിന്‍സിപ്പല്‍ ലക്ഷ്മി നായരെ ഗവേണിങ്ങ് കൌണ്‍സില്‍ തീരുമാനപ്രകാരം പ്രിന്‍സിപ്പല്‍സ്ഥാനത്തുനിന്നു മാറ്റി. സര്‍വകലാശാല നിയമപ്രകാരം എല്ലാ യോഗ്യതകളുമുള്ള ഒരു പ്രിന്‍സിപ്പലിനെ നിശ്ചയിക്കുന്നതിന് ബഹു. വിദ്യാഭ്യാസമന്ത്രിയുടെ സാന്നിധ്യത്തില്‍ ചേര്‍ന്ന വിദ്യാര്‍ഥി പ്രതിനിധികളും മാനേജ്മെന്റ് പ്രതിനിധികളുമായി നടന്ന ചര്‍ച്ചയില്‍ തീരുമാനിച്ചു. മാനേജ്മെന്റ് ഈ ഉറപ്പില്‍നിന്നു വ്യതിചലിച്ചാല്‍ സര്‍ക്കാര്‍ ഇടപെടുന്നതുമായിരിക്കും. രേഖയില്‍ വിദ്യാര്‍ഥി പ്രതിനിധികള്‍ക്കുപുറമെ മാനേജ്മെന്റിനുവേണ്ടി ഡയറക്ടര്‍ അടക്കം രണ്ടുപേര്‍ ഒപ്പിട്ടിട്ടുണ്ട്. ഈ യോഗം ചേരുന്ന ദിവസത്തെ പ്രമുഖ പത്രങ്ങളില്‍ ലോ അക്കാദമിയുടെ ഒരു പരസ്യവുമുണ്ട്. തലക്കെട്ട്: കേരള ലോ അക്കാദമി ലോ കോളേജ് പ്രിന്‍സിപ്പല്‍നിയമനം അപേക്ഷകള്‍ ക്ഷണിക്കുന്നു’എന്ന്.
ഫെബ്രുവരി 7 പത്ര പരസ്യം
ലക്ഷ്മി നായരെ ഗവേണിങ് കമ്മിറ്റി തീരുമാനപ്രകാരം പ്രിന്‍സിപ്പല്‍സ്ഥാനത്തുനിന്നു മാറ്റി എന്ന രേഖയാണ് സമരവിജയമായും എസ്എഫ്ഐയുടെ പിന്മാറ്റത്തിനു’തെളിവായും സമരനേതാക്കളും അവര്‍ക്ക് സമസ്ത പിന്തുണയുമായി രംഗത്തുവന്ന ഏതാനും മാധ്യമങ്ങളും ചുണ്ടിക്കാട്ടുന്നത്. ആ ഗവേണിങ് കമ്മിറ്റി ചേര്‍ന്നത് എസ്എഫ്ഐയുമായി ഒത്തുതീര്‍പ്പുണ്ടാക്കുന്നതിനു മുമ്പായിരുന്നു. അതുകഴിഞ്ഞ് ചെയര്‍മാന്‍ അയ്യപ്പന്‍പിള്ള രാജി പ്രഖ്യാപിച്ചു. വിദ്യാര്‍ഥിസമരം അവസാനിപ്പിക്കാന്‍ മാനേജ്മെന്റ് തയ്യാറാകാത്തതില്‍ പ്രതിഷേധിച്ചുള്ള ആ രാജിപ്രഖ്യാപനത്തിനുശേഷം പ്രത്യേകിച്ചൊന്നും സംഭവിച്ചിട്ടില്ല. എസ്എഫ്ഐ സമരം നടത്തി നേടിയ അവകാശങ്ങളും ആവശ്യങ്ങളുമല്ലാതെ ഒന്നും ആരും നേടിയിട്ടുമില്ല.
ഫെബ്രുവരി 6 സിൻഡിക്കേറ്റ് തീരുമാനം

എസ്എഫ്ഐ വിജയിപ്പിച്ച സമരമാണ്, രാഷ്ട്രീയ അവിശുദ്ധസഖ്യത്തിലേക്കും കലാപത്തിലേക്കും തല്‍പ്പരകക്ഷികള്‍ വലിച്ചിഴച്ചത്. പാമ്പാടി കോളേജിലെ വിഷ്ണുവിന്റെ ദുരൂഹമരണത്തില്‍ തങ്ങള്‍ക്കുള്ള പ്രതിഷേധം പ്രകടിപ്പിക്കാന്‍ വിദ്യാര്‍ത്ഥികളെ അനുവദിക്കാത്തിടത്തുനിന്നാണ് സമരം ആരംഭിച്ചത് കോളേജ് മാനേജുമെന്റിന്റെ പിടിവാശി വിദ്യാര്‍ത്ഥികളെ സമരത്തിലേക് നയിച്ചു. ആ സമരം പിന്നീട് സംസ്ഥാനത്തെ പിടിച്ചുലയ്ക്കുന്ന ഒന്നാക്കി വളരുകയായിരുന്നു. കോളേജുമാനേജുമെന്റും പ്രിന്‍സിപ്പലും ജനാധിപത്യ മര്യാദകള്‍ കാറ്റില്‍പറത്തുകയും വിദ്യാര്‍ത്ഥികളോട് ആശാസ്യമല്ലാത്തത്ത രീതിയില്‍ പെരുമാറുകയും ചെയ്തതിനെതിരെ ഉയര്‍ന്ന വികാരം പിന്നീട് വഴിതിരിച്ച് വിദ്യാര്‍ഥികളെയും അവരുടെ ആവശ്യങ്ങളെയും അരുക്കാക്കി വിവാദ വ്യവസായികളും രാഷ്ട്രീയ കുബുദ്ധികളും ഏറ്റെടുക്കുകയാണുണ്ടായത്.

സ്വാശ്രയ കൊള്ളയ്ക്കെതിരെയും സ്വാശ്രയ സ്ഥാപനങ്ങളിലെ മനുഷ്യത്വഹീനമായ നടപടികള്‍ക്കെതിരെയും ഉയര്‍ന്നുവരേണ്ട പൊതുസമരത്തെ ദുര്‍ബലപ്പെടുത്താന്‍ ആസൂത്രിതമായി ചില കേന്ദ്രങ്ങള്‍ ശ്രമിച്ചതിന്റെ ഫലംകൂടിയാണ്, ലോ അക്കാദമിയില്‍ മാത്രം സമരത്തെ തളയ്ക്കാനുണ്ടായ ആവേശം. അത്തരം കുതന്ത്രങ്ങളോ ലോ അക്കാദമിപോലുള്ള സ്ഥാപന മാനേജ്മെന്റുകളുടെ വിദ്യാര്‍ഥിവിരുദ്ധ സമീപനമോ വാഴിക്കുന്ന നാടല്ല കേരളം എന്ന സന്ദേശമാണ് ഈ സമരത്തിന്റേത്. എസ്എഫ്ഐയുടെ സമരവിജയം അംഗീകരിക്കാന്‍ മടിക്കുന്നവര്‍ക്കും ഈ വസ്തുതകളൊന്നും തള്ളിക്കളയാനാവില്ല.

പി എം മനോജ്

(http://www.deshabhimani.com/special/law-academy-strike/622432)

Tuesday, February 7, 2017

ലോ അക്കാദമി : മന്ത്രിയെ പഴിചാരുന്നത് മറ്റൊന്നും പറയാനില്ലാതെ

തിരുവനന്തപുരം > ലോ അക്കാദമി ലോ കോളേജ് സമരവുമായി ബന്ധപ്പെട്ട് വിദ്യാഭ്യാസ മന്ത്രി സി രവീന്ദ്രനാഥിനെതിരെ വാളോങ്ങുന്നത് മറ്റൊന്നും പറയാനില്ലാതായപ്പോള്‍. മന്ത്രി അല്‍പ്പംകൂടി മനസ്സ് വച്ചിരുന്നെങ്കില്‍ ഞായറാഴ്ച നടന്ന ചര്‍ച്ചയില്‍ സമരം തീരുമായിരുന്നുവെന്നാണ് കോണ്‍ഗ്രസ് പ്രവര്‍ത്തക സമിതി അംഗം എ കെ ആന്റണി യുഡിഎഫ് കണ്‍വന്‍ഷനില്‍ കുറ്റപ്പെടുത്തിയത്. മറ്റു ചില കേന്ദ്രങ്ങളും ഇതേ വാദവുമായി രംഗത്തു വന്നതും യഥാര്‍ഥ വസ്തുതകള്‍ മറച്ചുവയ്ക്കാനാണ്.

വിദ്യാര്‍ഥി സമരത്തില്‍ ഉന്നയിച്ച ആവശ്യങ്ങള്‍ക്കെല്ലാം പരിഹാരമുണ്ടായിട്ടും ചര്‍ച്ചയില്‍ അവര്‍ ഉന്നയിച്ച നിര്‍ദേശങ്ങള്‍ അംഗീകരിച്ചിട്ടും ചര്‍ച്ച അലങ്കോലപ്പെടുത്തിയത് ഒരുവിഭാഗം വിദ്യാര്‍ഥി സംഘടനാ പ്രതിനിധികളാണ്. ഇത് മൂടിവച്ച് മന്ത്രിയെ കുറ്റപ്പെടുത്തി തടിതപ്പാനാണ് ശ്രമം. മന്ത്രി പരമാവധി ശ്രമിച്ചാണ് ധാരണയിലെത്തുന്നിടത്തേക്ക് കാര്യങ്ങള്‍ എത്തിയത്. അപ്പോള്‍ പൊടുന്നനെ എല്ലാം അട്ടിമറിച്ചത് ഒരു വിദ്യാര്‍ഥി സംഘടനാ നേതാവിന്റെ ദുര്‍വാശിയാണെന്ന് എല്ലാവര്‍ക്കും ബോധ്യമായതാണ്. എന്നിട്ടും രാഷ്ട്രീയ മുതലെടുപ്പ് മാത്രം ലക്ഷ്യമിട്ട് കോണ്‍ഗ്രസും ബിജെപിയും മന്ത്രിയെ പഴിചാരുന്നുവെന്ന് മാത്രം.

വിദ്യാര്‍ഥി സംഘടനകളുമായി നടത്തിയ ചര്‍ച്ചയുടെ വിശദാംശങ്ങളും വസ്തുതകളും പരിശോധിക്കുന്ന ഏതൊരാള്‍ക്കും മന്ത്രി യാഥാര്‍ഥ്യ ബോധത്തോടെയും ഗുണപരമായുമാണ് ഇടപെട്ടതെന്ന് വ്യക്തമാണ്. പ്രിന്‍സിപ്പലായിരുന്ന ലക്ഷ്മി നായരെ നീക്കിയിട്ടും അവര്‍ രാജിവയ്ക്കണമെന്നായിരുന്നു ചില സംഘടനകളുടെ ആവശ്യം. അതിനു കാരണമായി പറഞ്ഞത് ലക്ഷ്മി നായരെ നീക്കിയതിന് വിശ്വാസ്യതയില്ലെന്നാണ്. തിരുവനന്തപുരം എഡിഎം നടത്തിയ ചര്‍ച്ചയുടെ തുടര്‍ച്ചയായാണ് ഞായറാഴ്ച തന്റെ ചേംബറില്‍ മാനേജ്മെന്റ്, വിദ്യാര്‍ഥി പ്രതിനിധികളുടെ ചര്‍ച്ച നടന്നത്. എഡിഎമ്മുമായി ചര്‍ച്ച നടത്തിയാല്‍ പോരെന്നും മന്ത്രി തന്നെ ചര്‍ച്ച നടത്തണമെന്നും ചില കേന്ദ്രങ്ങളില്‍നിന്ന് ആവശ്യപ്പെട്ടതനുസരിച്ചാണ് ഇത്.

ലക്ഷ്മി നായരെ നീക്കിയതിന്റെ മിനിറ്റ്സ് കാണണമെന്നായിരുന്നു എഡിഎമ്മുമായി നടത്തിയ ചര്‍ച്ചയില്‍ ഒരുവിഭാഗം വിദ്യാര്‍ഥി സംഘടനകളുടെ ആവശ്യം. എസ്എഫ്ഐക്ക് മാത്രം എഴുതിക്കൊടുത്തതില്‍ വിശ്വാസമില്ലെന്ന് പറഞ്ഞായിരുന്നു ഇത്. മാനേജ്മെന്റ് മിനിറ്റ്സ് ഹാജരാക്കിയപ്പോഴാണ് എഡിഎമ്മുമായി ചര്‍ച്ചയ്ക്കില്ല, മന്ത്രിയുമായി ചര്‍ച്ച വേണമെന്ന ആവശ്യമുയര്‍ന്നത്. ഈ ചര്‍ച്ചയാണ് വിവാദമാക്കുന്നത്. മന്ത്രിതല ചര്‍ച്ചയില്‍ പ്രിന്‍സിപ്പലിനെ നീക്കിയ മിനിറ്റ്സ് സംഘടനാ പ്രതിനിധികളെ മാനേജ്മെന്റ് പ്രതിനിധികള്‍ കാണിച്ചു. അപ്പോഴാണ് പകരം പ്രിന്‍സിപ്പലിന്റെ ചുമതല നല്‍കിയ വൈസ് പ്രിന്‍സിപ്പലിന് യോഗ്യത ഇല്ലെന്ന് വിമര്‍ശനമുന്നയിച്ചത്. അങ്ങനെയെങ്കില്‍ സര്‍വകലാശാല മാനദണ്ഡപ്രകാരം പുതിയ പ്രിന്‍സിപ്പലിനെ നിയമിക്കണമെന്ന് മന്ത്രിയെന്ന നിലയില്‍ മാനേജ്മെന്റിനോട് ആവശ്യപ്പെട്ടു. ഈ ആവശ്യം മാനേജ്മെന്റ് അംഗീകരിച്ചു. സര്‍വകലാശാലാ മാനദണ്ഡ പ്രകാരം പുതിയ പ്രിന്‍സിപ്പലിനെ നിയമിക്കുന്നതിനുള്ള വിജ്ഞാപനം പുറപ്പെടുവിക്കാമെന്നും മാനേജ്മെന്റ് സമ്മതിച്ചു.

അവിടെ തീരേണ്ടതായിരുന്നു സമരം. തുടര്‍ന്ന് സംസാരിച്ച കെഎസ്യു ഉള്‍പ്പെടെയുള്ള സംഘടനകള്‍ ഈ നിര്‍ദേശം അംഗീകരിക്കുകയും ചെയ്തു. അപ്പോഴാണ് ഒരു വിദ്യാര്‍ഥി സംഘടനാ പ്രതിനിധി ചര്‍ച്ച വഴിതിരിച്ചുവിട്ടത്്. ഈ പ്രതിനിധി അപമര്യാദയായി പെരുമാറിയിട്ടും മന്ത്രി സംയമനം പാലിക്കുകയും സമരം ഒത്തുതീര്‍ക്കാന്‍ പരമാവധി ഇടപെടുകയും ചെയ്തു. ഒരു സംഘടന മാത്രം വാശി തുടര്‍ന്നപ്പോള്‍ എസ്എഫ്ഐ ഒഴിച്ചുള്ള മറ്റു സംഘടനകളും അവരോടൊപ്പം നില്‍ക്കാന്‍ നിര്‍ബന്ധിതരാകുകയായിരുന്നു.

രണ്ടു മണിക്കൂറിലധികമാണ് ചര്‍ച്ച നടത്തിയത്. എന്നിട്ടും ഈ സംഘടനകള്‍ വഴങ്ങിയില്ല. തുടര്‍ന്നാണ് യോഗം അവസാനിപ്പിച്ചതായി മന്ത്രി അറിയിച്ചത്. ഉദ്യോഗസ്ഥരും മാനേജ്മെന്റ് പ്രതിനിധികളും പോയശേഷവും ചില വിദ്യാര്‍ഥി സംഘടനാ പ്രതിനിധികള്‍ മന്ത്രിയുടെ ചേംബറില്‍ ഇരുന്ന് ബഹളമുണ്ടാക്കാനാണ് ശ്രമിച്ചത്. ഇതൊന്നും കാണാതെ ഗൂഢരാഷ്ട്രീയ താല്‍പ്പര്യങ്ങള്‍ക്ക് വളംവച്ചുകൊടുക്കുന്ന പ്രതികരണമാണ് ചില കേന്ദ്രങ്ങളില്‍ നിന്നുമുണ്ടായത്.

ലക്ഷ്‌മി നായരുടെ ബിരുദ യോഗ്യത സംബന്ധിച്ച് അന്വേഷണം നടത്തും; ലോ അക്കാദമിയുടെ അഫിലിയേഷന്‍ റദ്ദാക്കണമെന്ന ആവശ്യം സിന്‍ഡിക്കേറ്റ് തള്ളി

തിരുവനന്തപുരം > ലോ അക്കാദമി ലോ കോളേജ് മുന്‍ പ്രിന്‍സിപ്പാള്‍ ലക്ഷ്മി‌ നായരുടെ ബിരുദ യോഗ്യത സംബന്ധിച്ച് അന്വേഷണം നടത്താന്‍ കേരളസര്‍വകലാശാല തീരുമാനം. ലക്ഷ്മി നായരുടെ എല്‍എല്‍ബി ബിരുദം സംബന്ധിച്ച് പ്രത്യേക പരീക്ഷാ സമിതി അന്വേഷിക്കുവാന്‍ തിങ്കളാഴ്ച ചേര്‍ന്ന സിന്‍ഡിക്കേറ്റ് യോഗം തീരുമാനിച്ചു. ഒരേ സമയം കേരള സര്‍വകലാശാലയില്‍ നിന്ന് എല്‍എല്‍ബി ബിരുദവും ആന്ധ്രയിലെ സര്‍വകലാശാലയില്‍ നിന്ന് പിജി ബിരുദവും നേടി എന്നാണ് ആരോപണം. ഇക്കാര്യത്തിലാണ് സിന്‍ഡിക്കറ്റ് ഉപസമിതി പ്രത്യേക അന്വേഷണം നടത്തുക.

ലോ അക്കാദമി  അഫിലിയേഷന്‍ റദ്ദാക്കണമെന്ന യുഡിഎഫ് അംഗങ്ങളുടെ പ്രമേയം സിന്‍ഡിക്കേറ്റ് വോട്ടിനിട്ട് തള്ളി. ആകെ എട്ട് അംഗങ്ങളാണ് അഫിലിയേഷന്‍ റദ്ദാക്കുന്നതിനെ അനുകൂലിച്ചത്. സിപിഐഎം നോമിനികളായ സിന്‍ഡിക്കറ്റ് അംഗങ്ങളും  സര്‍ക്കാര്‍ പ്രതിനിധികളും അഫിലിയേഷന്‍ റദ്ദാക്കണമെന്ന പ്രമേയത്തെ എതിര്‍ത്തു. സിപിഐ അംഗം യുഡിഎഫിന് അനുകൂലമായി വോട്ട് ചെയ്തു.

ഭാവി മരുമകള്‍ക്ക് മാര്‍ക്ക് ദാനം നടത്തിയ സംഭവം സിന്‍ഡിക്കറ്റ് ഉപസമിതി അന്വേഷിക്കാനും തീരുമാനമായിട്ടുണ്ട്.  മാര്‍ക്ക് ക്രമക്കേട് അന്വേഷിക്കാന്‍ പരീക്ഷാ സ്റ്റാന്‍ഡിംഗ് കമ്മിറ്റിയെയാണ് സര്‍വകലാശാല സിന്‍ഡിക്കറ്റ് ചുമതലപ്പെടുത്തിയത്. സിന്‍ഡിക്കറ്റ് യോഗം അവസാനിച്ചതിന് പിന്നാലെ കെഎസ് യു, എഐഎസ്എഫ് എംഎസ്എഫ്പ്രവര്‍ത്തകര്‍ സര്‍വകലാശാല ആസ്ഥാനത്തേക്ക് തള്ളിക്കയറി ബഹളം വെച്ചു.

ലക്ഷ്മി നായരെ പ്രിന്‍സിപ്പാള്‍ സ്ഥാനത്ത് നിന്നും നീക്കിയെന്ന് കാണിച്ച് ലോ അക്കാദമി മാനേജ്മെന്റ് രേഖാമൂലം നല്‍കിയ കത്ത് കേരള യൂണിവേഴ്സിറ്റി സിന്‍ഡിക്കേറ്റ് തിങ്കളാഴ്ച അംഗീകരിച്ചു. പുതിയ പ്രിന്‍സിപ്പാളിനെ നിയമിക്കാന്‍ സിന്‍ഡിക്കേറ്റ് യോഗം മാനേജ്മെന്റിനോട് ആവശ്യപ്പെടുകയും ചെയ്തു.

ലോ അക്കാദമി സമരം : ഓരോ ദിവസം ഓരോ ആവശ്യം; പിന്നില്‍ ബാഹ്യശക്തികള്‍

എം രഘുനാഥ്

തിരുവനന്തപുരം > ലോ അക്കാദമി ലോ കോളേജിന് മുന്നിലെ സമരക്കാര്‍ ആവശ്യങ്ങള്‍ അടിക്കടി മാറ്റുന്നതിനുപിന്നില്‍ ബാഹ്യശക്തികളുടെ സമ്മര്‍ദം. ഉന്നയിക്കുന്ന ആവശ്യങ്ങള്‍ അംഗീകരിക്കപ്പെടുമ്പോള്‍ പുതിയത് ഉയര്‍ത്തി വഴുതിമാറുന്നവരെ നിയന്ത്രിക്കുന്നത് രാഷ്ട്രീയലക്ഷ്യങ്ങളോടെ പ്രവര്‍ത്തിക്കുന്ന ഈ ബാഹ്യശക്തികള്‍. ഞായറാഴ്ച വിദ്യാഭ്യാസമന്ത്രി വിളിച്ചുചേര്‍ത്ത ചര്‍ച്ച അലങ്കോലമാക്കിയതും മുഖ്യമന്ത്രി പിണറായി വിജയന്‍ കോഴിക്കോട്ട് നടത്തിയ വാര്‍ത്താസമ്മേളനത്തിന്റെപേരില്‍ ആശയക്കുഴപ്പമുണ്ടാക്കുന്നതും ഇതേ ഗൂഢശക്തികളാണ്.

പാമ്പാടി നെഹ്റുകോളേജ് വിദ്യാര്‍ഥി ജിഷ്ണുവിന്റെ മരണത്തെത്തുടര്‍ന്ന് ജനുവരി ഒമ്പതിന് കോളേജില്‍ എസ്എഫ്ഐ ക്യാമ്പയിന്‍ നടത്തിയിരുന്നു. 11ന് കെഎസ്യുവും എഐഎസ്എഫും പ്രകടനത്തിന് അനുമതി തേടിയെങ്കിലും ലഭിച്ചില്ല. അതിനെതിരെയായിരുന്നു അവരുടെ സമരം. അപ്പോഴൊന്നും ഈ സംഘടനകള്‍ പ്രിന്‍സിപ്പല്‍ രാജിവയ്ക്കണമെന്ന ആവശ്യം ഉന്നയിച്ചില്ല. കോളേജ് ഭരിക്കാനറിയാത്ത പ്രിന്‍സിപ്പല്‍ രാജിവയ്ക്കുക, അല്ലെങ്കില്‍ പുറത്താക്കുക എന്നതുള്‍പ്പെടെ 17 ആവശ്യങ്ങള്‍ ഉന്നയിച്ച് എസ്എഫ്ഐ നിരാഹാരസമരം തുടങ്ങി. അതിനിടെ, സിന്‍ഡിക്കറ്റ് ഉപസമിതി തെളിവെടുപ്പ് നടത്തി തയ്യാറാക്കിയ റിപ്പോര്‍ട്ടിന്റെ അടിസ്ഥാനത്തില്‍  ലക്ഷ്മിനായരെ അഞ്ചുവര്‍ഷത്തേക്ക് ഡീബാര്‍ ചെയ്തു. യൂണിവേഴ്സിറ്റി സ്റ്റാറ്റ്യൂട്ട് പ്രകാരമുള്ള പരമാവധി ശിക്ഷ നല്‍കി.

തുടര്‍ന്ന് വിദ്യാര്‍ഥിസംഘടനകളുമായി നടത്തിയ ചര്‍ച്ചയ്ക്കൊടുവിലാണ് പ്രിന്‍സിപ്പലിനെ മാറ്റാന്‍ മാനേജ്മെന്റ് നിര്‍ബന്ധിതമായത്. പ്രിന്‍സിപ്പല്‍സ്ഥാനത്തുനിന്ന് മാറ്റുമെങ്കിലും ഫാക്കല്‍റ്റിയായി തുടരുമെന്നായിരുന്നു മാനേജ്മെന്റ് നിലപാട്. ഇതംഗീകരിക്കില്ലെന്ന് എസ്എഫ്ഐ വ്യക്തമാക്കി. അഞ്ചുവര്‍ഷത്തേക്ക് മാറ്റണമെന്ന് മറ്റ് സംഘടനകളും ആവശ്യപ്പെട്ടു. അഞ്ചുവര്‍ഷത്തേക്ക് അധ്യാപികയായിപോലും വരില്ലെന്നതുള്‍പ്പെടെ എസ്എഫ്ഐ ഉന്നയിച്ച 17 ആവശ്യങ്ങളും അംഗീകരിച്ചതോടെ എസ്എഫ്ഐ സമരം പിന്‍വലിച്ചു. എന്നാല്‍ വഴുതിമാറിയ മറ്റ് സംഘടനകള്‍ പ്രിന്‍സിപ്പല്‍ രാജിവയ്ക്കണമെന്നായി. മാനേജ്മെന്റ് നീക്കിയ പ്രിന്‍സിപ്പല്‍ രാജിവയ്ക്കേണ്ടതില്ലെന്ന് ചൂണ്ടിക്കാണിക്കപ്പെട്ടപ്പോള്‍ എസ്എഫ്ഐക്ക് കൊടുത്ത ഉറപ്പില്‍ വിശ്വാസമില്ലെന്നും മിനിറ്റ്സ് കാണണമെന്നും ആവശ്യമുയര്‍ന്നു. മാനേജ്മെന്റ് മിനിറ്റ്്സ് ഹാജരാക്കിയപ്പോള്‍ ചര്‍ച്ച എഡിഎം നടത്തിയാല്‍ പോരാ, മന്ത്രിതന്നെ വേണമെന്നായി. നേരത്തെ മന്ത്രി നടത്തിയ ചര്‍ച്ച അലങ്കോലമാക്കിയ സംഘംതന്നെയാണ് വീണ്ടും മന്ത്രി ചര്‍ച്ചനടത്തണമെന്ന് ആവശ്യമുന്നയിച്ചത്.

ഞായറാഴ്ച മന്ത്രി നടത്തിയ ചര്‍ച്ചയില്‍ പ്രിന്‍സിപ്പലിനെ നീക്കിയുള്ള മിനിറ്റ്സ് മാനേജ്മെന്റ് കാണിച്ചപ്പോള്‍ പകരം ചുമതല കൊടുത്തയാള്‍ക്ക് യോഗ്യത ഇല്ലെന്നായി. അങ്ങനെയെങ്കില്‍ പുതിയ പ്രിന്‍സിപ്പലിനെ നിയമിക്കണമെന്ന മന്ത്രിയുടെ ആവശ്യം മാനേജ്മെന്റ് അംഗീകരിച്ചു. അപ്പോഴാണ് അതൊന്നും പോരാ രാജിതന്നെ വേണമെന്ന് ഒരു സംഘടനമാത്രം നിലപാടെടുത്തത്. ഈ സംഘടനയുടെ പ്രതിനിധി അപമര്യാദമായി പെരുമാറിയിട്ടും മന്ത്രി സംയമനം പാലിച്ചു. ചര്‍ച്ച അവസാനിപ്പിച്ചശേഷവും മന്ത്രിയുടെ ചേംബറില്‍ ബഹളംവച്ചു. തുടര്‍ന്നാണ് മന്ത്രി യോഗം ബഹിഷ്കരിച്ചെന്ന കഥ മെനഞ്ഞത്.
ലോ അക്കാദമി ഭൂമിവിഷയത്തിലും ബാഹ്യശക്തികള്‍ ഇതേ കള്ളക്കളി തുടരുന്നു.  നടരാജപിള്ളയുടെ കുടുംബം ഭൂമി തിരിച്ചുനല്‍കണമെന്ന് ആവശ്യപ്പെട്ടിട്ടുണ്ടല്ലോ എന്ന ചോദ്യത്തിന് മറുപടിയാണ് മുഖ്യമന്ത്രി പിണറായി വിജയന്‍ കോഴിക്കോട്ട് വാര്‍ത്താസമ്മേളനത്തില്‍ നല്‍കിയത്. ഭൂമി തിരിച്ചുനല്‍കുന്നതിന്റെ നിയമതടസ്സമാണ് സൂചിപ്പിച്ചത്. ഒരു പിള്ളയുടെ ഭൂമി  എന്ന പരാമര്‍ശത്തിനും അടുത്ത ദിവസംതന്നെ വിശദീകരണം നല്‍കി. എന്നിട്ടുംകുത്തിത്തിരിപ്പ് തുടരുകയാണ്.

സര്‍ സി പിയുടെ കാലത്താണ് ഭൂമി കണ്ടുകെട്ടിയത്. സിപിഐ നേതാവ് എം എന്‍ ഗോവിന്ദന്‍നായര്‍ കൃഷിമന്ത്രിയായിരിക്കെ ഭൂമി ലോ അക്കാദമി ട്രസ്റ്റിന് പാട്ടത്തിന് നല്‍കി. പിന്നീട് കോണ്‍ഗ്രസ് പിന്തുണയോടെ സിപിഐ നേതാവ് സി അച്യുതമേനോന്‍ മുഖ്യമന്ത്രിയായിരിക്കെ പാട്ടക്കാലാവധി 30 വര്‍ഷമാക്കി. കെ കരുണാകരന്‍ മുഖ്യമന്ത്രിയായിരിക്കെ കമ്പോളവില കണക്കാക്കി ഭൂമി പതിച്ചുനല്‍കി പട്ടയഭൂമിയാക്കി. അത് തിരിച്ചുപിടിക്കുന്നതിലെ നിയമതടസ്സങ്ങള്‍ ആര്‍ക്കും അറിയാത്ത കാര്യമല്ല. വിദ്യാര്‍ഥികള്‍ നേരിടുന്ന എല്ലാ പ്രശ്നങ്ങള്‍ക്കും പരിഹാരമായിട്ടും പുതിയ ആവശ്യങ്ങളും ഭൂമിപ്രശ്നവും ഉന്നയിച്ച് പുകമറ സൃഷ്ടിച്ച് തുടരുന്ന സമരത്തിലെ അജന്‍ഡ എല്‍ഡിഎഫ് സര്‍ക്കാരിനെ താറടിക്കല്‍മാത്രം.

കെഎസ്ആര്‍ടിസി: പകല്‍ക്കൊള്ളയുടെ പിന്നാമ്പുറങ്ങള്‍

കെഎസ്ആര്‍ടിസി ഇന്നത്തെ അവസ്ഥയിലെത്തിയതിന് നിരവധി കാരണങ്ങളുണ്ട്.  മൂലധനവിഹിതത്തിന്റെ അഭാവത്തില്‍ കടമെടുത്ത് ബസുകള്‍ വാങ്ങിയതും ബസ്സ്റ്റേഷനുകള്‍ നിര്‍മിച്ചതും അതില്‍പ്പെടും. സര്‍ക്കാര്‍ പ്രഖ്യാപിച്ച യാത്രാസൌജന്യങ്ങളുടെ ബാധ്യതമുഴുവന്‍ സ്വയം പേറേണ്ടിവരുന്നതുമൂലമുണ്ടാകുന്ന കടഭാരവുമുണ്ട്. ജനങ്ങളുടെ ആവശ്യം പരിഗണിച്ച് വരുമാനം കണക്കിലെടുക്കാതെ ഓടിക്കേണ്ടിവരുന്ന സര്‍വീസുകള്‍ മുഖേനയുണ്ടാകുന്ന നഷ്ടം ഇതിനു പുറമെയാണ്. 1984ല്‍ രാഷ്ട്രീയതീരുമാനമെന്ന നിലയില്‍ സര്‍ക്കാര്‍ പ്രഖ്യാപിച്ച പെന്‍ഷന്‍ കൊടുക്കാനുള്ള ബാധ്യതയും കെഎസ്ആര്‍ടിസിയുടെ ചുമലില്‍. (പ്രതിമാസം 20 കോടി രൂപവീതം യുഡിഎഫ് സര്‍ക്കാരും 27.5 കോടി രൂപ എല്‍ഡിഎഫ് സര്‍ക്കാരും നല്‍കിവരുന്നു. കഴിഞ്ഞ ഒരുവര്‍ഷമായാണ് ഈ സഹായം ലഭിക്കുന്നത്). ഇതിനെല്ലാമുപരി മാനേജ്മെന്റുതലത്തില്‍ തുടര്‍ന്നുവരുന്ന കെടുകാര്യസ്ഥത സ്ഥാപനത്തിന്റെ പതനത്തിന്റെ മുഖ്യ കാരണങ്ങളിലൊന്നായി കണക്കാക്കണം. നിയമപരമായി സ്വയംഭരണ സ്ഥാപനമാണെങ്കിലും സര്‍ക്കാരിന്റെ പൂര്‍ണനിയന്ത്രണത്തിനും നിര്‍ദേശത്തിനും വിധേയമായി പ്രവര്‍ത്തിക്കേണ്ടിവരുന്ന കോര്‍പറേഷനെന്ന നിലയില്‍ സര്‍ക്കാരിന്റെ നയമാണ് കെഎസ്ആര്‍ടിസിയിലും പ്രതിഫലിക്കുക. ഭരണത്തെ അഴിമതിയുടെ മേച്ചില്‍പ്പുറങ്ങളാക്കാന്‍ കച്ചകെട്ടിയ സര്‍ക്കാരുകള്‍ കെഎസ്ആര്‍ടിസിയെയും അതിനായി ഉപയോഗിക്കുക സ്വാഭാവികം. യുഡിഎഫ് സര്‍ക്കാരുകള്‍ കെഎസ്ആര്‍ടിസിയെയും ഈ ദിശയില്‍ പരമാവധി പ്രയോജനപ്പെടുത്തി. ഇതും കോര്‍പറേഷന്റെ ഇപ്പോഴത്തെ അവസ്ഥയ്ക്ക് നിദാനമായ കാരണങ്ങളിലൊന്നാണ്.

കെഎസ്ആര്‍ടിസിയെ രക്ഷിക്കാനുള്ള ആത്മാര്‍ഥശ്രമം പലതവണയുണ്ടായിട്ടുണ്ട്. എല്‍ഡിഎഫ് സര്‍ക്കാരുകള്‍മാത്രമാണ് ഇക്കാര്യത്തില്‍ സഹായകരമായ നിലപാട് സ്വീകരിച്ചത്. പക്ഷേ, ഭരണത്തുടര്‍ച്ചയില്ലായ്മ കാര്യങ്ങള്‍ വീണ്ടും അവതാളത്തിലാക്കി. ഈ അവസ്ഥയില്‍നിന്ന് സ്ഥാപനത്തെ കരകയറ്റി മാതൃകാപരമായി പ്രവര്‍ത്തിക്കുന്ന പൊതുമേഖലാ സ്ഥാപനമാക്കി മാറ്റുമെന്ന് എല്‍ഡിഎഫ് സര്‍ക്കാര്‍ വാഗ്ദാനംചെയ്തിട്ടുണ്ട്. അതിനുള്ള നിര്‍ദേശം സമര്‍പ്പിക്കാന്‍ മാനേജ്മെന്റ് വിദഗ്ധനായ സുശീല്‍ഖന്നയെ സര്‍ക്കാര്‍ നിയോഗിച്ചു. മുന്‍കാലങ്ങളില്‍ ചെയ്തതുപോലെ ഇക്കുറിയും കെഎസ്ആര്‍ടി എംപ്ളോയീസ് അസോസിയേഷന്‍ കെഎസ്ആര്‍ടിസിയെ കടത്തിന്റെ നിലയില്ലാകയത്തില്‍നിന്ന് രക്ഷിക്കാനും സ്വന്തംകാലില്‍നില്‍ക്കുന്ന സ്ഥാപനമാക്കി മാറ്റാനും സ്വീകരിക്കേണ്ട നടപടി സംബന്ധിച്ച നിര്‍ദേശങ്ങള്‍ സ്വന്തം നിലയിലും ആര്‍ഹനുമന്തറാവു എന്ന പ്രശസ്ത ട്രാന്‍സ്പോര്‍ട്ട് വിദഗ്ധനെ ഉപയോഗപ്പെടുത്തിയും തയ്യാറാക്കി സര്‍ക്കാരിനു സമര്‍പ്പിച്ചിട്ടുണ്ട്.

2011 മെയില്‍ എല്‍ഡിഎഫ് സര്‍ക്കാര്‍ അധികാരമൊഴിയുമ്പോള്‍ കെഎസ്ആര്‍ടിസിയുടെ പ്രതിമാസ കടം ഏകദേശം 26 കോടിരൂപ. 2006ല്‍ എല്‍ഡിഎഫ് അധികാരമേല്‍ക്കുമ്പോള്‍ ഉണ്ടായിരുന്ന 78 കോടിരൂപയുടെ പ്രതിമാസകടമാണ് 26 കോടിയായി കുറച്ചത്. കേരളത്തിലെ പൊതുഗതാഗതരംഗത്ത് കേവലം 13 ശതമാനമായിരുന്ന കെഎസ്ആര്‍ടിസി പ്രാതിനിധ്യം 27 ശതമാനമായി ഉയര്‍ത്താന്‍ എല്‍ഡിഎഫ് സര്‍ക്കാരിന് കഴിഞ്ഞു. ഈ പ്രാതിനിധ്യം പടിപടിയായി 50 ശതമാനമാക്കി ഉയര്‍ത്തുമെന്ന് ആ സര്‍ക്കാര്‍ വാഗ്ദാനം ചെയ്തിരുന്നുവെന്നതും സ്മരണീയമാണ്. 2011ല്‍ ഉണ്ടായിരുന്ന 27 ശതമാനം പ്രാതിനിധ്യം 20 ശതമാനത്തില്‍ താഴെയാക്കുകയാണ് പിന്നീട് വന്ന യുഡിഎഫ് ചെയ്തത്.

അഴിമതിയുടെ മേച്ചില്‍പ്പുറങ്ങള്‍

2011ല്‍ ഉണ്ടായിരുന്ന അഭിമാനകരമായ അവസ്ഥയില്‍നിന്ന് ഇപ്പോഴത്തെ പരിതാപകരമായ നിലയിലേക്ക് കെഎസ്ആര്‍ടിസിയെ എത്തിച്ചതിന്റെ പൂര്‍ണ ഉത്തരവാദിത്തം തിരുവഞ്ചൂര്‍ രാധാകൃഷ്ണന്‍ ഉള്‍പ്പെടെയുള്ള യുഡിഎഫ്നേതൃത്വത്തിനാണ്. ദേശസാല്‍കൃത റൂട്ടുകള്‍ സ്വകാര്യവല്‍ക്കരിക്കാനുള്ള തീരുമാനത്തിനു പിന്നില്‍ സ്വര്‍ണനാണയങ്ങളുടെ കിലുകിലാരവമായിരുന്നുവെന്ന് ആര്‍ക്കാണറിയാത്തത്!  ടഠഅഠ മുതല്‍ സുപ്രീംകോടതിവരെ നെടുനാള്‍ നീണ്ട നിയമയുദ്ധത്തിലൂടെ കെഎസ്ആര്‍ടിഇഎ (സിഐടിയു) നേടിയെടുത്ത ദേശസാല്‍കൃത റൂട്ടുകള്‍ കെഎസ്ആര്‍ടിസിക്കുമാത്രം അവകാശപ്പെട്ടതാണെന്ന വിധിയാണ് ഒറ്റ ഉത്തരവിലൂടെ തിരുവഞ്ചൂര്‍ അട്ടിമറിച്ചത്. കോടതിവിധികളുടെയും പ്രക്ഷോഭങ്ങളുടെയും ഫലമായി  കെഎസ്ആര്‍ടിസിക്കുമാത്രമായി മാറ്റിവയ്ക്കപ്പെട്ട സൂപ്പര്‍ക്ളാസ് സര്‍വീസുകള്‍ സ്വകാര്യമേഖലയ്ക്ക് കൈമാറാന്‍ ഉത്തരവിറക്കിയതും അസോസിയേഷന്‍ ഫയല്‍ചെയ്ത കേസില്‍ പ്രസ്തുത ഉത്തരവ് നിയമവിരുദ്ധമാണെന്ന ഹൈക്കോടതിവിധി മറികടക്കാന്‍ ആ റൂട്ടുകളില്‍ യഥേഷ്ടം സ്വകാര്യ ലിമിറ്റഡ് സ്റ്റോപ് ഓര്‍ഡിനറി സര്‍വീസുകള്‍ അനുവദിച്ചതും തിരുവഞ്ചൂരായിരുന്നു.
അന്തര്‍സംസ്ഥാന സര്‍വീസുകള്‍ ദേശസാല്‍ക്കരിക്കപ്പെട്ടതാണെന്ന കോടതിവിധി അസോസിയേഷന്‍ കേസ് നടത്തി നേടിയെടുത്തതാണ്. അതിനെ ചോദ്യംചെയ്തുള്ള കേസില്‍ ഹാജരാകാതെ സ്വകാര്യമുതലാളിമാര്‍ക്ക് അനുകൂല വിധിയുണ്ടാക്കാന്‍ അരുനിന്നത് തിരുവഞ്ചൂര്‍ മുന്‍കൈ എടുത്ത് നിയമനം നല്‍കിയ കെഎസ്ആര്‍ടിസിയുടെ നിയമവിഭാഗം മേധാവിയാണ്. കെഎസ്ആര്‍ടിസിക്കു മാത്രമായി യാത്രക്കൂലി കുറച്ചതും,  കെഎസ്ആര്‍ടിസി ബസുകളില്‍മാത്രം വിദ്യാര്‍ഥികള്‍ക്ക് പൂര്‍ണമായും സൌജന്യം അനുവദിച്ചതും അതിന്റെ ബാധ്യത കോര്‍പറേഷന്‍തന്നെ വഹിക്കണമെന്ന് ആജ്ഞാപിച്ചതും അദ്ദേഹമായിരുന്നു.

ഭരണതല അഴിമതി

കെഎസ്ആര്‍ടിസി തൊഴിലാളികളുടെ സ്ഥലംമാറ്റത്തിലും മറ്റ് ഡ്യൂട്ടികള്‍ (അദര്‍ഡ്യൂട്ടി) അനുവദിക്കുന്നതിലും ഉള്‍പ്പെടെ യുഡിഎഫ് ഭരണകാലത്ത് നടന്ന അഴിമതികള്‍ അന്വേഷണവിധേയമാക്കേണ്ടതാണ്. 10,000 രൂപയും ഭരണകക്ഷി നേതാവുമുണ്ടെങ്കില്‍ എവിടേക്കും സ്ഥലംമാറ്റം എന്നതായി കെഎസ്ആര്‍ടിസിയിലെ നിയമം. ഏറാന്‍മൂളികളെ വിജിലന്‍സിന്റെ തലപ്പത്ത് പ്രതിഷ്ഠിച്ച് അച്ചടക്കനടപടികളും അഴിമതിക്കുള്ള അവസരമാക്കി മാറ്റി. ലീഗല്‍ അസിസ്റ്റന്റ് ഇന്റര്‍വ്യൂ സമയത്ത് നിയമത്തില്‍ ബിരുദാനന്തരബിരുദമുണ്ടെന്ന് സത്യവാങ്മൂലം നല്‍കി ബോണസ് മാര്‍ക്ക് വാങ്ങി നിയമനം തരപ്പെടുത്തുകയും നാളിതുവരെ സര്‍ട്ടിഫിക്കറ്റ് ഹാജരാക്കാതിരിക്കുകയും ചെയ്തയാളിന് ബിസിനസ് മാനേജ്മെന്റില്‍ ബിരുദാനന്തര ബിരുദം വേണ്ട എക്സിക്യൂട്ടീവ് ഡയറക്ടര്‍ തസ്തികയില്‍ പ്രസ്തുത ബിരുദം ഇല്ലാതിരുന്നിട്ടും പോസ്റ്റിങ് നല്‍കാന്‍ നിര്‍ബന്ധം പിടിച്ചത് തിരുവഞ്ചൂരായിരുന്നല്ലോ.

മന്ത്രി കല്‍പ്പിക്കുന്നതെന്തും അണുവിട വ്യത്യാസമില്ലാതെ ആ ഉദ്യോഗസ്ഥര്‍ നടപ്പാക്കുകയും അഴിമതിയുടെ കൂടാരമായി കെഎസ്ആര്‍ടിസിയെ മാറ്റുകയും ചെയ്തു. കെഎസ്ആര്‍ടിസിക്കുവേണ്ടി ഹൈക്കോടതിയില്‍ ഉള്‍പ്പെടെ കേസ് നടത്തുന്നതും കെഎസ്ആര്‍ടിസിക്കെതിരെ കേസ് നടത്തുന്നതും ഇയാളാണെന്ന അപൂര്‍വ ബഹുമതിക്കും സ്ഥാപനം സാക്ഷ്യംവഹിച്ചു. മൊട്ടുസൂചികള്‍മുതല്‍ ബസുകള്‍വരെ വാങ്ങിയതിലുണ്ടായ അഴിമതി ഞങ്ങള്‍ ചൂണ്ടിക്കാട്ടിയതാണ്. ഒരന്വേഷണവും ഉണ്ടായില്ല. അഴിമതി നടത്തിയതില്‍ ചിലര്‍ ലാവണമൊഴിഞ്ഞു. മറ്റ് ചിലര്‍ പൂര്‍വാധികം ശക്തിമാന്മാരായി ഇപ്പോഴും കെഎസ്ആര്‍ടിസിയിലുണ്ട്.

ബസ് വാങ്ങിയാലും ഇല്ലെങ്കിലും കോഴ

യുഡിഎഫ് ഭരണത്തില്‍ സമയബന്ധിതമായി ബസുകള്‍ പുറത്തിറക്കാനുള്ള ഒരു നടപടിയും സ്വീകരിച്ചില്ല. അതിന്റെ ഫലമായി രണ്ടു ദോഷങ്ങളാണുണ്ടായത്. (1) വാഹനസഞ്ചയം നവീകരിക്കപ്പെട്ടില്ല. അത് കാര്യക്ഷമതയെ പ്രതികൂലമായി ബാധിച്ചു. സര്‍വീസ് റദ്ദാക്കല്‍ വര്‍ധിക്കുന്നതിലേക്കാണ് ഇത് നയിച്ചത്. (2) സ്ക്രാപ്പ് ചെയ്യപ്പെട്ട ബസുകള്‍ക്ക് പകരം പുതിയ ബസുകള്‍ ഓടിക്കാന്‍ കഴിഞ്ഞില്ല. അതിന്റെ ഫലമായും സര്‍വീസ് റദ്ദാക്കല്‍ വ്യാപകമായുണ്ടായി. ഇങ്ങനെ റദ്ദാക്കപ്പെടുന്ന റൂട്ടുകളില്‍ സ്വകാര്യബസുകള്‍ നിര്‍ബാധം ഓടി. അതിന് പ്രത്യേക പാരിതോഷികം മന്ത്രിമന്ദിരത്തിലും ഭരണകക്ഷി നേതാക്കളുടെ വീടുകളിലും എത്തി, വണ്ടി വാങ്ങാത്തതിനു ലഭിച്ച കോഴ!

പരിമിതമായി ബസുകള്‍ വാങ്ങിയപ്പോഴാകട്ടെ പര്‍ച്ചേസ് മാന്വലിലെ വ്യവസ്ഥ ലംഘിച്ചു. ഓണ്‍ലൈന്‍ ടെന്‍ഡര്‍ എന്ന വ്യവസ്ഥ പാലിക്കപ്പെട്ടില്ല. മാത്രമല്ല, കൂടുതല്‍ കാര്യക്ഷമത തെളിയിച്ച കമ്പനിയെ മനഃപൂര്‍വം ഒഴിവാക്കുകയും കെഎസ്ആര്‍ടിസിക്ക് വന്‍ ബാധ്യത വരുത്തിയതുമൂലം കരിമ്പട്ടികയില്‍പ്പെടുത്താന്‍ ആലോചിച്ച ഒരു പ്രത്യേക കമ്പനിയില്‍നിന്ന് ബസ് വാങ്ങാന്‍ തീരുമാനിക്കുകയുംചെയ്തു. ഇതിലും വന്‍ അഴിമതിയുണ്ട്. അയ്യായിരത്തി എണ്ണൂറിലധികം ഷെഡ്യൂളുകളുള്ള ഒരു ട്രാന്‍സ്പോര്‍ട്ട് കമ്പനി ഏതാനും ലക്ഷ്വറി ബസുകള്‍ വാങ്ങുന്നതിനെ ആരും കുറ്റംപറയുകയില്ല, എന്നുമാത്രമല്ല അത് ആവശ്യമാണുതാനും. എന്നാല്‍, 'ഇല്ലാത്ത റൂട്ടിനുവേണ്ടി വല്ലാത്ത വിലയുള്ള ബസുകള്‍ വാങ്ങുക' എന്ന പ്രതിഭാസം കെഎസ്ആര്‍ടിസിയിലല്ലാതെ മറ്റെങ്ങുമുണ്ടാകില്ല. കേരളത്തില്‍നിന്ന് മുംബൈ, ഗോവ, ഹൈദരാബാദ്, തിരുപ്പതി തുടങ്ങിയ സ്ഥലങ്ങളിലേക്ക് ഓടിക്കാനായി 20 കോടി രൂപ കൊടുത്ത് 10 സ്കാനിയ ബസ് വാങ്ങിയത് ഈ റൂട്ടുകളിലേക്കുള്ള പെര്‍മിറ്റുകളെക്കുറിച്ച് ആലോചിക്കുന്നതിനുമുമ്പാണ്. കേരളത്തിന് തമിഴ്നാടും കര്‍ണാടകവുമായി മാത്രമേ ബസുകളോടിക്കുന്ന റൂട്ടുകള്‍ സംബന്ധിച്ച അന്തര്‍സംസ്ഥാന കരാറുള്ളൂ.

ആന്ധ്ര, തെലുങ്കാന, ഗോവ, മഹാരാഷ്ട്ര എന്നീ സംസ്ഥാനങ്ങളുമായി കരാറുണ്ടാക്കാതെ അവിടേക്ക് ബസുകള്‍ ഓടിക്കാന്‍ കഴിയുകയില്ലെന്നതൊന്നും മന്ത്രിയെയും കെഎസ്ആര്‍ടിസി മാനേജ്മെന്റിനെയും തെല്ലും അലോസരപ്പെടുത്തിയില്ല. സ്വന്തക്കാരനെത്തന്നെ ഇടനിലക്കാരനാക്കി ബസുകള്‍ വാങ്ങി. കമീഷന്‍ കൃത്യമായി കീശയിലെത്തി. ബസ് വാങ്ങിക്കഴിഞ്ഞാണ് ഓടിക്കാന്‍ റൂട്ട് പെര്‍മിറ്റ് വേണമെന്നറിയുന്നത്.  അന്തര്‍സംസ്ഥാന കരാറുകളുണ്ടാക്കാന്‍ കടമ്പകളേറെയുണ്ടെന്നും അന്യസംസ്ഥാനങ്ങളില്‍ ബസോടിക്കുന്ന അതേ ദൂരം തിരിച്ച് കേരളത്തിലേക്കും ബസോടിക്കാന്‍ ബന്ധപ്പെട്ട സംസ്ഥാനത്തിന് അനുമതി നല്‍കണമെന്നും കമീഷന്‍ കൈപ്പറ്റുന്ന തത്രപ്പാടിനിടയില്‍ അധികാരികള്‍ ഓര്‍ത്തില്ല. ഫലമോ ബസുകള്‍ മാസങ്ങളോളം വര്‍ക്ഷോപ്പുകളില്‍ വിശ്രമിച്ചു. 15 ശതമാനം പലിശക്ക് കടംവാങ്ങിയ പണമുപയോഗിച്ച് വാങ്ങിയ ബസുകളാണ് തിരുവനന്തപുരം നഗരത്തില്‍ ഇങ്ങനെ കടല്‍ക്കാറ്റേറ്റ് നശിക്കാന്‍ അനുവദിച്ചത്. ഒടുവില്‍ അസോസിയേഷന്‍ പ്രക്ഷോഭവുമായെത്തിയപ്പോഴാണ് നിലവില്‍ കരാറുള്ള കര്‍ണാടകത്തിലേക്കും കേരളത്തിലെ ഇതര സ്ഥലങ്ങളിലേക്കും ഈ ബസുകള്‍ ഓടിച്ചത്.

(അവസാനിക്കുന്നില്ല)

കെ കെ ദിവാകരന്‍
Tuesday Feb 7, 2017
(http://www.deshabhimani.com/articles/ksrtc/621932)