പൊറുക്കാനാവാത്ത നുണപ്രചാരണം

ഒരു രാഷ്ട്രീയപാര്‍ടിക്കും അതിന്റെ നേതൃത്വത്തിനുമെതിരെ സര്‍വപരിധിയും ലംഘിച്ചു നടക്കുന്ന ആക്രമണത്തിനാണ് കേരളം വേദിയാകുന്നതെന്ന്, സിപിഐ എം സംസ്ഥാന സെക്രട്ടറിയുടേതെന്ന പേരില്‍ കൊട്ടാരസദൃശമായ വീടിന്റെ ചിത്രം നാടെങ്ങും പ്രചരിപ്പിച്ചതിലൂടെ ഒരിക്കല്‍ക്കൂടി തെളിഞ്ഞിരിക്കുന്നു. ആവര്‍ത്തിച്ചുള്ള പ്രചാരണത്തിലൂടെയും ഉറപ്പിക്കലുകളിലൂടെയും വ്യാജ നിര്‍മിതികളിലൂടെയും എങ്ങനെ ഒരു നുണയെ ദുഷ്ടരാഷ്ട്രീയമായി ഉപയോഗിക്കാം എന്നാണ് 'പിണറായിയുടെ വീട്' വിവാദത്തില്‍ വ്യക്തമാകുന്നത്.

ആദ്യം അപ്രധാനമായ ഒരു പത്രത്തില്‍ പിണറായി ആഡംബര വീട് വയ്ക്കുന്നു എന്നൊരു വാര്‍ത്തവന്നു. പിന്നീട് അത് അനുബന്ധ വാര്‍ത്തകളായി, കാര്‍ട്ടൂണുകളിലെയും വാര്‍ത്താധിഷ്ഠിത പരിപാടികളിലെയും പരാമര്‍ശവിഷയമായി, പ്രസംഗങ്ങളിലെ സൂചനകളായി, എസ്എംഎസിലൂടെ, ഇ-മെയിലിലൂടെ, ബ്ളോഗുകളിലൂടെ പരന്നുപടര്‍ന്നു. കോടതിയിലേക്കും ആരോപണത്തെ വലിച്ചുകൊണ്ടുപോയി. അങ്ങനെ, പിണറായി വിജയന് ആഡംബരം നിറഞ്ഞ ഒരു വീടുണ്ട് എന്ന് വലിയവിഭാഗം ജനങ്ങളുടെ മനസ്സില്‍ ഉറപ്പിച്ചശേഷമാണ്, ഒരു കൂറ്റന്‍ വീടിന്റെ പടം സംഘടിപ്പിച്ച്, ഇതാ പിണറായിയുടെ ബംഗ്ളാവ് എന്ന ഇ-മെയില്‍ പ്രചാരണമാരംഭിച്ചത്.

പിണറായി കൊട്ടാരസദൃശമായ വീടുവച്ചു എന്ന് ഒരു മഞ്ഞപ്പത്രക്കാരനാണ് ഹൈക്കോടതിയില്‍ സമര്‍പ്പിച്ച ഹര്‍ജിയിലൂടെ ആരോപണമുന്നയിച്ചിരുന്നത്. അതിന്മേല്‍ കോടതി നിര്‍ദേശപ്രകാരം ആദായ നികുതിവകുപ്പ് അന്വേഷണം നടത്തി. 1977ല്‍ പണിത വീട് 11 ലക്ഷം രൂപ ചെലവില്‍ പിണറായി പുതുക്കിയിട്ടുണ്ടെന്നും കണ്ണൂര്‍ ജില്ലയിലെ വേങ്ങാട് പഞ്ചായത്തിലാണ് ആ വീടെന്നും 2000 ഏപ്രിലിനു ശേഷം വീട് പണിതിട്ടില്ലെന്നുമാണ് ഹൈക്കോടതിയില്‍ ആദായനികുതി വകുപ്പ് സമര്‍പ്പിച്ച സത്യവാങ്മൂലത്തിലുള്ളത്. അതുസംബന്ധിച്ച് അന്ന് മാതൃഭൂമി പ്രസിദ്ധീകരിച്ച വാര്‍ത്ത ഇങ്ങനെ:

"വീട് പുതുക്കാന്‍ 11 ലക്ഷത്തിന്റെ കണക്ക് പിണറായി വിശദീകരിച്ചിട്ടുണ്ടെന്ന് സത്യവാങ്മൂലത്തില്‍് പറഞ്ഞു. 5.6 ലക്ഷം രൂപ എസ്ബി.ഐയില്‍നിന്ന് പിണറായി വായ്പ എടുത്തു. 1.98 ലക്ഷം രൂപ ഭാര്യയുടെ പിഎഫില്‍നിന്ന് എടുത്തു. 2 ലക്ഷം രൂപ മകള്‍ വായ്പ എടുത്തു. 1.42 ലക്ഷവും ഇത് കൂടാതെ മകള്‍ നല്‍കി. പുതിയ വീട് പിണറായി പണിതിട്ടില്ലെന്നും നിലവിലുള്ള വീടിന്റെ ഒന്നാം നില പുതുക്കിയത് മാത്രമാണെന്നും അന്വേഷണത്തില്‍ അറിയാന്‍ കഴിഞ്ഞതായി ആദായനികുതി വകുപ്പ് അസി. സോളിസിറ്റര്‍ ജനറല്‍ പി പരമേശ്വരന്‍ നായര്‍ മുഖേന നല്‍കിയ സത്യവാങ്മൂലത്തില്‍ വിശദീകരിച്ചു.''(മാതൃഭൂമി, 2008 ജനുവരി 2)

കാല്‍നൂറ്റാണ്ടോളം പഴക്കമുള്ള ഒരു വീടിന് അവശ്യംവേണ്ട പുതുക്കലും കൂട്ടിച്ചേര്‍ക്കലും വരുത്തിയതിനെ, കൊട്ടാരം പണിയുന്നതായി വ്യാഖ്യാനിച്ച് അപവാദപ്രചാരണം നടത്തുന്നവര്‍ക്ക്, ആദായ നികുതിവകുപ്പിന്റെ അന്വേഷണറിപ്പോര്‍ട്ടും അത് കോടതി സ്വീകരിച്ചതുമൊന്നും തടസ്സമായില്ല. സിപിഐ എം സംസ്ഥാന സെക്രട്ടറിയെ രാഷ്ട്രീയമായി സംഹരിക്കാന്‍ പറഞ്ഞുപരത്തിയ എല്ലാ നുണകളും പൊളിഞ്ഞുതകര്‍ന്നതും അവരെ പിന്തിരിപ്പിച്ചില്ല. ഏതുവഴിയിലൂടെയും ഹീനകൃത്യം തുടരും എന്നാണ്, പുതിയ വീടു വിവാദത്തിലൂടെ പ്രഖ്യാപിക്കപ്പെട്ടത്. ഒരു കേന്ദ്രത്തില്‍ സൃഷ്ടിച്ച ഇ-മെയില്‍ സന്ദേശം മണിക്കൂറുകള്‍കൊണ്ട് ലോകത്തിന്റെ നാനാഭാഗത്തും ഉള്ളവര്‍ക്കെത്തി. ഒരാള്‍തന്നെ നൂറുകണക്കിന് സന്ദേശങ്ങള്‍ അയച്ചതായാണ് കാണാനാകുന്നത്.

അങ്ങനെ പെറ്റുപെരുകിയ മെയിലിലെ ചിത്രത്തില്‍ കാണുന്ന കൊട്ടാരം എവിടെ എന്ന അന്വേഷണം ഒടുവില്‍ ചെന്നെത്തിയത്, കുന്നംകുളത്തെ ഒരു എന്‍ആര്‍ഐ വ്യവസായിയുടെ വീട്ടിലാണ്. തന്റെ വീടാണ് പിണറായിയുടേതെന്ന വ്യാജേന പ്രചരിപ്പിക്കുന്ന ചിത്രത്തിലുള്ളതെന്നും സിപിഐ എം നേതാവിനെ അപകീര്‍ത്തിപ്പെടുത്താനുള്ള പ്രചാരണമാണിതെന്നും അദ്ദേഹം മാധ്യമങ്ങളോട് പറഞ്ഞു.

സമുന്നതനായ കമ്യൂണിസ്റ്റ് നേതാവിന്റെ വ്യക്തിത്വത്തിനോ അംഗീകാരത്തിനോ ഒരു വീടിന്റെ ചിത്രം പ്രചരിപ്പിച്ചതിന്റെ പേരില്‍ എന്തെങ്കിലും സംഭവിക്കുമെന്ന് ഞങ്ങള്‍ കരുതുന്നില്ല. എന്നാല്‍, ഈ വ്യാജപ്രചാരണം ആസൂത്രിതവും തുടര്‍ച്ചയായുള്ളതുമായ ഒന്നിന്റെ ഭാഗമാണെന്നത് നിസ്സാര പ്രശ്നമല്ല. പിണറായി എന്ന വ്യക്തിയെ അല്ല, സിപിഐ എമ്മിന്റെ സംസ്ഥാന സെക്രട്ടറിയെയാണ് കുപ്രചാരകര്‍ ലക്ഷ്യമിടുന്നത്. പിണറായിയുടെ പരാതി പൊലീസ് സൈബര്‍ സെല്‍ അന്വേഷിക്കുന്നുണ്ടെന്നും വ്യാജചിത്രത്തിന്റെ ഉറവിടത്തെക്കുറിച്ച് സൂചന ലഭിച്ചിട്ടുണ്ടെന്നും വാര്‍ത്ത വന്നിട്ടുണ്ട്. ക്രിമിനല്‍ മനസ്സുള്ള അത്തരക്കാരെ പിടികൂടി ജനസമക്ഷം തുറന്നുകാട്ടേണ്ടതുണ്ട്.

പാര്‍ടി നേതാക്കളെയും അവരുടെ കുടുംബാംഗങ്ങളെയും കഥാപാത്രങ്ങളാക്കി ഇത്തരം വ്യാജപ്രചാരണങ്ങള്‍ നിരന്തരം സൃഷ്ടിക്കുന്ന മാഫിയാ സമാനമായ സംഘം പ്രവര്‍ത്തിക്കുന്നുണ്ടെന്നതിന് മറ്റനേകം ഉദാഹരണങ്ങള്‍ ചൂണ്ടിക്കാട്ടാനാകും. ഇത്തരം വ്യാജകഥകള്‍ പടച്ചുവിടുന്നവരുടെ ഉദ്ദേശ്യം ഒരു പരിധിവരെ നിറവേറ്റപ്പെടുന്നുണ്ടെന്നതും വസ്തുതയാണ്. കല്‍പ്പിതകഥ മാത്രം അറിയുകയും യാഥാര്‍ഥ്യം അറിയാതിരിക്കുകയും ചെയ്യുന്നവര്‍ നിരവധിയുണ്ടാകും. അവരിലൂടെ കള്ളങ്ങള്‍ക്ക് അനന്തമായ പ്രചാരവും ലഭിക്കും. വാര്‍ത്തകളിലൂടെയും പ്രസംഗങ്ങളിലൂടെയും ചില ദുസ്സൂചനകള്‍ ഉല്‍പ്പാദിപ്പിച്ച്, അത് അപവാദകഥയാക്കി നനച്ചുവളര്‍ത്തിയെടുക്കുന്ന നീചസമീപനം പൊറുക്കപ്പെട്ടുകൂടാ. ഇത്തരം നെറികേടുകളെയും അതില്‍ രാഷ്ട്രീയ-മാധ്യമ താല്‍പ്പര്യങ്ങള്‍ വഹിക്കുന്ന പങ്കാളിത്തത്തെയും തുറന്നുകാട്ടുകയും നികൃഷ്ടവൃത്തിക്കാരെ പുറത്തുകൊണ്ടുവരികയും ചെയ്യുന്ന ഇടപെടലുകള്‍ പൊതുസമൂഹത്തില്‍നിന്നുതന്നെ ഉണ്ടാകേണ്ടതുണ്ട്. നുണപറച്ചിലുകാര്‍ക്ക് വിലസാനുള്ളതല്ല നമ്മുടെ നാടെന്ന് തെളിയിക്കേണ്ട കാലം അതിക്രമിച്ചിരിക്കുന്നു.

ദേശാഭിമാനി മുഖപ്രസംഗം 191109