Sunday, June 30, 2013

മുഖ്യമന്ത്രിക്ക് സ്വീകരണം ഒരുക്കിയത് വിവാദ ചിട്ടിക്കമ്പനി

ചങ്ങനാശേരി: യുഎന്‍ അവാര്‍ഡ് വാങ്ങിയ ഉമ്മന്‍ചാണ്ടിക്ക് ശനിയാഴ്ച ചങ്ങനാശേരിയിലും പുതുപ്പള്ളിയിലും സ്വീകരണം ഒരുക്കിയത് വിവാദ ചിട്ടിക്കമ്പിനിയെന്ന് ആരോപണം. ഡിസിസി ജനറല്‍ സെക്രട്ടറി കെ ജെ ജെയിംസ് ചെയര്‍മാനായ ആപ്പിള്‍ട്രീ ചിട്ടിക്കമ്പനിയാണ് സ്വീകരണത്തിന്റെ ചെലവുമുഴുവന്‍ വഹിച്ചതെന്ന് കോണ്‍ഗ്രസിലെതന്നെ ഒരുവിഭാഗം നേതാക്കള്‍ പറഞ്ഞു. ""സംഘാടകര്‍ ഒന്നും അറിയേണ്ടിവന്നില്ല. എല്ലാം ജയിംസിന്റെ ഏര്‍പ്പാടായിരുന്നു. പിരിവൊന്നും വേണ്ടിവന്നില്ല""- സംഘാടകരില്‍ ഒരു പ്രമുഖന്‍ "ദേശാഭിമാനി"യോടു പറഞ്ഞു.

പുതുപ്പള്ളി ആസ്ഥാനമായി പ്രവര്‍ത്തിക്കുന്ന ഈ കമ്പനിക്ക് അഞ്ചു വര്‍ഷത്തിനുള്ളില്‍ 1000 കോടിയുടെ ആസ്തിയായി. തട്ടിപ്പുനടത്തിയെന്ന പരാതികളില്‍ പൊലീസ് കേസ് വന്നതോടെ ഈ സ്ഥാപനവും വിവാദത്തിലായി. ചിട്ടി തട്ടിപ്പ് കേസില്‍ പ്രതിയായ ജെയിംസ് ഉമ്മന്‍ചാണ്ടിയുടെ വിശ്വസ്തനാണ്. വിവാദമൊഴിവാക്കാന്‍ ജെയിംസ് മുഖ്യമന്ത്രിക്കൊപ്പം സ്വീകരണവേദി പങ്കിട്ടില്ല. ഇതിനുമുമ്പ് ഡിസിസി സംഘടിപ്പിച്ച യോഗത്തില്‍ ജെയിംസ് പങ്കെടുത്തിരുന്നു. ഫോട്ടോഗ്രാഫര്‍മാര്‍ ചിത്രമെടുക്കുന്നത് ശ്രദ്ധിച്ച മന്ത്രി തിരുവഞ്ചൂര്‍ ജെയിംസിനെ വേദിയില്‍നിന്ന് ഇറക്കിവിട്ടു.

deshabhimani 010713

No comments:

Post a Comment